Psalms 103
The Book of Psalms
܀ ܡܙܡܘܪܐ ܩܓ ܀
ܡܰܪܬܶܐ ܠܥܰܡ̱̈ܡܶܐ ܕܢܰܘܕܽܘܢ ܠܰܐܠܳܗܳܐ ܕܰܕܠܳܐ ܣܽܘܟܳܝ ܩܰܒܶܠܘ ܡܶܢܶܗ ܫܪܳܝܳܐ ܕܒܺܝ̈ܫܳܬܗܽܘܢ ܒܝܰܕ ܦܽܘܢܳܝܗܽܘܢ ܬܡܺܝܗܳܐ
1 ܒܰܪܶܟܝ̱ ܢܰܦܫܝ̱ ܠܡܳܪܝܳܐ. ܘܟܽܠܗܽܘܢ ܓܰܖ̈ܡܰܝ ܠܰܫܡܶܗ ܩܰܕܺܝܫܳܐ.
2 ܒܰܪܶܟܝ̱ ܢܰܦܫܝ̱ ܠܡܳܪܝܳܐ. ܘܠܳܐ ܬܶܛܥܶܝܢ ܟܽܠܗܽܘܢ ܦܽܘܖ̈ܥܳܢܰܘܗ̱ܝ.
3 ܕܫܳܒܶܩ ܠܶܟܝ ܟܽܠܶܗ ܥܰܘܠܶܟܝ̱. ܘܡܰܐܣܶܐ ܟܽܠܗܽܘܢ ܟܺܐܒܰܝ̈ܟܝ̱.
4 ܦܳܪܶܩ ܠܶܟܝ ܡܶܢ ܚܒܳܠܳܐ. ܡܣܰܡܶܟ ܠܶܟܝ ܒܛܰܝܒܽܘܬܳܐ ܘܰܒܖ̈ܰܚܡܶܐ.
5 ܡܣܰܒܰܥ ܒܛܳܒ̈ܳܬܳܐ ܓܽܘܫܡܶܟܝ̱. ܘܰܡܚܰܕܶܬ ܐܰܝܟ ܕܢܶܫܪܳܐ ܥܠܰܝܡܽܘܬܶܟܝ̱.
6 ܥܳܒܶܕ ܙܰܕܺܝܩܽܘܬܳܐ ܡܳܪܝܳܐ ܘܕܺܝܢܳܐ ܠܟܽܠܗܽܘܢ ܛܠܺܝ̈ܡܶܐ.
7 ܡܚܰܘܶܐ ܐܽܘܖ̈ܚܳܬܶܗ ܠܡܽܘܫܶܐ. ܘܠܰܒ̈ܢܰܝ ܝܺܣܪܳܐܶܝܠ ܥܒܳܕܰܘ̈ܗܝ̱.
8 ܡܪܰܚܡܳܢ ܗܽܘ ܘܰܡܪܰܚܦܳܢ ܡܳܪܝܳܐ. ܢܰܓܺܝܪܳܐ ܪܽܘܚܶܗ ܘܣܰܓܺܝܐܳܐ ܛܰܝܒܽܘܬܶܗ.
9 ܡܶܛܽܠ ܕܠܳܐ ܐܳܠܶܡ ܠܥܳܠܰܡ. ܘܠܳܐ ܠܥܳܠܰܡ ܢܳܛܰܪ ܪܽܘܓܙܶܗ.
10 ܡܶܛܽܠ ܕܠܳܐ ܗܘܳܐ ܐܰܝܟ ܚܛܳܗܰܝ̈ܢ ܥܒܰܕ ܠܰܢ. ܘܳܐܦܠܳܐ ܐܰܝܟ ܥܰܘܠܰܢ ܦܰܪܥܰܢ.
11 ܡܶܛܽܠ ܕܰܐܝܟ ܕܪܳܡܺܝܢ ܫܡܰܝ̈ܳܐ ܡܶܢ ܐܰܪܥܳܐ ܗܳܟܰܢܳܐ ܥܶܫܢܰܬ ܛܰܝܒܽܘܬܶܗ ܕܡܳܪܝܳܐ ܥܰܠ ܕܳܚܠܰܘ̈ܗܝ̱.
12 ܘܰܐܝܟ ܕܪܰܚܺܝܩܳܐ ܡܰܕܢܚܳܐ ܡܶܢ ܡܰܥܪܒܳܐ. ܗܳܟܰܢܳܐ ܢܶܪܚܰܩ ܡܶܢܰܢ ܥܰܘܠܰܢ.
13 ܘܰܐܝܟ ܕܰܡܪܰܚܶܡ ܐܰܒܳܐ ܥܰܠ ܒܢܰܝ̈ܳܐ. ܡܪܰܚܶܡ ܡܳܪܝܳܐ ܥܰܠ ܕܳܚܠܰܘ̈ܗܝ̱.
14 ܡܶܛܽܠ ܕܗܽܘ ܝܳܕܰܥ ܓܒܺܝܠܬܰܢ. ܘܶܐܬܕܟܰܪ ܕܥܰܦܪܳܐ ܚܢܰܢ.
15 ܒܰܪܢܳܫܳܐ ܐܰܝܟ ܥܡܺܝܪܳܐ ܝܰܘ̈ܡܰܘܗ̱ܝ. ܘܰܐܝܟ ܥܽܘܦܝܳܐ ܕܚܰܩܠܳܐ ܗܳܟܰܢܳܐ ܝܳܥܶܐ.
16 ܕܡܳܐ ܕܢܶܫܒܰܬ ܒܶܗ ܪܽܘܚܳܐ ܠܰܝܬܰܘܗ̱ܝ. ܘܳܐܦܠܳܐ ܡܶܬܝܰܕܥܳܐ ܕܽܘܟܬܶܗ.
17 ܛܰܝܒܽܘܬܶܗ ܕܡܳܪܝܳܐ ܡܶܢ ܥܳܠܰܡ ܗܺܝ ܘܰܥܕܰܡܳܐ ܠܥܳܠܰܡ ܥܰܠ ܕܳܚܠܰܘ̈ܗܝ̱ ܘܙܰܕܺܝܩܽܘܬܶܗ ܠܰܒ̈ܢܰܝ ܒܢܰܝ̈ܗܽܘܢ.
18 ܠܰܐܝܠܶܝܢ ܕܢܳܛܪܺܝܢ ܩܝܳܡܶܗ ܘܡܶܬܕܰܟܪܺܝܢ ܦܽܘܩ̈ܕܳܢܰܘܗ̱ܝ ܘܥܳܒܕܺܝܢ ܠܗܽܘܢ.
19 ܡܳܪܝܳܐ ܒܰܫܡܰܝܳܐ ܡܰܬܩܰܢ ܟܽܘܪܣܝܶܗ. ܘܡܰܠܟܽܘܬܶܗ ܒܟܽܠ ܫܰܠܺܝܛܳܐ.
20 ܒܰܪܶܟܘ̱ ܠܡܳܪܝܳܐ ܡܰܠܰܐܟܰܘ̈ܗܝ̱. ܕܰܡܨܶܝܢ ܒܚܰܝܠܳܐ ܘܥܳܒܕܺܝܢ ܦܽܘ̈ܩܕܳܢܰܘܗ̱ܝ.
21 ܒܰܪܶܟܘ̱ ܠܡܳܪܝܳܐ ܟܽܠܗܽܘܢ ܚܰܝܠܰܘ̈ܳܬܶܗ ܘܰܡܫܰܡ̈ܫܳܢܰܘܗ̱ܝ ܕܥܳܒܕܺܝܢ ܨܶܒܝܳܢܶܗ.
22 ܒܰܪܶܟܘ̱ ܠܡܳܪܝܳܐ ܟܽܠܗܽܘܢ ܥܒܳܕܰܘ̈ܗܝ̱ ܕܰܒܟܽܠܳܗ̇ ܐܰܪܥܳܐ ܫܽܘܠܛܳܢܶܗ. ܒܰܪܶܟܝ̱ ܢܰܦܫܝ̱ ܠܡܳܪܝܳܐ.