2 Chronicles 21
The second Book of Chronicles
܀ ܒ ܕܘܒܪ ܝܘܡ̈ܬܐ ܟܐ ܀
1 ܘܰܫܟܶܒ ܝܳܗܽܘܫܳܦܳܛ ܥܰܡ ܐܰܒܳܗ̈ܳܬܶܗ. ܘܶܐܬܩܒܰܪ ܠܘܳܬ ܐܰܒܳܗ̈ܳܬܶܗ ܒܰܩܪܺܝܬܳܐ ܕܕܰܘܺܝܕ. ܘܩܳܡ ܒܡܰܠܟܽܘܬܳܐ ܝܳܗܽܘܪܳܡ ܒܪܶܗ ܒܳܬܪܶܗ.
2 ܘܠܶܗ ܐܺܝܬ ܗܘܳܐ ܐܰܚ̈ܶܐ ܒܢܰܝ̈ ܝܳܗܽܘܫܳܦܳܛ ܘܗܳܠܶܝܢ ܫܡܳܗܰܝ̈ܗܽܘܢ. ܥܰܙܰܪܝܳܐ. ܢܰܚܝܳܐܶܝܠ. ܙܟܰܪܝܳܐ ܥܰܙܰܪܝܳܐ. ܡܰܠܟܳܐܝܠ. ܫܦܰܛܝܳܐ. ܗܳܠܶܝܢ ܟܽܠܗܽܘܢ ܒܢܰܘ̈ܗܝ ܕܝܳܗܽܘܫܳܦܳܛ ܡܰܠܟܳܐ ܕܺܝܗܽܘܕܳܐ.
3 ܘܝܰܗܒ ܠܗܽܘܢ ܐܰܒܽܘܗܽܘܢ ܡܰܘ̈ܗܒܳܬܳܐ ܣܰܓܺܝ. ܟܶܣܦܳܐ ܘܕܰܗܒܳܐ. ܘܡܰܘ̈ܗܒܳܬܳܐ ܣܰܓܺܝ̈ܐܳܬܳܐ. ܘܩܽܘܖ̈ܝܳܐ ܥܰܫܺܝ̈ܢܳܬܳܐ ܕܺܝܗܽܘܕܳܐ ܘܡܰܠܟܽܘܬܳܐ ܐܶܬܝܰܗܒܰܬ ܠܝܳܗܽܘܪܳܡ ܡܶܛܽܠ ܕܗܽܘܝܽܘ ܗܘܳܐ ܒܪܶܗ ܩܰܫܺܝܫܳܐ.
4 ܘܩܳܡ ܝܳܗܽܘܪܳܡ ܥܰܠ ܡܰܠܟܽܘܬܳܐ ܕܰܐܒܽܘܗܝ. ܘܶܐܬܓܰܢ̱ܒܰܪ. ܘܩܰܛܶܠ ܠܟܽܠܗܽܘܢ ܐܰܚܰܘ̈ܗܝ ܒܰܩܪܳܒܳܐ. ܘܳܐܦ ܡܶܢ ܩܰܫܺܝ̈ܫܶܐ ܕܺܝܣܪܳܐܶܝܠ ܩܰܛܶܠ.
5 ܘܒܰܪ ܬܠܳܬܺܝܢ ܗܘܳܐ ܘܬܰܪܬܶܝܢ ܫܢܺܝ̈ܢ. ܟܰܕ ܩܳܡ ܒܡܰܠܟܽܘܬܳܐ. ܘܰܬܡܳܢܶܐ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ.
6 ܘܗܰܠܶܟ ܒܽܐܘܖ̈ܚܳܬܳܐ ܕܡܰܠ̈ܟܶܐ ܕܺܝܣܪܳܐܶܝܠ. ܐܰܝܟܰܢܳܐ ܕܰܥܒܰܕܘ ܕܒܶܝܬ ܐܳܚܳܒ ܡܶܛܽܠ ܕܚܳܬܶܗ ܕܳܐܚܳܒ ܗܘܳܬ ܠܶܗ ܐܰܢܬܬܳܐ ܘܰܥܒܰܕ ܕܒܺܝܫ ܩܕܳܡ ܡܳܪܝܳܐ.
7 ܘܠܳܐ ܨܒܳܐ ܡܳܪܝܳܐ ܠܰܡܚܰܒܳܠܽܘ ܒܰܝܬܶܗ ܕܕܰܘܺܝܕ. ܡܶܛܽܠ ܡܰܘܡܳܬܳܐ ܕܺܝܡܳܐ ܠܕܰܘܺܝܕ. ܠܡܶܬܰܠ ܠܶܗ ܫܪܳܓܳܐ ܢܰܗܺܝܪܳܐ. ܘܠܰܒܢܰܘ̈ܗܝ ܟܽܠܗܽܘܢ ܝܰܘ̈ܡܳܬܳܐ.
