Jesus Sirach 34
The Book of Jesus Sirach
܀ ܝܫܘܥ ܒܪ ܐܣܝܪܐ ܠܕ ܀
1 ܕܒܳܥܶܐ ܣܪܺܝܩܽܘܬܳܐ ܡܶܫܟܰܚ ܟܰܕܳܒܽܘܬܳܐ: ܘܚܶܠܡܳܐ: ܚܰܕܽܘܬܳܐ ܣܪܺܝܩܬܳܐ.
2 ܐܰܝܟ ܐ̱ܢܳܫ ܕܰܐܚܺܝܕ ܛܶܠܳܠܳܐ: ܘܡܰܦܪܰܚ ܥܰܘܦܳܐ. ܗܳܟܰܢܳܐ ܗܽܘ ܡܰܢ ܕܰܡܗܰܝܡܶܢ ܠܚܶܙܘܳܐ ܕܠܺܠܝܳܐ.
3 ܗܳܟܰܢܳܐ ܗܽܘ ܚܶܙܘܶܐ ܘܚܶܠܡܳܐ ܕܠܽܘܩܒܰܠ ܦܰܪܨܽܘܦܳ ܕܡܽܘܬܳܐ ܕܰܐܦ̈ܶܐ.
4 ܘܡܶܢ ܪܺܝܫ ܥܰܡܶܗ ܢܰܦܶܩ ܙܳܟܽܘܬܳܐ. ܘܡܰܢܽܘ ܟܰܕܳܒܳܐ ܕܢܶܙܟܶܐ.
5 ܟܽܠ ܢܶܚ̈ܫܶܐ ܘܩܶܨ̈ܡܶܐ ܘܚܶܠ̈ܡܶܐ: ܛܳܥܝܽܘܬܳܐ. ܘܕܰܡܗܰܝܡܶܢ ܠܗܽܘܢ: ܬܰܡܳܢ ܠܶܒܶܗ.
6 ܘܶܐܢ ܡܶܢ ܩܕܳܡ ܐܰܠܳܗܳܐ ܐܶܬܦܰܩܰܕ ܠܡܶܛܥܳܐ ܒܚܽܘܫܒܳܢܰܝ ܠܺܠܝܳܐ: ܠܳܐ ܬܶܬܶܠ ܠܗܽܘܢ ܠܶܒܳܟ.
7 ܣܰܓܺܝ̈ܐܶܐ ܓܶܝܪ ܕܰܒܚܶܠ̈ܡܶܐ ܛܥܰܘ ܐܽܘܪܚܳܐ: ܘܶܬܬܩܶܠܘ ܒܰܫܒܺܝ̈ܠܰܝܗܽܘܢ.
8 ܒܰܐܬܪܳܐ ܕܠܰܝܬ ܒܶܗ ܚܛܳܗ̈ܶܐ ܪܥܶܐ ܐܰܠܳܗܳܐ. ܡܶܛܽܠ ܕܚܶܟܡܬܳܐ ܕܥܰܘ̈ܳܠܶܐ ܒܠܺܠܝܳܐ ܡܶܬܗܰܝܡܢܳܐ.
9 ܓܰܒܪܳܐ ܚܰܟܺܝܡܳܐ: ܢܶܒܩܶܐ ܣܰܓܺܝ. ܘܰܕܟܳܫܰܪ ܒܟܽܠܡܶܕܶܡ ܒܳܨܶܐ.
10 ܕܠܳܐ ܢܰܣܺܝ: ܩܰܠܺܝܠ ܗܽܘ ܝܳܕܰܥ. ܘܰܕܢܰܣܺܝ: ܐܰܣܓܺܝ ܚܶܟܡܬܳܐ.
11 ܣܰܓܺܝ ܚܙܺܝܬ ܟܰܕ ܢܰܣܺܝܬ. ܘܨܶܒܘ̈ܳܬܳܐ ܣܰܓܺܝ̈ܐܳܬܳܐ ܥܒܰܪ ܥܠܰܝ.
12 ܙܰܒܢ̈ܳܬܳܐ ܣܰܓܺܝ̈ܐܳܬܳܐ ܠܡܰܘܬܳܐ ܡܛܺܝܬ. ܘܶܐܬܦܰܨܶܝܬ ܡܶܛܽܠܳܬܗܶܝܢ.
13 ܨܶܒܝܳܢܳܐ ܕܕܳܚܠܰܘ̈ܗܝ ܥܳܒܶܕ ܡܳܪܝܳܐ.
14 ܡܶܛܽܠ ܕܪܰܒ ܗܽܘ ܣܰܒܪܶܗ: ܘܦܳܪܶܩ.
15 ܕܕܳܚܶܠ ܠܰܐܠܳܗܳܐ: ܛܽܘܒܶܝܗ̇ ܠܪܽܘܚܶܗ.
16 ܥܰܠ ܡܰܢ ܐܶܬܬܟܶܠ. ܘܡܰܢܽܘ ܗܘܳܐ ܠܶܗ ܣܳܡܽܘܟܳܐ.
