Jesus Sirach 50
The Book of Jesus Sirach
܀ ܝܫܘܥ ܒܪ ܐܣܝܪܐ ܢܢ ܀
1 ܪܰܒ ܐܰܚܰܘ̈ܗܝ ܘܰܟܠܺܝܠܳܐ ܕܥܰܡܶܗ: ܫܶܡܥܽܘܢ ܒܰܪ ܢܬܰܢܝܳܐ ܟܳܗܢܳܐ.
2 ܕܰܒܝܰܘ̈ܡܰܘܗܝ ܐܶܬܒܢܰܝ ܒܰܝܬܳܐ. ܘܶܐܬܬܰܩܦ ܗܰܝܟܠܳܐ. ܘܶܐܬܬܣܺܝܡ ܫܽܘܪܳܐ ܘܥܳܥ̈ܝܳܬܳܐ.
3 ܘܶܐܬܒܰܢܝܰܬ ܚܳܕܰܪܬܳܐ: ܘܰܚܦܰܪ ܡܰܒܽܘܥܳܐ.
4 ܘܦܰܨܺܝ ܥܰܡܶܗ ܡܶܢ ܣܳܢ̈ܶܐܐ.
5 ܡܳܐ ܝܳܐܶܐ ܠܶܗ ܒܡܰܦܩܶܗ ܡܶܢ ܗܰܝܟܠܳܐ. ܟܰܕ ܡܶܬܚܙܶܐ ܡܶܢ ܬܶܚܝܬ ܦܪܺܝܣܳܐ.
6 ܐܰܝܟ ܟܰܘܟܰܒ ܢܽܘܓܗܳܐ ܒܰܝܢܳܬ ܥܢܳܢ̈ܶܐ: ܘܰܐܝܟ ܣܰܗܪܳܐ ܒܝܰܘ̈ܡܰܝ ܢܺܝܣܳܢ.
7 ܘܰܐܝܟ ܫܶܡܫܳܐ ܕܕܳܢܰܚ ܥܰܠ ܐܰܦܕܳܢ̈ܶܐ.
8 ܘܰܐܝܟ ܩܶܫܬܳܐ ܒܰܥ̈ܢܳܢܶܐ: ܘܰܐܝܟ ܫܶܒ̈ܠܶܐ ܕܚܰܩܠܳܐ: ܘܰܐܝܟ ܫܽܘܫܰܢܰܬ ܡܰܠܟܳܐ ܒܡܰܒܽܘܥܰܝ̈ ܡܰܝ̈ܳܐ. ܘܰܐܝܟ ܐܺܝܠܳܢ̈ܶܐ ܕܠܶܒܢܳܢ ܒܝܰܘܡܰܝ̈ ܩܛܳܦܳܐ.
9 ܘܰܐܝܟ ܪܺܝܚܳܐ ܕܰܠܒܽܘܢܬܳܐ ܥܰܠ ܦܺܝܪ̈ܡܶܐ.
10 ܘܰܐܝܟ ܥܶܩܳܐ ܕܕܰܗܒܳܐ ܕܰܡܦܰܬܰܟ ܫܰܦܺܝܪ: ܘܰܡܨܰܒܰܬ ܒܟܺܐܦ̈ܶܐ ܛܳܒ̈ܳܬܳܐ.
11 ܘܰܐܝܟ ܙܰܝܬܳܐ ܗܕܺܝܪܳܐ: ܕܪܰܘܪ̈ܒܺܝܢ ܣܰܘܟܰܘ̈ܗܝ. ܘܰܐܝܟ ܐܺܝܠܳܢܳܐ ܕܡܶܫܚܳܐ ܕܰܡܣܰܒܰܥ ܒܥܰܘܦܰܘ̈ܗܝ. ܒܡܰܠܒܫܶܗ ܡܳܐܢ̈ܶܐ ܕܩܽܘܕܫܳܐ: ܘܰܒܡܰܥܛܦܶܗ ܡܳܐܢ̈ܶܐ ܕܺܐܝܩܳܪܳܐ.
12 ܒܡܰܦܩܶܗ ܠܰܡܩܰܒܳܠܽܘ ܬܶܫܒܽܘܚܬܳܐ: ܒܝܳܐܝܽܘܬܳܐ ܕܬܽܘܩܦܳܐ ܕܡܰܩܕܫܳܐ.
13 ܒܰܡܩܰܒܳܠܽܘܬܶܗ ܗܰܕܳܡ̈ܶܐ ܕܒܶܣܪܳܐ ܡܶܢ ܐܺܝܕܳܐ ܕܰܐܚܰܘ̈ܗܝ. ܘܗܽܘ ܩܳܐܶܡ ܠܥܶܠ ܡܶܢ ܣܶܕܖ̈ܶܐ.
14 ܘܰܟܪܺܝܟܺܝܢ ܠܶܗ ܐܰܚܰܘ̈ܗܝ: ܟܽܠܗܽܘܢ ܒܢܰܝ̈ ܐܰܗܪܽܘܢ ܒܺܐܝܩܳܪܗܽܘܢ.
15 ܘܩܽܘܪ̈ܒܳܢܶܐ ܒܺܐܝܕܰܝ̈ܗܽܘܢ ܠܽܘܩܒܰܠ ܟܽܠܶܗ ܥܰܡܳܐ ܕܺܝܣܪܳܐܶܝܠ.
