2 Chronicles 2
The second Book of Chronicles
܀ ܒ ܕܘܒܪ ܝܘܡ̈ܬܐ ܒ ܀
1 ܘܶܐܡܰܪ ܫܠܶܝܡܽܘܢ ܠܡܶܒܢܳܐ ܒܰܝܬܳܐ ܠܰܫܡܶܗ ܕܡܳܪܝܳܐ. ܘܒܰܝܬܳܐ ܕܡܰܠܟܽܘܬܶܗ.
2 ܘܰܡܢܳܐ ܐܶܢܽܘܢ ܫܠܶܝܡܽܘܢ ܫܰܒܥܺܝܢ ܐܰܠܦܺܝ̈ܢ ܓܰܒܖ̈ܺܝܢ ܫܩܺܝ̈ܠܰܝ ܩܽܘ̈ܦܶܐ. ܘܰܬܡܳܢܺܝܢ ܐܰܠܦܺܝ̈ܢ ܓܰܒܖ̈ܶܐ ܦܳܣܽܘ̈ܠܶܐ ܒܛܽܘܪܳܐ. ܘܫܰܠܺܝܛܺܝܢ ܥܠܰܝܗܽܘܢ ܬܠܳܬܳܐ ܐܰܠܦܺܝ̈ܢ ܘܫܶܬܡܳܐܐ.
3 ܘܫܰܕܰܪ ܫܠܶܝܡܽܘܢ ܠܘܳܬ ܚܺܝܪܳܡ ܡܰܠܟܳܐ ܕܨܽܘܪ. ܘܶܐܡܰܪ ܠܶܗ. ܐܰܝܟܰܢܳܐ ܕܰܥܒܰܕܬ ܥܰܡ ܕܰܘܺܝܕ ܐܳܒܝ ܚܶܣܕܳܐ ܪܰܒܳܐ. ܘܫܰܕܰܪܬ ܠܶܗ ܐܰܖ̈ܙܶܐ. ܠܡܶܒܢܳܐ ܠܶܗ ܒܰܝܬܳܐ. ܠܡܶܬܰܒ ܒܶܗ.
4 ܘܗܳܐ ܐܶܢܳܐ ܒܳܢܶܐ ܐ̱ܢܳܐ ܒܰܝܬܳܐ ܠܰܫܡܶܗ ܕܡܳܪܝܳܐ ܐܰܠܳܗܝ. ܠܰܡܩܰܕܳܫܽܘ ܠܶܗ ܘܠܰܡܩܰܪܳܒܽܘ ܩܕܳܡܰܘܗܝ ܩܰܛܖ̈ܽܘܩܶܐ ܕܒܶܣ̈ܡܶܐ. ܠܡܰܢܗܳܪܽܘ ܫܖ̈ܳܓܶܐ ܐܰܡܺܝܢܳܐܺܝܬ. ܘܕܶܒܚ̈ܶܐ ܠܰܡܩܰܪܳܒܽܘ ܒܨܰܦܪܳܐ ܘܰܒܪܰܡܫܳܐ. ܒܫܰܒ̈ܶܐ ܘܰܒܪܺܝܫ ܝܰܖ̈ܚܶܐ. ܘܰܒܥܺܐܕ̈ܶܐ ܕܡܳܪܝܳܐ ܐܰܠܳܗܰܢ. ܗܳܕܶܐ ܓܙܰܪܘ ܥܰܠ ܟܽܠܶܗ ܝܺܣܪܳܐܶܝܠ.
5 ܘܒܰܝܬܳܐ ܕܶܐܢܳܐ ܒܳܢܶܐ ܐ̱ܢܳܐ. ܪܰܒܽ ܗ̱ܘ ܛܳܒ. ܡܶܛܽܠ ܕܪܰܒܽ ܗ̱ܘ ܓܶܝܪ ܡܳܪܝܳܐ ܐܰܠܳܗܰܢ ܡܶܢ ܟܽܠܗܽܘܢ ܡܰܠ̈ܟܶܐ.
6 ܘܡܰܢܽܘ ܐܺܝܬ ܒܶܗ ܚܰܝܠܳܐ ܠܡܶܒܢܳܐ ܠܶܗ ܒܰܝܬܳܐ. ܡܶܛܽܠ ܕܰܫܡܰܝܳܐ ܘܰܫܡܰܝ̈ ܫܡܰܝܳܐ ܠܳܐ ܡܣܰܝܒܪܺܝܢ ܠܶܗ. ܘܡܳܢܳܐ ܚܫܺܝܒ ܐ̱ܢܳܐ ܕܶܐܒܢܶܐ ܠܶܗ ܒܰܝܬܳܐ. ܐܰܘ ܕܰܐܣܶܩ ܠܶܗ ܩܰܛܖ̈ܽܘܩܶܐ ܕܒܶܣ̈ܡܶܐ.
7 ܡܶܟܺܝܠ ܫܰܕܰܪ ܠܺܝ ܓܰܒܪܳܐ ܚܰܕ ܚܰܟܺܝܡܳܐ. ܕܢܶܥܒܶܕ ܒܕܰܗܒܳܐ ܘܰܒܟܶܣܦܳܐ. ܘܰܢܚܳܫܳܐ ܘܦܰܪܙܠܳܐ. ܘܰܐܪܓܘܳܢܳܐ ܘܣܳܣܓܰܘܢܳܐ. ܘܰܒܬܶܟܠܬܳܐ. ܘܰܒܒܽܘܨܳܐ. ܘܝܳܕܰܥ ܠܡܰܪܡܳܝܽܘ ܩܠܺܝ̈ܕܶܐ ܥܰܡ ܚܰܟܺܝ̈ܡܶܐ ܕܺܐܝܬ ܒܺܝܗܽܘܕܳܐ. ܘܒܽܐܘܪܺܫܠܶܡ. ܕܰܐܬܩܶܢ ܕܰܘܺܝܕ ܐܳܒܝ.
8 ܘܫܰܕܰܪ ܠܺܝ ܩܰܝ̈ܣܶܐ ܕܰܐܪܙܳܐ ܘܰܕܩܰܛܖ̈ܽܘܩܶܐ ܘܕܶܐܫܟܳܪܥܳܐ ܡܶܢ ܠܶܒܢܳܢ. ܡܶܛܽܠ ܕܶܐܢܳܐ ܝܳܕܰܥ ܐ̱ܢܳܐ ܕܥܰܒܕܰܝ̈ܟ ܝܳܕܥܺܝܢ ܠܡܶܦܣܰܩ ܐܰܖ̈ܙܶܐ ܡܶܢ ܠܶܒܢܳܢ. ܘܗܳܐ ܥܰܒ̈ܕܰܝ ܥܰܡ ܥܰܒ̈ܕܰܝܟ.
9 ܢܶܗܘܽܘܢ ܡܰܝܬܶܝܢ ܠܺܝ ܩܰܝ̈ܣܶܐ ܣܰܓܺܝ. ܡܶܛܽܠ ܕܒܰܝܬܳܐ ܕܒܳܢܶܐ ܐ̱ܢܳܐ. ܪܰܒܽ ܗ̱ܘ ܛܳܒ. ܘܰܕܬܶܡܗܰܐ ܗ̱ܘ.
10 ܘܶܐܢܳܐ ܡܰܝܬܶܐ ܐ̱ܢܳܐ ܢܰܓܳܖ̈ܶܐ ܕܽܐܘܡܳܢܺܝܢ ܘܶܐܢܳܐ ܝܳܗܶܒ ܐ̱ܢܳܐ ܚܶܛ̈ܶܐ ܣܰܝܒܳܪܬܳܐ ܠܥܰܒܕܰܝ̈ܟ. ܟܽܘܖ̈ܶܐ ܥܶܣܪܺܝܢ ܐܰܠܦܺܝ̈ܢ. ܘܰܣܥܳܖ̈ܶܐ ܥܶܣܪܺܝܢ ܐܰܠܦܺܝ̈ܢ. ܘܚܰܡܪܳܐ ܖ̈ܶܒܥܶܐ ܥܶܣܪܺܝܢ ܐܰܠܦܺܝ̈ܢ. ܘܡܶܫܚܳܐ ܖ̈ܶܒܥܶܐ ܥܶܣܪܺܝܢ ܐܰܠܦܺܝ̈ܢ.
11 ܘܶܐܡܰܪ ܚܺܝܪܳܡ ܡܰܠܟܳܐ ܕܨܽܘܪ. ܒܰܟܬܳܒܳܐ. ܘܫܰܕܰܪ ܠܘܳܬ ܫܠܶܝܡܽܘܢ ܘܶܐܡܰܪ ܠܶܗ. ܡܶܛܽܠ ܕܰܪܚܶܡ ܡܳܪܝܳܐ ܠܥܰܡܶܗ. ܐܰܩܺܝܡܳܟ ܥܠܰܝܗܽܘܢ ܡܰܠܟܳܐ.
12 ܘܶܐܡܰܪ ܚܺܝܪܳܡ. ܒܪܺܝܟܽ ܗ̱ܘ ܡܳܪܶܐ ܡܳܖ̈ܰܘܳܬܳܐ ܕܺܝܣܪܳܐܶܝܠ. ܕܰܒܪܳܐ ܫܡܰܝܳܐ ܘܰܐܪܥܳܐ. ܘܝܰܗܒ ܠܕܰܘܺܝܕ ܒܪܳܐ ܚܰܟܺܝܡܳܐ. ܡܶܫܬܰܘܕܰܥ ܘܡܶܬܒܰܝܰܢ. ܘܰܗܘܳܬ ܡܶܢ ܪܶܥܝܳܢܶܗ ܠܡܶܒܢܳܐ ܒܰܝܬܳܐ ܠܡܳܪܝܳܐ. ܘܒܰܝܬܳܐ ܠܡܰܠܟܽܘܬܶܗ.
