Jesus Sirach 39
The Book of Jesus Sirach
܀ ܝܫܘܥ ܒܪ ܐܣܝܪܐ ܠܛ ܀
1 ܒܪܰܡ ܗܰܘ ܕܝܳܗܶܒ ܢܰܦܫܶܗ ܠܡܶܕܚܰܠ ܠܰܐܠܳܗܳܐ. ܘܰܠܡܶܣܬܰܟܳܠܽܘ ܢܳܡܽܘܣܳܐ ܕܚܰܝ̈ܶܐ.
2 ܐܰܝܟ ܚܶܟܡܬܳܐ ܕܟܽܠܗܽܘܢ ܩܰܕܡܳܝ̈ܶܐ ܢܶܒܥܶܐ. ܘܰܠܘܳܬ ܢܒܺܝ̈ܶܐ ܩܰܕܡܳܝ̈ܶܐ ܢܶܬܦܢܶܐ. ܘܫܽܘ̈ܥܝܳܬܳܐ ܕܟܽܠ ܐ̱ܢܳܫ̈ܳܐ ܕܥܳܠܡܳܐ ܢܺܐܠܰܦ. ܘܒܰܕܥܰܡܺܝ̈ܩܳܢ ܢܶܬܚܰܫܰܒ.
3 ܚܶܟܡܬܳܐ ܕܡܰܬ̈ܠܶܐ ܢܺܐܠܰܦ. ܘܰܒܟܽܠ ܣܬܺܝܪ̈ܳܬܳܐ ܢܶܣܬܰܟܰܠ.
4 ܒܰܝܢܳܬ ܫܰܠܺܝ̈ܛܳܢܶܐ ܢܗܰܠܶܟ. ܘܒܰܝܢܳܬ ܡܰܠ̈ܟܶܐ ܘܪܰܘܪ̈ܒܳܢܶܐ ܢܫܰܡܶܫ.
5 ܒܰܡܕܺܝ̈ܢܳܬܳܐ ܕܥܳܠܡܳܐ ܢܗܰܠܶܟ. ܛܳܒ ܘܒܺܝܫ ܒܐ̱ܢܳܫܳܐ ܢܟܰܣܶܐ.
6 ܘܰܒܠܶܒܶܗ ܢܣܺܝܡ ܠܰܡܨܰܠܳܝܽܘ. ܘܡܶܢ ܩܕܳܡ ܐܰܠܳܗܳܐ ܢܶܒܥܶܐ ܖ̈ܰܚܡܶܐ.
7 ܢܶܦܬܰܚ ܦܽܘܡܶܗ ܒܰܨܠܽܘܬܳܐ. ܘܥܰܠ ܚܛܳܗܰܘ̈ܗܝ ܢܶܒܥܶܐ ܛܳܒܬܳܐ.
8 ܘܰܒܪܽܘܚܳܐ ܕܣܰܟܽܘܠܬܳܢܽܘܬܳܐ ܢܶܬܚܰܟܰܡ.
9 ܗܽܘ ܢܰܦܶܩ ܡܰܬ̈ܠܶܐ ܚܰܕ ܬܪܶܝܢ. ܘܢܰܘܕܽܘܢ ܠܶܗ ܒܬܰܪ̈ܥܝܳܬܶܗ.
10 ܗܽܘ ܢܶܣܬܰܟܰܠ ܡܰܬ̈ܠܶܐ ܘܚܶܟܡܬܳܐ. ܘܢܶܣܬܰܟܰܠ ܒܰܣܬܺܝܪ̈ܳܬܳܐ.
11 ܗܽܘ ܢܰܦܶܩ ܚܶܟܡܬܳܐ ܕܝܽܘܠܦܳܢܳܐ. ܘܰܒܢܳܡܽܘܣܳܐ ܕܚܰܝ̈ܶܐ ܢܶܫܬܰܒܰܚ.