16 ܥܕܰܡܳܐ ܕܓܰܡܰܪܘ ܠܰܡܫܰܡܳܫܽܘ ܡܰܕܒܚܳܐ: ܘܠܰܡܫܰܡܳܫܽܘ ܒܚܰܕܽܘܬܳܐ ܕܩܽܘܕܫܳܐ. ܐܰܘܫܶܛ ܥܰܠ ܩܶܣܛܳܐ ܐܺܝܕܶܗ. ܘܰܢܣܰܒ ܚܰܡܪܳܐ ܥܰܬܺܝܩܳܐ.
17 ܘܰܢܣܰܟ ܥܰܠ ܓܶܢ̱ܒ ܡܰܕܒܚܳܐ ܠܪܺܝܚܳܐ ܕܰܢܝܳܚܳܐ.
18 ܘܗܰܝܕܶܝܢ ܝܰܒܶܒܘ ܒܢܰܝ̈ ܐܰܗܪܽܘܢ ܒܩܰܪ̈ܢܳܬܳܐ ܩܕܳܡ ܟܽܠܶܗ ܥܰܡܳܐ ܕܺܝܣܪܳܐܶܝܠ. ܘܰܐܫܡܰܥܘ ܩܳܠܳܐ ܬܰܩܺܝܦܳܐ ܠܰܡܒܰܪܳܟܽܘ ܩܕܳܡ ܟܽܠܶܗ ܥܰܡܳܐ.
19 ܘܰܢܦܰܠܘ ܥܰܠ ܐܰܦܰܝ̈ܗܽܘܢ ܥܰܠ ܐܰܪܥܳܐ ܐܰܟܚܕܳܐ: ܟܽܠܶܗ ܥܰܡܳܐ ܠܡܶܣܓܰܕ ܠܰܐܠܳܗܳܐ.
20 ܘܝܰܗܒܘ ܠܬܰܘܕܺܝܬܳܐ ܩܳܠܗܽܘܢ. ܘܶܐܬܒܰܣܰܡܘ ܐܰܟܚܕܳܐ ܒܰܨܠܽܘܬܳܐ.
21 ܘܫܰܒܰܚܘ ܥܰܡܳܐ ܕܰܐܪܥܳܐ ܠܰܐܠܳܗܳܐ: ܕܰܥܒܰܕ ܦܺܪ̈ܺܝܫܳܬܳܐ ܒܰܐܪܥܳܐ.
22 ܕܰܒܪܳܐ ܒܢܰܝ̈ܢܳܫܳܐ ܡܶܢ ܟܰܪܣܳܐ ܕܶܐܡܗܽܘܢ. ܘܰܡܕܰܒܰܪ ܠܗܽܘܢ ܐܰܝܟ ܨܶܒܝܳܢܶܗ.
23 ܠܡܶܬܰܠ ܠܗܽܘܢ ܚܶܟܡܬܳܐ ܕܠܶܒܳܐ. ܘܢܶܗܘܶܐ ܫܠܳܡܳܐ ܒܰܝܢܳܬܗܽܘܢ.
24 ܘܢܶܬܩܰܝܰܡ ܥܰܡ ܫܶܡܥܽܘܢ ܚܶܣܕܳܐ ܘܥܰܡ ܙܰܪܥܶܗ: ܐܰܝܟ ܝܰܘ̈ܡܳܬܳܐ ܕܰܫܡܰܝܳܐ.
25 ܒܰܬܪܶܝܢ ܥܰܡ̈ܡܺܝܢ ܐܶܬܬܥܺܝܩܰܬ ܢܰܦܫܝ. ܘܕܰܬܠܳܬܳܐ ܠܳܐ ܗܘܳܐ ܥܰܡܳܐ.
26 ܝܳܬܒܰܝ̈ ܓܒܶܠ ܘܰܦܠܶܫܬܳܝ̈ܶܐ: ܘܥܰܡܳܐ ܣܰܟܠܳܐ ܕܝܳܬܶܒ ܒܰܫܟܺܝܡ.
27 ܟܽܠ ܡܰܬ̈ܠܶܐ ܕܚܰܟܺܝ̈ܡܶܐ ܘܽܐܘܚ̈ܕܳܬܗܽܘܢ: ܟܬܺܝܒܺܝܢ ܒܣܶܦܪܳܐ ܗܳܢܳܐ.
28 ܛܽܘܒܰܘܗܝ ܠܓܰܒܪܳܐ ܕܰܒܗܳܠܶܝܢ ܢܶܪܢܶܐ. ܘܢܺܐܠܰܦ ܐܶܢܶܝܢ: ܘܢܶܚܟܰܡ ܐܶܢܶܝܢ: ܘܢܶܥܒܶܕ ܐܶܢܶܝܢ.
29 ܪܰܘܡܳܐ ܕܕܶܚܠܶܬܗ ܕܰܐܠܳܗܳܐ ܥܰܠ ܟܽܠ ܡܶܕܶܡ ܐܶܬܬܪܺܝܡܰܬ. ܚܙܺܝܗ̇ ܒܶܪܝ: ܘܠܳܐ ܬܶܫܒܩܺܝܗ̇.