peshitta bible

2 Chronicles 3

The second Book of Chronicles

← Go back to OT index

܀ ܒ ܕܘܒܪ ܝܘܡ̈ܬܐ ܓ ܀

1 ܘܫܰܪܺܝ ܫܠܶܝܡܽܘܢ ܠܡܶܒܢܳܐ ܒܰܝܬܳܐ ܕܡܳܪܝܳܐ ܒܽܐܘܪܺܫܠܶܡ. ܒܛܽܘܪܳܐ ܕܳܐܡܽܘܖ̈ܳܝܶܐ. ܒܕܽܘܟܬܳܐ ܕܰܐܬܩܶܢ ܕܰܘܺܝܕ ܐܰܒܽܘܗܝ ܒܶܐܕܪܳܐ ܕܰܙܒܰܢ ܡܶܢ ܐܳܪܳܢ ܝܳܒܽܘܣܳܝܳܐ.
2 ܘܫܰܪܺܝ ܠܡܶܒܢܳܐ ܒܶܗ ܒܒܶܢܝܳܢܳܐ. ܒܝܰܪܚܳܐ ܬܶܢܝܳܢܳܐ. ܒܰܫܢܰܬ ܐܰܪܒܰܥ ܠܡܰܠܟܽܘܬܶܗ.
3 ܘܗܳܠܶܝܢ ܡܽܘܫ̈ܚܳܬܳܐ ܕܰܡܫܰܚ ܫܠܶܝܡܽܘܢ ܠܡܶܒܢܳܐ ܒܰܝܬܳܐ ܕܡܳܪܝܳܐ ܐܽܘܪܟܶܗ ܕܒܰܝܬܳܐ ܫܬܺܝܢ ܐܰܡܺܝ̈ܢ ܒܰܡܫܽܘܚܬܳܐ ܕܩܽܘܕܫܳܐ. ܘܪܰܘܡܶܗ ܬܠܳܬܺܝܢ ܐܰܡܺܝ̈ܢ. ܘܰܦܬܳܝܶܗ ܥܶܣܪܺܝܢ ܐܰܡܺܝ̈ܢ.
4 ܘܶܐܣܛܘܳܐ ܥܒܰܕ ܥܰܠ ܐܰܦܰܘ̈ܗܝ ܐܽܘܪܟܶܗ ܥܰܠ ܐܰܦܰܝ̈ ܦܬܳܝܶܗ ܕܒܰܝܬܳܐ. ܐܰܡܺܝ̈ܢ ܥܶܣܪܺܝܢ. ܘܪܰܘܡܶܗ ܥܶܣܪܺܝܢ ܐܰܡܺܝ̈ܢ ܘܩܰܪܡܶܗ ܡܶܢ ܠܓܰܘ ܕܰܗܒܳܐ ܕܰܟܝܳܐ.
5 ܘܒܰܝܬܳܐ ܪܰܒܳܐ. ܛܰܠܶܠ ܒܩܰܝ̈ܣܶܐ ܕܩܳܛܽܖ̈ܩܶܐ. ܘܩܰܪܡܶܗ ܠܰܫܡܰܝ̈ ܒܰܝܬܳܐ ܕܰܗܒܳܐ ܛܳܒܳܐ. ܘܨܳܪ ܥܠܰܘܗܝ ܕܡܽܘܬܳܐ ܕܕܶܩ̈ܠܶܐ ܘܰܕܫܽܘܫܰܢ̈ܶܐ.
6 ܘܰܩܒܰܥ ܒܶܗ ܒܒܰܝܬܳܐ. ܛܰܒ̈ܥܶܐ ܛܳܒ̈ܶܐ ܠܬܶܫܒܽܘܚܬܳܐ. ܘܩܰܪܡܶܗ ܠܟܽܠܶܗ ܕܰܗܒܳܐ ܛܳܒܳܐ.
7 ܘܩܰܪܡܶܗ ܠܒܰܝܬܳܐ ܡܶܢ ܐܰܦܰܘ̈ܗܝ ܕܶܐܣܛܘܳܐ. ܐܶܣܰܘ̈ܗܝ ܘܰܦܖ̈ܽܘܣܬܕܰܘܗܝ ܕܰܗܒܳܐ ܛܳܒܳܐ. ܘܨܳܪ ܥܠܰܘܗܝ ܕܡܽܘܬܳܐ ܕܕܶܩ̈ܠܶܐ ܘܰܕܫܽܘܫܰܢ̈ܶܐ.
8 ܘܰܥܒܰܕ ܒܶܝܬ ܩܕܽܘܫ ܩܽܘܕ̈ܫܶܐ. ܐܽܘܪܟܶܗ ܥܰܠ ܐܰܦܰܝ̈ ܦܬܳܝܶܗ ܕܒܰܝܬܳܐ. ܐܰܡܺܝ̈ܢ ܥܶܣܪܺܝܢ. ܘܰܦܬܳܝܶܗ ܐܰܡܺܝ̈ܢ ܥܶܣܪܺܝܢ. ܘܩܰܪܡܶܗ ܕܰܗܒܳܐ ܛܳܒܳܐ. ܡܶܢ ܫܶܬܡܳܐܐ ܟܰܟܖ̈ܺܝܢ. ܘܳܐܦ ܠܡܰܕܒܚܳܐ ܩܪܰܡ ܕܰܗܒܳܐ.
