2 Chronicles 10
The second Book of Chronicles
܀ ܒ ܕܘܒܪ ܝܘܡ̈ܬܐ ܝ ܀
1 ܘܶܐܙܰܠ ܪܚܰܒܥܰܡ ܠܰܫܟܺܝܡ. ܡܶܛܽܠ ܕܠܰܫܟܺܝܡ ܐܶܙܰܠ ܟܽܠܶܗ ܝܺܣܪܳܐܶܝܠ. ܠܰܡܩܳܡܽܘܬܶܗ ܡܰܠܟܳܐ.
2 ܘܰܗܘܳܐ ܕܟܰܕ ܫܡܰܥ ܝܽܘܪܰܒܥܰܡ ܘܟܽܠܶܗ ܝܺܣܪܳܐܶܝܠ.
3 ܐܶܬܰܘ ܘܳܐܡܪܺܝܢ ܠܰܪܚܰܒܥܰܡ ܒܰܪ ܫܠܶܝܡܽܘܢ.
4 ܐܰܒܽܘܟ ܐܰܣܓܺܝ ܫܽܘܥܒܳܕܰܢ. ܘܰܐܢ̱ܬ ܗܳܫܳܐ ܐܰܩܶܠ ܡܶܢ ܫܽܘܥܒܳܕܶܗ ܕܰܐܒܽܘܟ ܩܰܫܝܳܐ. ܘܡܶܢ ܡܳܪܽܘܬܶܗ ܥܰܫܺܝܢܬܳܐ ܘܢܶܦܠܚܳܟ.
5 ܘܶܐܡܰܪ ܠܗܽܘܢ. ܙܶܠܘ. ܘܡܶܟܳܐ ܠܰܬܠܳܬܳܐ ܝܰܘܡܺܝ̈ܢ ܬܰܘ ܠܘܳܬܝ ܘܶܐܬܳܐ ܥܰܡܳܐ ܠܘܳܬܶܗ.
6 ܘܶܐܬܡܰܠܰܟ ܡܰܠܟܳܐ ܪܚܰܒܥܰܡ. ܒܩܰܫܺܝ̈ܫܶܐ ܕܦܳܠܚܺܝܢ ܗܘܰܘ ܠܰܫܠܶܝܡܽܘܢ ܐܰܒܽܘܗܝ ܟܰܕ ܚܰܝ ܗܘܳܐ. ܘܶܐܡܰܪ ܗܘܳܐ. ܡܳܢܳܐ ܡܳܠܟܺܝܢ ܐ̱ܢܬܽܘܢ ܠܺܝ. ܕܢܰܗܦܶܟ ܦܶܬܓܳܡܳܐ ܠܥܰܡܳܐ ܗܳܢܳܐ.
7 ܘܡܰܠܶܠܘ ܥܰܡܶܗ ܘܶܐܡܰܪܘ ܠܶܗ. ܐܶܢܗܽܘ ܕܛܳܒܬܳܐ ܬܶܥܢܶܐ ܠܥܰܡܳܐ ܗܳܢܳܐ ܘܬܶܚܕܶܐ ܠܽܘܩܒܰܠ ܐܰܦܰܝ̈ܗܽܘܢ. ܘܰܬܡܰܠܶܠ ܥܰܡܗܽܘܢ ܡ̈ܶܠܶܐ ܛܳܒ̈ܳܬܳܐ. ܢܶܗܘܽܘܢ ܠܳܟ ܥܰܒܕ̈ܶܐ ܛܳܒ̈ܶܐ. ܘܦܰܠܳܚ̈ܶܐ ܟܽܠ ܝܰܘ̈ܡܳܬܳܐ ܕܚܰܝܰܝ̈ܟ.
8 ܘܰܫܒܰܩ ܡܶܠܟܳܐ ܕܩܰܫܺܝ̈ܫܶܐ ܕܡܰܠܟܽܘܗܝ. ܘܶܐܙܰܠ ܐܶܬܡܰܠܰܟ ܒܰܛܠܳܝ̈ܶܐ ܕܰܪܒܰܘ ܥܰܡܶܗ ܕܩܳܝܡܺܝܢ ܩܕܳܡܰܘܗܝ.
