Psalms 21
The Book of Psalms
܀ ܡܙܡܘܪܐ ܟܐ ܀
ܡܒܰܕܶܩ ܥܰܠ ܚܶܙܰܩܝܳܐ ܡܶܢ ܒܳܬܰܪ ܕܶܐܬܦܰܨܺܝ ܡܶܢ ܐܳܬܽܘܪܳܝܳܐ
1 ܡܳܪܝܳܐ ܒܚܰܝܠܳܟ ܢܶܚܕܶܐ ܡܰܠܟܳܐ. ܘܰܒܦܽܘܪܩܳܢܳܟ ܢܕܽܘܨ ܪܰܘܪܒܳܐܺܝܬ.
2 ܪܶܓܬܳܐ ܕܠܶܒܶܗ ܝܰܗܒܬ ܠܶܗ. ܘܛܽܘܝܳܒܳܐ ܕܣܶܦ̈ܘܳܬܶܗ ܠܳܐ ܟܠܰܝܬܳܝܗܝ̱.
3 ܡܶܛܽܠ ܕܩܰܕܶܡܬܳܝܗܝ̱ ܒܽܘܪܟܬܳܐ ܛܳܒܬܳܐ. ܘܣܳܡܬ ܒܪܺܝܫܶܗ ܟܠܺܝܠܳܐ ܡܫܰܒܚܳܐ.
4 ܚܰܝ̈ܶܐ ܫܰܐܠܳܟ ܘܝܰܗܒܬ ܠܶܗ. ܢܽܘܓܪܳܐ ܕܝܰܘ̈ܡܳܬܳܐ ܠܥܳܠܰܡ ܥܳܠܡܺܝܢ.
5 ܝܺܪܶܒ ܫܽܘܒܚܶܗ ܒܦܽܘܪܩܳܢܳܟ. ܫܽܘܒܚܳܐ ܘܙܺܝܘܳܐ ܣܳܡܬ ܥܠܰܘܗ̱ܝ.
6 ܡܶܛܽܠ ܕܰܥܒܰܕܬܳܝܗܝ̱ ܒܽܘܪܟܬܳܐ ܠܥܳܠܰܡ ܥܳܠܡܺܝܢ. ܘܚܰܕܺܝܬܳܝܗܝ̱ ܒܚܰܕܽܘܬܶܗ ܕܦܰܪܨܽܘܦܳܟ.
7 ܡܶܛܽܠ ܕܡܰܠܟܳܐ ܡܣܰܒܰܪ ܒܡܳܪܝܳܐ. ܒܛܰܝܒܽܘܬܶܗ ܕܰܡܪܰܝܡܳܐ ܠܳܐ ܢܶܬܬܙܺܝܥ.
8 ܬܶܫܟܰܚ ܐܺܝܕܳܟ ܠܟܽܠܗܽܘܢ ܒܥܶܠܕ̈ܒܳܒܰܝܟ. ܘܝܰܡܺܝܢܳܟ ܬܶܫܟܰܚ ܠܣܳܢܰܐܝ̈ܟ.
9 ܬܶܥܒܶܕ ܐܶܢܽܘܢ ܐܰܝܟ ܬܰܢܽܘܪܳܐ ܕܢܽܘܪܳܐ ܠܙܰܒܢܳܐ ܕܪܽܘܓܙܳܐ. ܡܳܪܝܳܐ ܒܪܽܘܓܙܶܗ ܢܰܘܩܶܕ ܐܶܢܽܘܢ. ܘܬܶܐܟܽܘܠ ܐܶܢܽܘܢ ܢܽܘܪܳܐ.
10 ܘܦܺܐܖ̈ܰܝܗܽܘܢ ܡܶܢ ܐܰܪܥܳܐ ܬܰܘܒܶܕ. ܘܙܰܪܥܗܽܘܢ ܡܶܢ ܒܢܰܝ̈ܢܳܫܳܐ.
11 ܡܶܛܽܠ ܕܰܨܠܰܘ ܥܠܰܝܟ ܒܺܝܫܬܳܐ. ܘܶܐܬܚܰܫܰܒܘ ܬܰܪܥܺܝܬܳܐ ܘܠܳܐ ܐܶܬܡܨܺܝܘ ܚܰܝܠܳܐ.
12 ܬܣܺܝܡ ܒܗܽܘܢ ܟܽܘܬܡܳܐ. ܘܛܽܘܝܳܒܳܟ ܬܰܬܩܶܢ ܥܰܠ ܦܰܖ̈ܨܽܘܦܰܝܗܽܘܢ.
13 ܐܶܬܬܪܺܝܡ ܡܳܪܝܳܐ ܒܥܽܘܫܢܳܟ ܢܶܙܡܰܪ ܘܰܢܫܰܒܰܚ ܓܰܢ̱ܒܳܪܽܘܬܳܟ.