Psalms 31
The Book of Psalms
܀ ܡܙܡܘܪܐ ܠܐ ܀
ܥܰܠ ܬܰܟܫܶܦܬܶܗ ܕܥܰܡܳܐ ܘܦܽܘܢܳܝܶܗ ܕܡܶܢ ܒܳܒܶܠ
1 ܒܳܟ ܡܳܪܝܳܐ ܣܰܒܪܶܬ ܠܳܐ ܐܶܒܗܰܬ ܠܥܳܠܰܡ. ܘܰܒܙܰܕܺܝܩܽܘܬܳܟ ܦܠܶܛܰܝܢܝ̱.
2 ܨܠܺܝ ܠܘܳܬܝ̱ ܐܶܕܢܳܟ ܘܒܰܥܓܰܠ ܥܢܺܝܢܝ̱. ܗܘܺܝ ܠܺܝ ܐܰܠܳܗܳܐ ܡܥܰܕܪܳܢܳܐ ܘܒܶܝܬ ܓܰܘܣܳܐ ܘܰܦܪܽܘܩܰܝܢܝ̱.
3 ܡܶܛܽܠ ܕܥܽܘܫܢܝ̱ ܘܒܶܝܬ ܓܰܘܣܝ̱ ܐܰܢ̱ܬ ܗܽܘ. ܡܶܛܽܠ ܫܡܳܟ ܡܳܪܝܳܐ ܒܰܝܰܐܰܝܢܝ̱.
4 ܘܰܐܦܶܩܰܝܢܝ̱ ܡܶܢ ܡܨܺܝܕܬܳܐ ܗܳܕܶܐ ܕܰܛܡܰܪܘ ܠܺܝ. ܡܶܛܽܠ ܕܰܐܢ̱ܬ ܗܽܘ ܡܣܰܝܥܳܢܝ̱ ܘܠܳܟ ܐܰܛܪܶܬ ܪܽܘܚܝ̱.
5 ܘܰܦܪܰܩܬܳܢܝ̱ ܡܳܪܝܳܐ ܐܰܠܳܗܳܐ ܕܩܽܘܫܬܳܐ.
6 ܣܢܰܝܬ ܠܰܐܝܠܶܝܢ ܕܢܳܛܪܺܝܢ ܕܶܚ̈ܠܳܬܳܐ ܣܖ̈ܺܝܩܳܬܳܐ. ܘܶܐܢܳܐ ܒܳܟ ܡܳܪܝܳܐ ܣܰܒܪܶܬ.
7 ܐܶܕܽܘܨ ܘܶܐܚܕܶܐ ܒܛܰܝܒܽܘܬܳܟ. ܕܰܚܙܰܝܬ ܒܡܽܘܟܳܟܝ̱ ܘܺܝܕܰܥܬ ܒܽܐܘܠܨܳܢܳܗ̇ ܕܢܰܦܫܝ̱.
8 ܘܠܳܐ ܐܰܫܠܶܡܬܳܢܝ̱ ܒܺܐܝܕܳܐ ܕܰܒܥܶܠܕ̈ܒܳܒܰܝ. ܐܰܩܺܝܡܬ ܒܰܪܘܰܚܬܳܐ ܖ̈ܶܓܠܰܝ.
9 ܪܰܚܶܡ ܥܠܰܝ ܡܳܪܝܳܐ ܡܶܛܽܠ ܕܥܳܩܰܬ ܠܺܝ. ܐܶܬܕܰܠܚܰܬ ܥܰܝܢܝ̱ ܒܪܽܘܓܙܳܐ ܢܰܦܫܝ̱ ܘܟܰܪܣܝ̱.
10 ܡܶܛܽܠ ܕܰܓܡܰܪܘ ܚܰܝܰܝ̈ ܒܕܽܘܘܳܢܳܐ. ܘܰܫܢܰܝ̈ ܒܬܶܢ̈ܚܳܬܳܐ. ܐܶܬܟܪܰܗ ܚܰܝܠܝ̱ ܒܡܶܣܟܺܢܽܘܬܳܐ. ܘܶܐܬܕܰܠܰܚܘ ܓܰܖ̈ܡܰܝ ܡܶܢ ܟܽܠܗܽܘܢ ܒܥܶܠܕ̈ܒܳܒܰܝ.
11 ܘܰܗܘܺܝܬ ܚܶܣܕܳܐ ܠܰܫ̈ܒܳܒܰܝ. ܘܕܶܚܠܬܳܐ ܠܰܐܝܠܶܝܢ ܕܝܳܕܥܺܝܢ ܠܺܝ. ܘܰܐܝܠܶܝܢ ܕܚܳܙܶܝܢ ܗ̱ܘܰܘ ܠܺܝ ܒܫܽܘܩܳܐ ܢܳܕܺܝܢ ܗ̱ܘܰܘ ܡܶܢܝ̱.