17 ܥܰܝܢܰܘ̈ܗܝ ܕܡܳܪܝܳܐ ܥܰܠ ܟܽܠܗܽܘܢ ܥܒܳܕܰܘ̈ܗܝ. ܘܡܰܓܶܢ ܘܦܳܪܶܩ: ܘܬܽܘܟܠܳܢܳܐ ܗܽܘ ܪܰܒܳܐ.
18 ܘܰܡܣܰܬܪܳܢܳܐ ܡܶܢ ܣܳܢܳܐܐ: ܘܦܳܪܽܘܩܳܐ ܡܶܢ ܒܥܶܠܕܒܳܒܳܐ: ܘܰܡܫܰܘܙܒܳܢܳܐ ܗܽܘ ܡܶܢ ܡܚܽܘܬܳܐ. ܘܣܳܡܶܟ ܡܶܢ ܕܰܠܡܶܦܰܠ. ܚܰܕܽܘܬܳܐ ܕܠܶܒܳܐ ܘܢܽܘܗܪܳܐ ܕܥܰܝ̈ܢܶܐ. ܘܳܐܣܝܽܘܬܳܐ ܕܚܰܝ̈ܶܐ ܘܒܽܘܪ̈ܟܳܬܳܐ.
19 ܗܳܠܶܝܢ ܟܽܠܗܶܝܢ ܐܰܥܦܳܐ ܥܰܠ ܙܰܕܺܝ̈ܩܶܐ ܢܺܐܬܝ̈ܳܢ ܥܠܰܘ̈ܳܬܗܽܘܢ ܕܥܰܘ̈ܳܠܶܐ: ܕܥܰܘܠܳܐ ܐܶܢܶܝܢ. ܘܠܳܐ ܡܶܬܩܰܒܠܺܝܢ ܩܽܘܪ̈ܒܳܢܰܝܗܽܘܢ.
20 ܠܳܐ ܓܶܝܪ ܨܳܒܶܐ ܐܰܠܳܗܳܐ ܒܥܳܠܰܘ̈ܳܬܗܽܘܢ ܕܚܰܛܳܝ̈ܶܐ. ܘܠܳܐ ܒܣܽܘܓܳܐܐ ܕܩܽܘܪ̈ܒܳܢܰܝܗܽܘܢ: ܫܳܒܶܩ ܠܗܽܘܢ.
21 ܐܰܝܟ ܐ̱ܢܳܫ ܕܢܳܟܶܣ ܒܪܳܐ ܩܕܳܡ ܐܰܒܽܘܗܝ: ܗܳܟܰܢܳܐ ܡܰܢ ܕܰܡܩܰܪܶܒ ܩܽܘܪܒܳܢܳܐ ܡܶܢ ܕܡܺܣܟܺܢ̈ܶܐ.
22 ܠܰܚܡܳܐ ܕܚܶܣܕܳܐ ܚܰܝܰܝ̈ܗܽܘܢ ܕܡܶܣܟܺܢ̈ܶܐ. ܘܰܕܟܳܠܶܐ ܠܶܗ ܡܶܢܗܽܘܢ: ܐܳܫܶܕ ܕܡܳܐ ܙܰܟܳܝܳܐ.
23 ܕܩܳܛܶܠ ܠܚܰܒܪܶܗ: ܝܳܪܶܬ ܢܶܟܣܰܘ̈ܗܝ. ܘܕܳܐܫܶܕ ܕܡܳܐ ܙܰܟܳܝܳܐ: ܠܰܐܠܳܗܳܐ ܓܳܠܶܙ.
24 ܕܛܳܠܶܡ ܐܰܓܪܳܐ ܕܰܐܓܺܝܪܳܐ: ܛܳܠܶܡ ܠܒܳܪܝܶܗ. ܘܗܽܘ ܡܩܰܒܶܠ ܦܬܘܪܥܳܢܳܐ ܒܺܝܫܳܐ.
25 ܚܰܕ ܒܳܢܶܐ: ܘܰܐ̱ܚܪܺܢܳܐ ܣܳܬܰܪ. ܡܳܢܳܐ ܐܰܗܢܺܝܘ: ܐܶܠܳܐ ܥܰܡܠܳܐ ܣܪܺܝܩܳܐ.
26 ܚܰܕ ܡܒܰܪܶܟ: ܘܰܐ̱ܚܪܺܢܳܐ ܡܠܰܝܶܛ. ܒܩܳܠܳܐ ܕܡܰܢ ܡܶܢ ܬܖ̈ܰܝܗܽܘܢ: ܢܶܫܡܰܥ ܐܰܠܳܗܳܐ.
27 ܕܣܳܚܶܐ ܡܶܢ ܡܺܝܬܳܐ: ܘܗܳܦܶܟ ܩܳܪܶܒ ܠܶܗ. ܡܳܢܳܐ ܐܰܗܢܺܝ: ܡܶܢ ܡܰܣܚܽܘܬܶܗ.
28 ܘܰܕܨܳܐܶܡ ܡܶܢ ܚܛܳܗܰܘ̈ܗܝ: ܘܗܳܦܶܟ ܥܳܒܶܕ ܠܗܽܘܢ. ܨܠܽܘܬܶܗ ܡܰܢܽܘ ܫܳܡܰܥ. ܐܰܘ ܡܳܢܳܐ ܐܰܗܢܺܝ ܕܨܳܡ.