1 Maccabees 9
The First Book of Maccabees
܀ ܐ ܡܩܒܝ̈ܐ ܛ ܀
1 ܘܰܫܡܰܥ ܕܺܡܶܛܪܶܝܳܘܣ. ܕܰܢܦܰܠ ܢܺܝܩܳܢܳܘܪ ܘܚܰܝܠܶܗ ܒܰܩܪܳܒܳܐ: ܘܰܐܘܣܶܦ ܬܽܘܒ ܠܰܡܫܰܕܳܪܽܘ ܠܒܺܝܟܪܺܝܳܘܣ ܘܠܶܐܠܩܺܝܡܳܘܣ ܕܬܰܪܬܶܝܢ ܙܰܒܢܺܝ̈ܢ ܠܰܐܪܥܳܐ ܕܺܝܗܽܘܕܳܝ̈ܶܐ: ܘܰܠܚܰܝܠܳܐ ܕܡܶܢ ܝܰܡܺܝܢܳܐ ܥܰܡܗܽܘܢ.
2 ܘܶܐܙܰܠܘ ܕܒܶܝܬ ܒܺܝܟܪܺܝܳܘܣ ܒܽܐܘܪܚܳܐ ܕܓܶܠܥܳܕ: ܘܰܫܪܰܘ ܥܰܠ ܡܰܣܠܽܘܬ ܕܒܰܪܒܠܳܐ. ܘܟܰܒܫܽܘܗ̇ ܘܰܐܘܩܶܕܘ ܒܳܗ̇ ܢܰܦ̈ܫܳܬܳܐ ܕܐ̱ܢܳܫ̈ܳܐ ܣܰܓܺܝ̈ܐܶܐ.
3 ܘܒܰܫܢܰܬ ܡܳܐܐ ܘܚܰܡܫܺܝܢ ܘܬܰܪܬܶܝܢ ܒܝܰܪܚܳܐ ܩܰܕܡܳܝܳܐ ܫܪܰܘ ܥܰܠ ܐܽܘܪܺܫܠܶܡ.
4 ܘܰܫܩܰܠܘ ܘܶܐܙܰܠܘ ܠܒܝܪܙܬ: ܒܥܶܣܪܺܝܢ ܐܰܠܦܺܝ̈ܢ ܪ̈ܶܓܠܳܝܶܐ: ܘܰܬܪܶܝܢ ܐܰܠܦܺܝ̈ܢ ܦܰܪ̈ܳܫܶܐ.
5 ܘܺܝܗܽܘܕܳܐ ܫܪܳܐ ܗܘܳܐ ܒܰܐܠܣܳܐ. ܘܥܰܡܶܗ ