2 Chronicles 16
The second Book of Chronicles
܀ ܒ ܕܘܒܪ ܝܘܡ̈ܬܐ ܝܘ ܀
1 ܘܰܩܪܳܒܳܐ ܗܘܳܐ ܒܰܫܢܰܬ ܬܠܳܬܺܝܢ ܘܚܰܡܶܫ ܕܡܰܠܟܽܘܬܶܗ ܕܳܐܣܳܐ. ܘܒܰܫܢܰܬ ܬܠܳܬܺܝܢ ܘܫܶܬ ܠܡܰܠܟܽܘܬܶܗ ܕܳܐܣܳܐ. ܣܠܶܩ ܒܰܥܫܳܐ ܡܰܠܟܳܐ ܕܺܝܣܪܳܐܶܝܠ. ܥܰܠ ܕܒܶܝܬ ܝܺܗܽܘܕܳܐ. ܘܰܒܢܳܐ ܠܪܳܡܬܳܐ. ܡܶܛܽܠ ܕܠܳܐ ܫܳܒܩܺܝܢ ܗܘܰܘ ܠܡܶܦܰܩ ܘܰܠܡܶܥܰܠ ܠܳܐܣܳܐ ܡܰܠܟܳܐ ܕܺܝܗܽܘܕܳܐ.
2 ܘܰܐܦܶܩ ܐܳܣܳܐ ܟܶܣܦܳܐ ܘܕܰܗܒܳܐ ܡܶܢ ܒܶܝܬ ܓܰܙܳܐ ܕܡܳܪܝܳܐ. ܘܡܶܢ ܒܶܝܬ ܡܰܠܟܳܐ ܘܫܰܕܰܪ ܠܒܰܪ ܗܳܕܳܕ ܡܰܠܟܳܐ ܕܰܐܕܽܘܡ. ܕܝܳܬܶܒ ܒܕܰܪܡܣܽܘܩ. ܘܶܐܡܰܪ ܠܶܗ.
3 ܡܰܘܡܳܬܳܐ ܐܺܝܬ ܒܰܝ̈ܢܰܝ ܘܠܳܟ. ܘܒܶܝܬ ܐܳܒܝ ܘܒܶܝܬ ܐܰܒܽܘܟ ܗܳܐ ܫܰܕܪܶܬ ܠܳܟ ܟܶܣܦܳܐ ܘܕܰܗܒܳܐ. ܙܶܠ ܒܰܛܶܠ ܡܰܘܡܳܬܳܐ ܕܺܝܡܰܝܬ ܥܰܡ ܒܰܥܫܳܐ ܡܰܠܟܳܐ ܕܺܝܣܪܳܐܶܝܠ. ܡܶܬܥܰܠܶܐ ܡܶܢܝ.
4 ܘܰܫܡܰܥ ܒܰܪ ܗܳܕܳܕ ܠܡܰܠܟܳܐ ܐܳܣܳܐ. ܘܫܰܕܰܪ ܠܖ̈ܰܒܰܝ ܚܰܝ̈ܠܶܐ ܕܺܐܝܬ ܠܶܗ. ܘܶܐܬܰܘ. ܘܰܫܪܰܘ ܥܰܠ ܩܽܘܖ̈ܝܳܐ ܕܺܝܣܪܳܐܶܝܠ. ܘܶܐܚܰܕܘ ܠܥܶܝܢܽܘܢ ܘܠܳܐܒܶܝܠ ܒܶܝܬ ܡܰܥܟܳܐ. ܘܰܠܟܽܠܗܽܘܢ ܐܰܘܨܖ̈ܶܐ ܕܩܽܘܖ̈ܝܳܐ ܕܒܶܝܬ ܢܰܦܬܳܠܺܝ.
5 ܗܳܝܕܶܝܢ ܟܰܕ ܫܡܰܥ ܒܰܥܫܳܐ. ܦܪܰܩ ܗܘܳܐ ܡܶܢ ܕܰܠܡܶܒܢܳܐ ܠܪܳܡܬܳܐ. ܘܒܰܛܠܶܗ ܗܘܳܐ ܟܽܠܶܗ ܒܶܢܝܳܢܶܗ.
6 ܘܳܐܣܳܐ ܡܰܠܟܳܐ ܟܰܢܶܫ ܗܘܳܐ ܠܟܽܠܗܽܘܢ ܕܒܶܝܬ ܝܺܗܽܘܕܳܐ. ܘܰܢܣܰܒ ܠܟܺܐܦܶܝ̈ܗ̇ ܕܪܳܡܬܳܐ. ܘܰܠܩܰܝ̈ܣܶܐ ܕܰܡܛܰܝܒܺܝܢ ܗܘܰܘ ܕܢܶܒܢܽܘܢܳܗ̇ ܠܒܰܥܫܳܐ. ܘܰܒܢܳܐ ܒܗܽܘܢ ܡܰܠܟܳܐ ܐܳܣܳܐ ܪܳܡܬܳܐ ܕܒܶܢܝܳܡܶܝܢ. ܘܡܰܨܦܝܳܐ ܩܪܺܝܬܳܐ.
7 ܘܒܶܗ ܒܙܰܒܢܳܐ ܗܰܘ. ܐܶܬܳܐ ܚܰܢܰܢ ܢܒܺܝܳܐ ܠܘܳܬ ܐܳܣܳܐ ܡܰܠܟܳܐ ܕܺܝܗܽܘܕܳܐ. ܘܶܐܡܰܪ ܠܶܗ. ܚܠܳܦ ܕܶܐܬܬܟܶܠܬ ܥܰܠ ܡܰܠܟܳܐ ܕܰܐܕܽܘܡ. ܘܠܳܐ ܐܶܬܬܟܶܠܬ ܥܰܠ ܡܳܪܝܳܐ ܐܰܠܗܳܟ. ܡܶܛܽܠ ܗܳܢܳܐ ܢܶܥܪܽܘܩ ܚܰܝܠܳܐ ܕܰܐܕܽܘܡ ܡܶܢܳܟ.
8 ܘܢܺܐܙܽܠܘܢ ܘܢܶܬܚܰܝܠܽܘܢ ܗܶܢܽܘܢ ܘܗܶܢܕܘܳܝ̈ܶܐ. ܘܡܰܠ̈ܟܶܐ ܕܺܐܝܬ ܥܰܡܗܽܘܢ. ܘܢܶܗܘܽܘܢ ܠܚܰܝ̈ܠܶܐ. ܘܰܠܙܰܘ̈ܓܶܐ ܘܰܠܦܰܖ̈ܳܫܶܐ. ܣܽܘܓܳܐܐ ܕܛܳܒ ܘܟܰܕ ܬܶܒܥܶܐ ܡܶܢ ܡܳܪܝܳܐ ܐܰܠܳܗܳܐ. ܢܰܫܠܶܡ ܐܶܢܽܘܢ ܒܺܐܝܕܰܝ̈ܟ.
9 ܡܶܛܽܠ ܕܥܰܝܢܰܘ̈ܗܝ ܕܡܳܪܝܳܐ ܚܳܝܖ̈ܳܢ ܒܟܽܠܳܗ̇ ܐܰܪܥܳܐ. ܘܶܐܬܥܰܫܰܢܘ. ܘܢܶܗܘܶܐ ܠܶܒܟܽܘܢ ܫܠܶܡ ܠܕܶܚܠܬܶܗ ܘܶܐܣܬܰܟܠܘ ܒܟܽܠܗܶܝܢ ܬܶܕܡܖ̈ܳܬܶܗ. ܡܶܛܽܠ ܕܡܳܪܝܳܐ ܐܰܠܳܗܟܽܘܢ ܥܳܒܶܕ ܠܟܽܘܢ ܩܪܳܒܳܐ.
10 ܘܰܪܓܶܙ ܐܳܣܳܐ ܥܰܠ ܕܰܘܩܳܐ. ܘܝܰܗܒܶܗ ܒܶܝܬ ܐܰܣܺܝܖ̈ܶܐ ܡܶܛܽܠ ܕܡܶܕܶܡ ܕܠܳܐ ܚܳܙܶܐ ܗܘܳܐ. ܡܶܫܬܰܥܶܐ ܗܘܳܐ. ܘܰܡܙܺܝܥ ܗܘܳܐ ܠܶܒܶܗ ܕܥܰܡܳܐ. ܘܡܶܛܽܠ ܗܳܢܳܐ ܪܗܶܛ ܐܳܣܳܐ ܒܙܰܒܢܳܐ ܗܰܘ ܡܶܢ ܥܰܡܳܐ.
11 ܘܗܳܐ ܦܶܬܓܳܡܰܘ̈ܗܝ ܕܳܐܣܳܐ ܩܰܕܡܳܝ̈ܶܐ ܘܰܐ̱ܚܖ̈ܳܝܶܐ. ܗܳܐ ܟܬܺܝܒܺܝܢ ܥܰܠ ܣܶܦܪܳܐ ܕܡܰܠ̈ܟܶܐ ܕܺܝܗܽܘܕܳܐ ܘܕܺܝܣܪܳܐܶܝܠ.
12 ܘܶܐܬܟܰܬܰܫ ܐܳܣܳܐ ܒܰܫܢܰܬ ܬܠܳܬܺܝܢ ܘܰܬܫܰܥ ܠܡܰܠܟܽܘܬܶܗ. ܘܶܐܬܟܪܰܗ. ܘܰܢܦܰܠ ܒܓܰܘ ܒܰܝܬܶܗ.
13 ܘܰܫܟܶܒ ܐܳܣܳܐ ܥܰܡ ܐܰܒܳܗ̈ܳܬܶܗ. ܘܶܐܬܩܒܰܪ ܒܰܩܪܺܝܬܶܗ. ܘܡܺܝܬ ܒܰܫܢܰܬ ܐܰܪܒܥܺܝܢ ܘܰܚܕܳܐ ܠܡܰܠܟܽܘܬܶܗ.
14 ܘܶܐܬܩܒܰܪ ܒܩܰܒܪܶܗ ܕܕܰܘܺܝܕ. ܘܰܐܪܡܝܽܘܗܝ ܒܥܰܪܣܳܐ ܕܡܰܠܝܳܐ ܒܶܣ̈ܡܶܐ. ܘܰܐܘܩܶܕܘ ܝܰܩܕܳܐ ܪܰܒܳܐ ܕܛܳܒ.