12 ܘܢܺܐܠܦܽܘܢ ܣܰܓܺܝ̈ܐܶܐ ܡܶܢ ܚܶܟܡܬܶܗ. ܘܰܒܥܳܠܡܳܐ ܠܳܐ ܢܶܬܛܥܶܐ ܫܡܶܗ.
13 ܘܠܳܐ ܢܶܒܛܰܠ ܕܽܘܟܪܳܢܶܗ ܥܕܰܡܳܐ ܠܥܰܠܰܡ. ܘܰܫܡܶܗ ܠܳܐ ܢܶܬܛܥܶܐ ܥܕܰܡܳܐ ܡܶܢ ܕܳܪ ܠܕܳܪ.
14 ܚܶܟܡܬܶܗ ܢܬܰܢ̈ܝܳܢ ܟܢܽܘ̈ܫܳܬܳܐ. ܘܬܶܫܒ̈ܚܳܬܶܗ ܢܺܐܡܰܪ ܥܰܡܳܐ.
15 ܐܶܢ ܢܶܨܒܶܐ ܒܳܐܠܶܦ: ܢܶܫܬܰܒܰܚ. ܘܶܐܢ ܢܶܫܬܽܘܩ ܒܥܰܡܳܐ ܙܥܽܘܪܳܐ.
16 ܐܶܣܬܰܟܰܠܘ: ܘܺܐܡܰܪ ܝܽܘܠܦܳܢܝ: ܐܰܝܟ ܣܰܗܪܳܐ ܒܝܰܘܡܰܝ̈ ܬܪܶܥܣܰܪ.
17 ܫܽܘܡܥܽܘܢܝ ܙܰܕܺܝ̈ܩܶܐ: ܘܢܰܦܪܰܥ ܒܶܣܪܟܽܘܢ ܐܰܝܟ ܫܽܘ̈ܫܰܢܶܐ ܘܰܐܝܟ ܐܰܪ̈ܙܶܐ ܕܰܫܬܺܝܠܺܝܢ ܥܰܠ ܡܰܝ̈ܳܐ.
18 ܘܰܐܝܟ ܒܶܣ̈ܡܶܐ ܛܳܒ̈ܶܐ ܢܶܒܣܰܡ ܪܺܝܚܟܽܘܢ: ܐܰܝܟ ܪܺܝܚܳܐ ܕܠܶܒܢܳܢ ܒܰܐܪ̈ܙܰܘܗܝ.
19 ܘܰܐܝܟ ܥܶܩܳܪܳܐ ܕܫܽܘܫܰܢܰܬ ܡܰܠܟܳܐ.
20 ܐܰܪܺܝܡܘ ܩܳܠܟܽܘܢ: ܫܰܒܰܚܘ ܐܰܟܚܕܳܐ. ܘܰܐܘܕܰܘ ܠܰܐܠܳܗܳܐ ܥܰܠ ܟܽܠܗܽܘܢ ܥܒܳܕܰܘ̈ܗܝ. ܡܢܰܘ ܓܒܰܪ̈ܘܳܬܶܗ ܒܬܶܫܒ̈ܚܳܬܳܐ ܘܰܒܬܰܘܕܺܝܬܳܐ ܘܰܒܩܳܠܳܐ ܪܳܡܳܐ. ܘܗܳܟܰܢܳܐ ܐܶܡܰܪܘ.
21 ܟܽܠܗܽܘܢ ܥܒܳܕܰܘ̈ܗܝ ܕܰܐܠܳܗܳܐ ܝܳܐܶܝܢ ܐܰܟܚܕܳܐ. ܘܟܽܠܗܽܘܢ ܠܨܶܒ̈ܘܳܬܶܗ ܐܺܬܒܪܺܝܘ. ܘܠܰܝܬ ܕܢܺܐܡܰܪ: ܗܳܢܳܐ ܠܡܳܢܳܐ: ܘܗܳܢܳܐ ܠܡܳܢܳܐ. ܡܶܛܽܠ ܕܟܽܠܗܽܘܢ ܒܘܳܠܺܝܬܳܐ ܥܒܺܝܕܺܝܢ.