9 (ܠܝܬ)
10 ܘܰܥܒܰܕ ܒܒܶܝܬ ܩܽܘܕܫܳܐ ܟܖ̈ܽܘܒܶܐ ܬܪܶܝܢ. ܥܒܳܕܳܐ ܡܫܰܪܪܳܐ. ܘܰܩܪܰܡ ܐܶܢܽܘܢ ܕܰܗܒܳܐ.
11 ܘܟܶܢ̈ܦܶܐ ܕܰܟܖ̈ܽܘܒܶܐ ܐܽܘܪܟܗܶܝܢ ܐܰܡ̈ܶܐ ܥܶܣܪܺܝܢ ܟܶܢܦܳܐ ܚܕܳܐ. ܐܰܡ̈ܶܐ ܚܰܡܶܫ. ܢܳܩܦܳܐ ܠܶܐܣܬܶܗ ܕܒܰܝܬܳܐ ܘܟܶܢܦܳܐ ܐ̱ܚܪܺܬܳܐ. ܐܰܡ̈ܶܐ ܚܰܡܶܫ. ܢܳܩܦܳܐ ܠܟܶܢܦܶܗ ܕܰܟܪܽܘܒܳܐ ܐ̱ܚܪܺܢܳܐ.
12 ܘܟܶܢܦܳܐ ܕܰܟܪܽܘܒܳܐ ܐ̱ܚܪܺܢܳܐ ܐܰܡ̈ܶܐ ܚܰܡܶܫ. ܢܳܩܦܳܐ ܠܶܐܣܬܶܗ ܕܒܰܝܬܳܐ. ܘܟܶܢܦܳܐ ܐ̱ܚܪܺܬܳܐ ܐܰܡ̈ܶܐ ܚܰܡܶܫ. ܘܕܰܒܺܝܩܳܐ ܠܟܶܢܦܶܗ ܕܰܟܪܽܘܒܳܐ ܐ̱ܚܪܺܢܳܐ.
13 ܟܶܢܦܰܝ̈ܗܽܘܢ ܕܰܟܖ̈ܽܘܒܶܐ ܗܳܠܶܝܢ. ܦܖ̈ܺܝܣܳܢ ܐܰܡ̈ܶܐ ܥܶܣܪܺܝܢ. ܘܗܶܢܽܘܢ ܩܳܝܡܺܝܢ ܥܰܠ ܖ̈ܶܓܠܰܝܗܽܘܢ. ܘܰܐܦܰܝ̈ܗܽܘܢ ܠܓܰܘ.
14 ܘܰܥܒܰܕ ܦܪܽܘܟܬܳܐ. ܬܶܟܠܬܳܐ. ܘܰܐܪܓܘܳܢܳܐ. ܘܰܙܚܽܘܪܺܝܬܳܐ ܘܒܽܘܨܳܐ. ܘܰܐܣܶܩ ܥܠܶܝܗ̇ ܟܖ̈ܽܘܒܶܐ. ܘܣܳܡ ܒܓܰܘܳܗ̇ ܩܺܐܒܽܘܬܳܐ.
15 ܘܰܥܒܰܕ ܩܕܳܡܰܘܗܝ ܕܒܰܝܬܳܐ ܪܰܒܳܐ ܐܶܣܛܽܘܢ̈ܶܐ ܬܪܶܝܢ. ܐܽܘܪܟܗܽܘܢ ܐܰܡܺܝ̈ܢ ܬܡܳܢܰܥܶܣܖ̈ܶܐ. ܘܚ̈ܶܬܶܐ ܕܥܰܠ ܖ̈ܺܝܫܰܝܗܽܘܢ. ܚܰܡܶܫ ܐܰܡܺܝ̈ܢ ܪܰܘܡܗܶܝܢ.
16 ܘܰܥܒܰܕ ܫܺܫ̈ܠܳܬܳܐ. ܐܰܡ̈ܶܐ ܚܰܡܫܺܝܢ. ܘܝܰܗܒ ܥܰܠ ܪܺܝܫܳܐ ܕܶܐܣܛܽܘܢ̈ܶܐ. ܘܰܥܒܰܕ ܖ̈ܽܘܡܳܢܶܐ. ܡܳܐܐ. ܘܰܩܛܰܪ ܒܗܶܝܢ ܒܫܺܫ̈ܠܳܬܳܐ.
17 ܘܰܐܩܺܝܡ ܐܶܣܛܽܘܢ̈ܶܐ ܬܪܶܝܢ ܩܕܳܡ ܗܰܝܟܠܳܐ. ܚܰܕ ܡܶܢ ܝܰܡܺܝܢܳܐ. ܘܚܰܕ ܡܶܢ ܣܶܡܳܠܳܐ. ܘܰܩܪܳܐ ܫܡܶܗ ܕܗܰܘ ܕܰܐܩܺܝܡ ܡܶܢ ܝܰܡܺܝܢܳܐ. ܝܳܟܺܝܢ. ܘܰܫܡܶܗ ܕܗܰܘ ܕܡܶܢ ܣܶܡܳܠܳܐ. ܒܳܥܳܙ.