8 ܒܝܰܘ̈ܡܳܬܶܗ ܡܪܰܕܘ ܐܰܕܽܘܡܳܝ̈ܶܐ. ܡܶܢ ܬܚܶܝܬ ܐܺܝܕܳܐ ܕܺܝܗܽܘܕܳܐ. ܘܰܐܩܺܝܡܘ ܥܠܰܝܗܽܘܢ ܡܰܠܟܳܐ.
9 ܘܰܥܒܰܪ ܝܳܗܽܘܪܳܡ ܥܰܡ ܪܰܘܖ̈ܒܳܢܰܘ̈ܗܝ. ܘܟܽܠܗܽܘܢ ܙܰܘܓܰܘ̈ܗܝ ܥܰܡܶܗ. ܘܰܗܘܳܐ ܕܟܰܕ ܩܳܡ ܒܠܺܠܝܳܐ. ܚܪܰܒ ܠܰܐܕܽܘܡܝ̈ܶܐ. ܘܶܐܬܰܘ ܠܘܳܬܶܗ ܪܰܘܖ̈ܒܳܢܶܐ ܕܙܰܘ̈ܓܶܐ.
10 ܘܰܡܪܰܕܘ ܐܰܕܽܘܡܳܝ̈ܶܐ ܡܶܢ ܬܚܶܝܬ ܐܺܝܕܳܐ ܕܺܝܗܽܘܕܳܐ ܥܕܰܡܳܐ ܠܝܰܘܡܳܢܳܐ ܗܳܝܕܶܝܢ ܡܪܰܕܘ ܐܰܕܽܘܡܝ̈ܶܐ ܕܝܳܬܒܺܝܢ ܒܠܶܒܢܳܐ. ܒܙܰܒܢܳܐ ܗܰܘ ܡܶܢ ܬܚܶܝܬ ܐܺܝܕܶܗ. ܡܶܛܽܠ ܕܰܫܒܰܩ ܠܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܶܗ.
11 ܘܳܐܦ ܗܽܘ ܥܒܰܕ ܥܠܰܘ̈ܳܬܳܐ ܒܛܽܘܪܳܐ ܕܺܝܗܽܘܕܳܐ. ܘܚܰܡܪܳܐ ܐܰܫܩܺܝ ܠܰܢܙܺܝܖ̈ܶܝܗ̇ ܕܽܐܘܪܺܫܠܶܡ ܘܒܰܕܰܪ ܠܰܕܒܶܝܬ ܝܺܗܽܘܕܳܐ.
12 ܘܰܐܝܬܺܝ ܠܘܳܬܶܗ ܡܶܢ ܦܶܬܓܳܡ̈ܶܐ ܕܺܐܠܺܝܳܐ ܢܒܺܝܳܐ. ܕܶܐܡܰܪ ܠܶܗ. ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܶܗ ܕܕܰܘܺܝܕ ܐܰܒܽܘܟ. ܚܠܳܦ ܕܠܳܐ ܗܰܠܶܟܬ ܒܽܐܘܖ̈ܚܳܬܶܗ ܕܝܳܗܽܘܫܳܦܳܛ ܐܰܒܽܘܟ. ܘܒܽܐܘܖ̈ܚܳܬܶܗ ܕܳܐܣܳܐ ܡܰܠܟܳܐ ܕܺܝܗܽܘܕܳܐ.
13 ܘܗܰܠܶܟܬ ܠܳܟ ܒܽܐܘܖ̈ܚܳܬܳܐ ܕܡܰܠ̈ܟܶܐ ܕܺܝܣܪܳܐܶܝܠ. ܘܰܐܛܥܺܝܬ ܠܺܝܗܽܘܕܳܐ ܘܰܠܥܳܡܽܘܖ̈ܶܝܗ̇ ܕܽܐܘܪܺܫܠܶܡ. ܒܙܳܢܝܽܘܬܳܐ ܕܒܶܝܬ ܐܳܚܳܒ ܘܳܐܦ ܠܰܐܚܰܝ̈ܟ ܒܢܰܝ̈ ܐܰܒܽܘܟ ܕܛܳܒܺܝܢ ܡܶܢܳܟ ܩܰܛܶܠܬ.