22 ܘܠܰܝܬ ܕܢܺܐܡܰܪ ܗܳܢܳܐ ܒܺܝܫ ܘܗܳܢܳܐ ܛܳܒ. ܡܶܛܽܠ ܕܟܽܠܗܽܘܢ ܒܥܶܕܳܢܗܽܘܢ ܡܶܬܓܰܢ̱ܒܪܺܝܢ.
23 ܒܡܺܐܡܪܶܗ ܡܰܕܢܰܚ ܫܶܡܫܳܐ. ܘܰܒܡܺܐܡܪܶܗ ܗܽܘ ܡܰܥܪܶܒ ܠܶܗ.
24 ܒܚܰܕܽܘܬܳܐ ܨܶܒܝܳܢܶܗ ܡܶܬܥܒܶܕ. ܘܠܰܝܬ ܕܰܡܫܰܘܚܰܪ ܠܦܽܘܩܕܳܢܶܗ.
25 ܥܒܳܕܰܝ̈ܗܽܘܢ ܕܟܽܠ ܒܢܰܝ̈ ܒܶܣܪܳܐ ܠܩܽܘܒܠܶܗ. ܘܠܰܝܬ ܕܛܳܫܶܗ ܡܶܢ ܩܕܳܡܰܘܗܝ.
26 ܘܠܰܝܬ ܕܩܰܠܺܝܠ ܘܣܰܓܺܝ ܩܕܳܡܰܘܗܝ. ܘܠܰܝܬ ܕܥܰܫܺܝܢ ܘܰܩܫܶܐ ܠܩܽܘܒܠܶܗ.
27 ܒܽܘܪܟܬܶܗ ܐܰܝܟ ܢܰܗܪܳܐ ܪܳܕܝܳܐ.
28 ܘܰܐܝܟ ܢܰܗܪܳܐ ܥܳܠ̈ܡܶܐ ܡܰܫܩܝܳܐ. ܗܳܟܰܢܳܐ ܒܪܽܘܓܙܶܗ ܥܰܡ̈ܡܶܐ ܕܳܐܶܢ. ܘܗܳܦܶܟ ܐܰܪܥܳܐ ܕܫܶܩܝܗܽܘܢ ܠܡܶܠܚܳܐ.
29 ܐܽܘܪ̈ܚܳܬܗܽܘܢ ܕܙܰܕܺܝ̈ܩܶܐ ܬܪ̈ܺܝܨܳܢ ܩܕܳܡ ܐܰܦܰܘ̈ܗܝ. ܐܳܦ ܠܖ̈ܰܫܺܝܥܶܐ ܗܶܢܶܝܢ ܡܶܬܦܰܢ̈ܝܳܢ.
30 ܛܳܒܬܳܐ ܡܶܢ ܒܪܺܝܫܺܝܬ ܠܛܳܒ̈ܶܐ ܐܶܬܒܰܪܝܰܬ. ܘܳܐܦ ܠܥܰܘ̈ܳܠܶܐ ܐܶܢ ܛܳܒ ܘܶܐܢ ܒܺܝܫ.
31 ܪܺܝܫ ܟܽܠܗܶܝܢ ܨܶܒ̈ܘܳܬܳܐ ܕܡܶܬܒܰܥ̈ܝܳܢ ܠܚܰܝ̈ܠܶܐ ܕܰܒܢܰܝ̈ܢܳܫܳܐ: ܡܰܝ̈ܳܐ: ܘܢܽܘܪܳܐ: ܘܦܰܪܙܠܳܐ: ܘܡܶܠܚܳܐ: ܘܚܶܛ̈ܶܐ: ܘܬܰܪܒܳܐ: ܘܚܰܠܒܳܐ: ܘܕܶܒܫܳܐ: ܘܥܶܢ̈ܒܶܐ: ܘܚܰܡܪܳܐ: ܘܡܶܫܚܳܐ: ܘܬܰܟܣܺܝܬܳܐ: ܘܰܠܒܽܘܫܳܐ.
