Psalms 16
The Book of Psalms
܀ ܡܙܡܘܪܐ ܝܘ ܀
ܡܚܰܘܶܐ ܕܰܒܐܰܝܠܶܝܢ ܡ̈ܶܠܶܐ ܙܳܕܶܩ ܕܢܶܬܚܰܫܚܽܘܢ ܒܢܰܝ̈ ܝܺܣܪܳܐܶܝܠ ܚܠܳܦ ܦܽܘܪܩܳܢܗܽܘܢ
1 ܢܰܛܰܪܰܝܢܝ̱ ܐܰܠܳܗܳܐ ܡܶܛܽܠ ܕܰܥܠܰܝܟ ܐܶܬܬܰܟܠܶܬ.
2 ܘܶܐܡܪܶܬ ܠܡܳܪܝܳܐ ܕܡܳܪܝ̱ ܐܰܢ̱ܬ. ܘܛܳܒܬܝ̱ ܡܶܢ ܠܘܳܬܳܟ ܗܺܝ.
3 ܘܳܐܦ ܠܩܰܕܺܝ̈ܫܶܐ ܕܒܰܐܪܥܳܐ ܘܰܡܫܰܒ̈ܚܶܐ. ܕܟܽܠܶܗ ܨܶܒܝܳܢܝ̱ ܒܗܽܘܢ.
4 ܢܶܣܓܽܘܢ ܟܺܐܒܰܝ̈ܗܽܘܢ ܐ̱ܚܖ̈ܳܝܶܐ ܒܰܥܓܰܠ. ܕܠܳܐ ܐܶܢܰܩܶܐ ܢܽܘܩܳܝܗܽܘܢ ܡܶܢ ܕܡܳܐ. ܘܠܳܐ ܐܶܬܕܟܰܪ ܫܡܳܗܰܝ̈ܗܽܘܢ ܒܣܶܦ̈ܘܳܬܝ̱.
5 ܡܳܪܝܳܐ ܡܢܳܬܳܐ ܕܝܳܪܬܽܘܬܝ̱ ܘܰܕܟܳܣܝ̱. ܐܰܢ̱ܬ ܗ̣ܘ ܡܦܰܢܶܐ ܠܺܝ ܝܳܪܬܽܘܬܝ̱.
6 ܚܰܒ̈ܠܶܐ ܢܦܰܠܘ̱ ܠܺܝ ܒܛܰܖ̈ܩܶܐ. ܐܳܦ ܝܳܪܬܽܘܬܝ̱ ܫܶܦܪܰܬ ܠܺܝ.
7 ܐܶܒܰܪܶܟ ܠܡܳܪܝܳܐ ܕܡܰܠܟܰܢܝ̱. ܐܳܦ ܒܠܰܝ̈ܠܰܘܳܬܳܐ ܖ̈ܕܰܝܳܢܝ̱ ܟܽܘ̈ܠܝܳܬܝ̱.
8 ܣܳܡܶܬ ܠܡܳܪܝܳܐ ܠܽܘܩܒܰܠܝ̱ ܒܟܽܠܙܒܰܢ. ܘܰܗܘܳܐ ܡܶܢ ܝܰܡܺܝܢܝ̱ ܕܠܳܐ ܐܶܙܽܘܥ.
9 ܡܶܛܽܠ ܗܳܢܳܐ ܚܕܺܝ ܠܶܒܝ̱ ܘܕܳܨ ܐܺܝܩܳܪܝ̱. ܐܳܦ ܒܶܣܪܝ̱ ܢܶܫܪܶܐ ܒܫܶܠܝܳܐ.
10 ܡܶܛܽܠ ܕܠܳܐ ܫܒܰܩܬ ܠܢܰܦܫܝ̱ ܒܰܫܝܽܘܠ. ܘܠܳܐ ܝܰܗܒܬ ܠܚܰܣܝܳܟ ܕܢܶܚܙܳܐ ܚܒܳܠܳܐ.
11 ܬܚܰܘܶܝܢܝ ܐܽܘܪܚܳܟ ܕܚܰܝ̈ܶܐ. ܘܶܐܣܒܰܥ ܡܶܢ ܚܰܕܽܘܬܶܗ ܕܦܰܪܨܽܘܦܳܟ. ܘܡܶܢ ܒܰܣܺܝܡܽܘܬܳܐ ܕܙܳܟܽܘܬܳܐ ܕܝܰܡܺܝܢܳܟ.