12 ܐܶܬܛܥܺܝܬ ܐܰܝܟ ܡܺܝܬܳܐ ܡܶܢ ܠܶܒܳܐ. ܘܰܗܘܺܝܬ ܐܰܝܟ ܡܳܐܢܳܐ ܐܰܒܺܝܕܳܐ.
13 ܡܶܛܽܠ ܕܫܶܡܥܶܬ ܪܶܢܝܳܐ ܕܣܰܓܺܝ̈ܐܶܐ. ܟܰܕ ܐܶܬܡܰܠܰܟܘ ܥܠܰܝ ܐܰܟܚܕܳܐ. ܘܶܐܬܚܰܫܰܒܘ ܕܢܶܣܒܽܘܢ ܠܢܰܦܫܝ̱.
14 ܐܶܢܳܐ ܕܶܝܢ ܥܠܰܝܟ ܡܳܪܝܳܐ ܐܶܬܬܰܟܠܶܬ. ܘܶܐܡܪܶܬ ܕܰܐܠܳܗܝ ܐܰܢ̱ܬ ܡܳܪܝܳܐ.
15 ܘܒܺܐܝ̈ܕܰܝܟ ܐܶܢܽܘܢ ܙܰܒ̈ܢܶܐ. ܦܪܽܘܩܰܝܢܝ̱ ܡܶܢ ܒܥܶܠܕ̈ܒܳܒܰܝ ܘܡܶܢ ܐܰܝܠܶܝܢ ܕܪܳܕܦܺܝܢ ܠܺܝ.
16 ܐܰܢܗܰܪ ܐܰܦܰܝ̈ܟ ܥܰܠ ܥܰܒܕܳܟ ܘܰܦܪܽܘܩܰܝܢܝ̱ ܒܛܰܝܒܽܘܬܳܟ.
17 ܡܳܪܝܳܐ ܠܳܐ ܐܶܒܗܰܬ ܕܰܩܪܺܝܬܳܟ. ܢܶܒܗܬܽܘܢ ܖ̈ܰܫܺܝܥܶܐ ܘܢܶܚܬܽܘܢ ܠܰܫܝܽܘܠ.
18 ܘܢܶܣܬܰܟܖ̈ܳܢ ܣܶܦ̈ܘܳܬܗܽܘܢ ܕܥܰܘ̈ܳܠܶܐ. ܕܰܡܡܰܠܠܺܝܢ ܥܰܠ ܙܰܕܺܝܩܳܐ ܫܽܘܩܪܳܐ ܘܫܳܛܝܽܘܬܳܐ.
19 ܡܳܐ ܣܰܓܺܝܐܳܐ ܛܰܝܒܽܘܬܳܟ ܕܢܳܛܰܪ ܐܰܢ̱ܬ ܠܕܳܚ̈ܠܰܝܟ. ܠܕܰܡܣܰܒܪܺܝܢ ܒܳܟ ܩܕܳܡ ܒܢܰܝ̈ܢܳܫܳܐ.
20 ܬܟܰܣܶܐ ܐܶܢܽܘܢ ܒܣܶܬܳܪܶܗ ܕܦܰܪܨܽܘܦܳܟ ܡܶܢ ܕܠܽܘܚܝܳܐ ܕܰܒܢܰܝ̈ܢܳܫܳܐ. ܬܟܰܣܶܐ ܐܶܢܽܘܢ ܒܛܶܠܳܠܳܟ ܡܶܢ ܚܶܪܝܳܢܳܐ.
21 ܒܪܺܝܟ ܗܽܘ ܡܳܪܝܳܐ ܕܰܓܒܳܐ ܠܶܗ ܓܒܰܝ̈ܳܐ ܒܰܩܪܺܝܬܳܐ ܥܰܫܺܝܢܬܳܐ.
22 ܐܶܢܳܐ ܐܶܡܪܶܬ ܒܰܡܣܰܪܗܒܽܘܬܝ̱ ܕܶܐܒܕܶܬ ܡܶܢ ܩܕܳܡ ܥܰܝ̈ܢܰܝܟ. ܘܰܫܡܰܥܬ ܩܳܠܳܐ ܕܒܳܥܽܘܬܝ̱ ܟܰܕ ܩܪܺܝܬܳܟ.
23 ܪܚܰܡܘ ܠܡܳܪܝܳܐ ܙܰܕܺܝܩܰܘ̈ܗܝ̱. ܠܰܡܗܰܝܡ̈ܢܶܐ ܢܳܛܰܪ ܡܳܪܝܳܐ ܘܦܳܪܰܥ ܠܥܰܘ̈ܳܠܶܐ ܥܒܳܕܰܝ̈ܗܽܘܢ.
24 ܐܶܬܚܰܝܰܠܘ ܘܢܶܬܥܰܫܰܢ ܠܶܒܟܽܘܢ. ܟܽܠ ܕܰܡܣܰܒܪܺܝܢ ܒܡܳܪܝܳܐ.