32 ܟܽܠܗܶܝܢ ܗܳܠܶܝܢ ܠܛܳܒ̈ܶܐ ܡܰܛ̈ܐܒܳܢ. ܘܠܒܺܝ̈ܫܶܐ ܠܠܰܘܛܬܳܐ ܡܶܬܗܰܦ̈ܟܳܢ.
33 ܐܺܝܬ ܪ̈ܽܘܚܶܐ ܕܰܠܦܶܪ̈ܥܶܐ ܐܶܬܒܪ̈ܺܝ. ܘܰܒܪܽܘܓܙܗܶܝܢ ܛܽܘܖ̈ܶܐ ܥܳܩܪ̈ܳܢ.
34 ܒܥܶܕܳܢ ܪܽܘܓܙܳܐ ܚܰܝܠܗܽܘܢ ܡܚܰܘ̈ܝܳܢ. ܘܪܽܘܚܳܐ ܕܡܰܢ ܕܰܒܪܳܐ ܐܶܢܶܝܢ ܡܢܺܝ̈ܚܳܢ.
35 ܢܽܘܪܳܐ ܘܒܰܪܕܳܐ ܘܟܺܐܦ̈ܶܐ ܕܡܰܘܬܳܐ: ܟܽܠܗܶܝܢ ܗܳܠܶܝܢ ܠܕܺܝܢܳܐ ܐܶܬܒܪ̈ܺܝ.
36 ܚܰܝܘܰܬ ܫܶܢܳܐ ܘܥܶܩܰܪ̈ܒܶܐ ܘܚܰܝ̈ܘܳܬܳܐ: ܚܰܪܒܳܐ ܕܦܽܘܪܥܳܢܳܐ ܠܡܰܘܒܳܕܽܘ ܠܖ̈ܰܫܺܝܥܶܐ.
37 ܒܥܶܕܳܢܳܐ ܕܦܳܩܶܕ ܠܗܽܘܢ ܚܳܕܶܝܢ. ܘܰܒܟܽܠ ܝܰܘ̈ܡܳܬܗܽܘܢ ܠܳܐ ܡܰܗܦܟܺܝܢ ܡܶܠܬܶܗ.
38 ܡܶܛܽܠ ܕܡܶܢ ܒܪܺܝܫܺܝܬ ܐܶܬܒܪܺܝܘ. ܐܶܣܬܰܟܰܠܘ ܒܢܰܝ̈ܢܳܫܳܐ: ܕܒܰܟܬܳܒܳܐ ܟܬܺܝ̈ܒܳܢ ܟܽܠܗܶܝܢ ܗܳܠܶܝܢ.
39 ܘܟܽܠܗܽܘܢ ܥܒܳܕܰܘ̈ܗܝ ܛܳܒܺܝܢ. ܘܟܽܠ ܨܒܽܘ ܠܙܰܒܢܳܗ̇ ܐܶܬܒܰܪܝܰܬ.
40 ܘܠܰܝܬ ܕܢܺܐܡܰܪ ܕܗܳܢܳܐ ܒܺܝܫ ܡܶܢ ܗܳܢܳܐ. ܡܶܛܽܠ ܕܟܽܠܗܽܘܢ ܩܦܺܝܣܺܝܢ ܒܰܐܘܨܖ̈ܶܐ. ܘܰܠܥܶܕܳܢ ܙܰܒܢܗܽܘܢ ܡܶܬܓܰܢ̱ܒܪܺܝܢ.
41 ܡܶܟܺܝܠ ܒܟܽܠܶܗ ܠܶܒܟܽܘܢ ܒܰܪܶܟܘ ܠܰܐܠܳܗܳܐ: ܘܫܰܒܰܚܘ ܠܰܫܡܶܗ.