13 ܘܳܐܦ ܗܳܫܳܐ ܫܰܕܪܶܬ ܠܳܟ ܓܰܒܪܳܐ ܚܰܟܺܝܡܳܐ ܝܳܕܰܥ ܡܒܰܝܢܳܢܽܘܬܳܐ. ܠܚܺܝܪܳܡ.
14 ܒܰܪ ܐܰܢ̱ܬܬܳܐ ܗܽܘ ܐܰܪܡܰܠܬܳܐ ܡܶܢ ܒܶܝܬ ܕܳܢ. ܘܰܐܒܽܘܗܝ ܓܰܒܪܳܐ ܗܘܳܐ ܐܽܘܡܳܢܳܐ. ܝܳܕܰܥ ܠܡܶܥܒܰܕ ܒܕܰܗܒܳܐ ܘܰܒܟܶܣܦܳܐ. ܘܒܰܢܚܳܫܳܐ. ܘܰܒܦܰܪܙܠܳܐ. ܘܰܒܟܺܐܦ̈ܶܐ. ܘܰܒܩܰܝ̈ܣܶܐ. ܘܒܰܐܪܓܘܳܢܳܐ. ܘܰܒܬܶܟܠܬܳܐ. ܘܰܒܒܽܘܨܳܐ. ܘܰܒܣܳܣܓܰܘܢܳܐ. ܘܒܶܐܣܦܰܝܢܺܝܩܳܐ. ܠܡܶܥܒܰܕ ܩܠܺܝ̈ܕܶܐ ܠܬܰܖ̈ܥܶܐ. ܘܰܠܡܶܥܒܰܕ ܟܽܠ ܐܽܘܡܳܢܘ. ܕܶܐܬܺܝܗܶܒ ܠܶܗ ܡܶܢ ܩܕܳܡ ܡܳܪܝܳܐ. ܡܶܢ ܚܰܟܺܝܡܰܝ̈ܟ ܘܚܰܟܺܝܡܰܘ̈ܗܝ ܕܡܳܪܰܢ ܕܰܘܺܝܕ ܐܰܒܽܘܟ.
15 ܘܳܐܦ ܗܳܫܳܐ ܚܶܛ̈ܶܐ. ܘܰܣܥܳܖ̈ܶܐ. ܘܡܶܫܚܳܐ. ܘܚܰܡܪܳܐ. ܕܶܐܡܰܪ ܡܳܪܝ ܠܰܡܫܰܕܳܪܽܘ ܠܥܰܒܕܰܘ̈ܗܝ. ܢܫܰܕܰܪ.
16 ܘܰܚܢܰܢ ܢܶܦܣܽܘܩ ܐܰܖ̈ܙܶܐ ܡܶܢ ܠܶܒܢܳܢ ܐܰܝܟ ܨܶܒܝܳܢܳܟ. ܘܰܐܝܟ ܡܽܘܫ̈ܚܳܬܳܟ. ܘܢܰܝܬܶܐ ܐܶܢܽܘܢ ܠܳܟ. ܘܢܰܪܡܶܐ ܐܶܢܽܘܢ ܒܝܰܡܳܐ ܕܝܽܘܦܺܐ. ܘܰܐܢ̱ܬ ܬܰܣܶܩ ܐܶܢܽܘܢ ܠܽܐܘܪܺܫܠܶܡ.
17 ܘܟܰܢܶܫ ܫܠܶܝܡܽܘܢ ܟܽܠ ܓܰܒܖ̈ܶܐ ܓܺܝܽܘܖ̈ܶܐ ܕܰܗܘܰܘ ܒܰܐܪܥܳܐ ܕܺܝܣܪܳܐܶܝܠ. ܒܳܬܰܪ ܡܶܢܝܳܢܳܐ ܕܰܡܢܳܐ ܐܶܢܽܘܢ ܕܰܘܺܝܕ ܐܰܒܽܘܗܝ.
18 ܘܶܐܫܟܰܚ ܡܳܐܐ ܘܚܰܡܫܺܝܢ ܐܰܠܦܺܝ̈ܢ ܘܰܬܠܳܬܳܐ ܐܰܠܦܺܝ̈ܢ. ܘܫܶܬܡܳܐܐ. ܘܰܥܒܰܕܘ ܡܶܢܗܽܘܢ ܫܠܶܝܡܽܘܢ ܡܰܠܟܳܐ. ܫܰܒܥܺܝܢ ܐܰܠܦܺܝ̈ܢ ܫܳܩܠܰܝ̈ ܩܽܘ̈ܦܶܐ. ܘܰܬܡܳܢܺܝܢ ܐܰܠܦܺܝ̈ܢ ܦܳܣܽܘ̈ܠܶܐ ܒܛܽܘܪܳܐ. ܘܰܬܠܳܬܳܐ ܐܰܠܦܺܝ̈ܢ ܘܫܶܬܡܳܐܐ ܩܳܝܽܘ̈ܡܶܐ ܕܡܰܥܒܕܺܝܢ ܠܥܰܡܳܐ.