9 ܘܶܐܡܰܪ ܠܗܽܘܢ. ܡܳܢܳܐ ܡܳܠܟܺܝܢ ܐ̱ܢܬܽܘܢ ܠܺܝ. ܕܢܰܗܦܶܟ ܦܶܬܓܳܡܳܐ ܠܥܰܡܳܐ ܗܳܢܳܐ ܕܡܰܠܶܠܘ ܥܰܡܝ. ܘܳܐܡܪܺܝܢ ܠܺܝ. ܕܰܐܩܶܠ ܡܶܢܰܢ ܫܽܘܥܒܳܕܳܐ ܕܫܰܥܒܕܰܢ ܐܰܒܽܘܟ. ܘܢܶܦܠܚܳܟ.
10 ܘܡܰܠܶܠܘ ܥܰܡܶܗ ܛܠܳܝ̈ܶܐ ܕܰܪܒܰܘ ܥܰܡܶܗ ܒܫܽܘܩ̈ܶܐ. ܘܳܐܡܪܺܝܢ ܠܶܗ. ܗܳܟܰܢܳܐ ܬܺܐܡܰܪ ܠܥܰܡܳܐ ܕܡܰܠܶܠ ܥܰܡܳܟ. ܘܳܐܡܪܺܝܢ ܠܳܟ. ܕܰܐܒܽܘܟ ܐܰܥܫܶܢ ܫܽܘܥܒܳܕܰܢ. ܘܰܐܢ̱ܬ ܐܰܩܶܠ ܡܶܢ ܫܽܘܥܒܳܕܰܢ. ܗܳܟܰܢܳܐ ܬܺܐܡܰܪ ܠܗܽܘܢ. ܕܚܶܨܪܝ ܥܰܒܝܳܐ ܗ̱ܝ ܡܶܢ ܟܪܳܬܶܗ ܕܳܐܒܝ.
11 ܘܳܐܦ ܗܳܫܳܐ ܐܳܒܝ ܫܰܥܒܶܕܟܽܘܢ ܫܽܘܥܒܳܕܳܐ ܩܰܫܝܳܐ. ܘܶܐܢܳܐ ܡܰܘܣܶܦ ܐ̱ܢܳܐ ܥܰܠ ܫܽܘܥܒܳܕܟܽܘܢ. ܐܳܒܝ ܪܕܳܟܽܘܢ ܒܫܰܘ̈ܛܶܐ. ܘܶܐܢܳܐ ܪܳܕܶܐ ܐ̱ܢܳܐ ܠܟܽܘܢ ܒܡܳܖ̈ܰܓܢܶܐ.
12 ܘܶܐܬܳܐ ܝܽܘܪܰܒܥܰܡ. ܘܟܽܠܶܗ ܥܰܡܳܐ ܒܝܰܘܡܳܐ ܕܰܬܠܳܬܳܐ. ܐܰܝܟܰܢܳܐ ܕܰܫܐܶܠ ܡܶܢܗܽܘܢ ܙܰܒܢܳܐ. ܘܶܐܡܰܪ ܠܗܽܘܢ ܕܬܰܘ ܠܘܳܬܝ ܒܝܰܘܡܳܐ ܕܰܬܠܳܬܳܐ.
13 ܘܰܥܢܳܐ ܐܶܢܽܘܢ ܡܰܠܟܳܐ ܡ̈ܶܠܶܐ ܩܰܫ̈ܝܳܬܳܐ. ܘܰܫܒܰܩ ܡܰܠܟܳܐ ܪܚܰܒܥܰܡ. ܡܶܠܟܳܐ ܕܩܰܫܺܝ̈ܫܶܐ ܕܡܰܠܟܽܘܗܝ.
