Psalms 34
The Book of Psalms
܀ ܡܙܡܘܪܐ ܠܕ ܀
ܡ̈ܶܠܶܐ ܕܩܽܘܒܳܠܛܰܝܒܽܘܬܳܐ ܕܰܐܡܺܝܖ̈ܳܢ ܡܶܢ ܦܰܪܨܽܘܦ ܚܶܙܰܩܝܳܐ
1 ܐܶܒܰܪܶܟ ܠܡܳܪܝܳܐ ܒܟܽܠܙܒܰܢ. ܘܰܒܟܽܠܙܒܰܢ ܬܶܫܒ̈ܚܳܬܶܗ ܒܦܽܘܡܝ̱.
2 ܒܡܳܪܝܳܐ ܬܶܫܬܰܒܗܰܪ ܢܰܦܫܝ̱. ܢܶܫܡܥܽܘܢ ܡܶܣ̈ܟܺܢܶܐ ܘܢܶܚܕܽܘܢ.
3 ܐܰܘܪܶܒܘ ܥܰܡܝ̱ ܠܡܳܪܝܳܐ. ܘܰܢܪܺܝܡ ܫܡܶܗ ܐܰܟܚܕܳܐ.
4 ܒܥܺܝܬ ܡܶܢ ܡܳܪܝܳܐ ܘܰܥܢܳܢܝ̱. ܘܡܶܢ ܟܽܠܗܽܘܢ ܐܽܘ̈ܠܨܳܢܰܝ ܦܰܨܝܰܢܝ̱.
5 ܚܽܘܪܘ ܠܘܳܬܶܗ ܘܣܰܒܰܪܘ ܒܶܗ. ܘܰܐܦܰܝ̈ܟܽܘܢ ܠܳܐ ܢܰܚܦܖ̈ܳܢ.
6 ܗܳܢܳܐ ܡܶܣܟܺܢܳܐ ܕܰܩܪܳܝܗܝ̱ ܘܫܰܡܥܶܗ. ܘܡܶܢ ܟܽܠܗܽܘܢ ܐܽܘܠܨܳܢܰܘ̈ܗܝ̱ ܦܰܨܝܶܗ.
7 ܡܰܫܪܺܝܬܳܐ ܕܡܰܠܰܐܟܰܘ̈ܗܝ ܕܡܳܪܝܳܐ ܚܕܺܝܪܳܐ ܠܕܳܚܠܰܘ̈ܗܝ̱ ܘܰܡܦܰܨܶܐ ܠܗܽܘܢ.
8 ܛܥܰܡܘ ܘܰܚܙܰܘ ܕܛܳܒ ܗܽܘ ܡܳܪܝܳܐ. ܘܛܽܘܒܰܝܗܽܘܢ ܠܟܽܠ ܕܰܬܟܺܝܠܺܝܢ ܥܠܰܘܗ̱ܝ.
9 ܥܰܬܺܝܖ̈ܶܐ ܐܶܬܡܰܣܟܰܢܘ ܘܰܟܦܶܢܘ.
10 ܘܰܐܝܠܶܝܢ ܕܰܠܡܳܪܝܳܐ ܒܳܥܶܝܢ ܠܳܐ ܬܶܚܣܰܪ ܠܗܽܘܢ ܛܳܒܬܳܐ.
11 ܬܰܘ ܒܢܰܝ̈ܳܐ ܫܽܘܡܥܽܘܢܝ̱. ܘܰܐܠܶܦܟܽܘܢ ܕܶܚܠܬܶܗ ܕܰܐܠܳܗܳܐ.
12 ܐܰܝܢܰܘ ܓܰܒܪܳܐ ܕܨܳܒܶܐ ܚܰܝ̈ܶܐ. ܘܪܳܚܶܡ ܝܰܘ̈ܡܳܬܳܐ ܛܳܒ̈ܶܐ ܠܡܶܚܙܳܐ.
13 ܛܰܪ ܠܶܫܳܢܳܟ ܡܶܢ ܒܺܝܫܬܳܐ. ܘܣܶܦ̈ܘܳܬܳܟ ܠܳܐ ܢܡ̈ܰܠܠܳܢ ܢܶܟܠܳܐ.
14 ܥܒܰܪ ܡܶܢ ܒܺܝܫܬܳܐ ܘܰܥܒܶܕ ܛܳܒܬܳܐ. ܒܥܺܝ ܫܠܳܡܳܐ ܘܗܰܪܛ ܒܳܬܪܶܗ.
15 ܥܰܝ̈ܢܰܘܗ̱ܝ ܕܡܳܪܝܳܐ ܥܰܠ ܙܰܕܺܝ̈ܩܶܐ. ܘܶܐܕܢܰܘ̈ܗܝ ܠܡܶܫܡܰܥ ܐܶܢܽܘܢ.
16 ܐܰܦܰܘ̈ܗܝ ܕܡܳܪܝܳܐ ܥܰܠ ܒܺܝ̈ܫܳܐ. ܕܢܶܥܛܶܐ ܡܶܢ ܐܰܪܥܳܐ ܕܽܘܟܪܳܢܗܽܘܢ.
17 ܓܥܰܘ ܙܰܕܺܝ̈ܩܶܐ ܘܡܳܪܝܳܐ ܫܡܰܥ ܐܶܢܽܘܢ ܘܦܰܨܺܝ ܐܶܢܽܘܢ.
18 ܩܰܪܺܝܒ ܗܽܘ ܡܳܪܝܳܐ ܠܰܬܒܺܝܖ̈ܰܝ ܠܶܒܳܐ. ܘܰܠܡܰܟܺܝ̈ܟܰܝ ܪܽܘܚܳܐ ܦܳܪܶܩ.
19 ܣܰܓܺܝ̈ܐܳܢ ܒܺܝ̈ܫܳܬܶܗ ܕܙܰܕܺܝܩܳܐ. ܘܡܶܢ ܟܽܠܗܶܝܢ ܡܦܰܨܶܐ ܠܶܗ ܡܳܪܝܳܐ.
20 ܘܢܳܛܰܪ ܠܟܽܠܗܽܘܢ ܓܰܖ̈ܡܰܘܗ̱ܝ. ܕܚܰܕ ܡܶܢܗܽܘܢ ܠܳܐ ܢܶܬܬܒܰܪ.
21 ܩܳܛܠܳܐ ܠܖ̈ܰܫܺܝܥܶܐ ܒܺܝܫܬܳܐ. ܘܣܳܢܰܐܘ̈ܗܝ ܕܙܰܕܺܝܩܳܐ ܢܣܽܘܦܽܘܢ.
22 ܢܶܦܪܽܘܩ ܡܳܪܝܳܐ ܢܰܦ̈ܫܳܬܳܐ ܕܥܰܒܕܰܘ̈ܗܝ. ܘܠܳܐ ܢܶܬܚܰܝܒܽܘܢ ܟܽܠ ܕܰܡܣܰܒܪܺܝܢ ܒܶܗ.