14 ܗܳܐ ܡܳܪܝܳܐ ܡܳܚܶܐ ܠܳܟ ܡܚܽܘܬܳܐ ܪܰܒܬܳܐ. ܘܰܠܥܰܡܳܟ. ܘܠܰܒܢܰܝ̈ܟ ܘܢܶܫܰܝ̈ܟ. ܘܰܠܟܽܠܗܽܘܢ ܢܶܟܣܰܝ̈ܟ.
15 ܘܰܐܢ̱ܬ ܒܟܽܘܪܗܳܢܳܐ ܣܰܓܺܝܐܳܐ ܬܡܽܘܬ. ܘܰܒܬܰܫܢܺܝܩܳܐ ܪܰܒܳܐ ܬܺܐܒܰܕ. ܥܕܰܡܳܐ ܠܰܐܝܟܳܐ ܕܢܶܦܩܽܘܢ ܡܥܰܝ̈ܟ ܡܶܢ ܟܽܘܪܗܳܢܳܟ ܘܰܫܢܺܝ̈ܢ ܣܰܓܺܝ̈ܐܳܢ ܒܬܰܫܢܺܝܩܳܐ ܬܶܦܶܠ.
16 ܘܰܢܥܺܝܪ ܡܳܪܝܳܐ ܥܰܠ ܝܳܗܽܘܪܳܡ ܪܽܘܚܳܐ ܕܰܦܠܶܫܬܳܝ̈ܶܐ. ܘܰܕܥܰܖ̈ܒܳܝܶܐ ܕܰܫܪܶܝܢ ܒܶܝܬ ܗܶܢ̈ܕܘܳܝܶܐ.
17 ܘܢܶܣܩܽܘܢ ܥܰܠ ܝܺܗܽܘܕܳܐ. ܘܢܶܚܪܒܽܘܢ ܐܶܢܽܘܢ. ܘܢܰܗܦܟܽܘܢ ܟܽܠܳܗ̇ ܫܒܺܝܬܳܐ ܕܶܐܫܬܰܟܚܰܬ ܠܒܶܝܬ ܡܰܠܟܳܐ. ܘܳܐܦ ܒܢܰܘ̈ܗܝ ܘܢܶܫܰܘ̈ܗܝ ܘܠܳܐ ܢܶܫܬܒܶܩ ܠܶܗ ܒܪܳܐ ܕܶܟܪܳܐ. ܐܶܠܳܐ ܐܶܢ ܐܶܚܰܙܝܳܐ ܒܪܶܗ ܙܥܽܘܪܳܐ.
18 ܡܶܢ ܒܳܬܰܪ ܟܽܠܗܶܝܢ ܗܳܠܶܝܢ. ܡܚܽܘܬܳܐ ܬܶܗܘܶܐ ܒܰܡܥܰܘ̈ܗܝ ܘܰܒܟܽܘܪܗܳܢܳܐ ܣܰܓܺܝܐܳܐ ܢܡܽܘܬ ܘܳܐܣܝܽܘܬܳܐ ܠܳܐ ܬܶܗܘܶܐ ܠܶܗ.
19 ܘܰܗܘܳܐ ܡܶܢ ܒܳܬܰܪ ܝܰܘ̈ܡܳܬܳܐ ܣܰܓܺܝ̈ܐܶܐ. ܟܰܕ ܫܶܠܡܰܬ ܡܶܠܬܶܗ ܕܰܢܒܺܝܳܐ. ܠܰܫܢܺܝ̈ܢ ܬܰܪܬܶܝܢ. ܢܦܰܩܘ ܡܥܰܘ̈ܗܝ ܡܶܢ ܟܽܘܪܗܳܢܶܗ. ܘܡܺܝܬ ܒܟܽܘܪܗܳܢܳܐ ܒܺܝܫܳܐ. ܘܠܳܐ ܥܒܰܕ ܠܶܗ ܐܺܝܩܳܪܳܐ ܥܰܡܳܐ. ܐܰܝܟܰܢܳܐ ܕܰܥܒܰܕܘ ܠܰܐܒܳܗ̈ܳܬܶܗ.
20 ܒܰܪ ܬܠܳܬܺܝܢ ܗܘܳܐ ܘܬܰܪܬܶܝܢ ܫܢܺܝ̈ܢ. ܟܰܕ ܩܳܡ ܒܡܰܠܟܽܘܬܳܐ. ܘܰܬܡܳܢܶܐ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ ܘܶܐܙܰܠ ܕܠܳܐ ܪܶܓܬܳܐ. ܘܶܐܬܩܒܰܪ ܒܰܩܪܺܝܬܳܐ ܕܕܰܘܺܝܕ ܐܰܒܽܘܗܝ. ܘܠܳܐ ܒܰܩܒܽܘܪܬܳܐ ܕܡܰܠ̈ܟܶܐ.