14 ܘܡܰܠܶܠ ܥܰܡܗܽܘܢ ܐܰܝܟ ܡ̈ܶܠܶܐ ܕܰܛܠܳܝ̈ܶܐ. ܘܶܐܡܰܪ ܠܗܽܘܢ. ܐܳܒܝ ܐܰܣܓܺܝ ܫܽܘܥܒܳܕܟܽܘܢ. ܘܶܐܢܳܐ ܡܰܘܣܶܦ ܐ̱ܢܳܐ ܥܰܠ ܫܽܘܥܒܳܕܟܽܘܢ ܐܳܒܝ ܪܕܳܟܽܘܢ ܒܫܰܘ̈ܛܶܐ. ܐܶܢܳܐ ܪܳܕܶܐ ܐ̱ܢܳܐ ܠܟܽܘܢ ܒܡܳܖ̈ܰܓܢܶܐ.
15 ܘܠܳܐ ܫܡܰܥܘ ܥܰܡܳܐ ܡܶܢ ܡܰܠܟܳܐ. ܡܶܛܽܠ ܕܰܗܘܳܬ ܗܦܺܝܟܬܳܐ ܡܶܢ ܩܕܳܡ ܡܳܪܝܳܐ. ܕܬܶܫܰܪ ܡܶܠܬܶܗ ܕܰܐܚܺܝܳܐ ܢܒܺܝܳܐ ܕܡܶܢ ܫܺܝܠܽܘ. ܥܰܠ ܝܽܘܪܰܒܥܰܡ ܒܰܪ ܢܳܒܳܛ.
16 ܘܰܚܙܰܘ ܟܽܠܶܗ ܝܺܣܪܳܐܶܝܠ. ܕܠܳܐ ܫܡܰܥ ܠܗܽܘܢ ܡܰܠܟܳܐ. ܘܰܐܬܺܝܒܽܘܗܝ ܥܰܡܳܐ ܦܶܬܓܳܡܳܐ ܠܡܰܠܟܳܐ. ܘܳܐܡܪܺܝܢ. ܠܰܝܬ ܠܰܢ ܡܢܳܬܳܐ ܒܕܰܘܺܝܕ. ܐܳܦܠܳܐ ܝܳܪܬܽܘܬܳܐ ܒܰܒܪܶܗ ܕܺܐܝܫܰܝ ܐ̱ܢܳܫ ܠܒܰܝܬܶܗ ܙܶܠܘ ܝܺܣܪܳܐܶܝܠ. ܡܶܟܺܝܠ ܚܙܺܝ ܒܰܝܬܳܟ ܕܰܘܺܝܕ. ܘܶܐܙܰܠܘ ܝܺܣܪܳܐܶܝܠ ܠܒܳܬܰܝ̈ܗܽܘܢ.
17 ܘܰܕܝܳܬܒܺܝܢ ܒܩܽܘܖ̈ܝܳܐ ܕܺܝܗܽܘܕܳܐ. ܐܰܡܠܶܟܘ ܥܠܰܝܗܽܘܢ ܠܰܪܚܰܒܥܰܡ.
18 ܘܫܰܕܰܪ ܥܠܰܝܗܽܘܢ ܡܰܠܟܳܐ ܪܚܰܒܥܰܡ ܠܰܐܕܽܘܢܺܝܪܰܡ ܕܫܰܠܺܝܛ ܗܘܳܐ ܥܰܠ ܡܰܣܩܰܝ̈ ܡܰܕܰܐܬܳܐ. ܘܪܰܓܡܽܘܗܝ ܟܽܠܶܗ ܝܺܣܪܳܐܶܝܠ ܒܟܺܐܦ̈ܶܐ. ܘܡܺܝܬ. ܘܡܰܠܟܳܐ ܪܚܰܒܥܰܡ ܣܠܶܩ ܘܺܝܬܶܒ ܠܶܗ ܒܙܰܘܓܳܐ. ܠܡܶܥܪܰܩ ܠܽܐܘܪܺܫܠܶܡ.
19 ܘܰܡܪܰܕܘ ܒܢܰܝ̈ ܝܺܣܪܳܐܶܝܠ ܥܰܠ ܒܰܝܬܶܗ ܕܕܰܘܺܝܕ. ܥܕܰܡܳܐ ܠܝܰܘܡܳܢܳܐ.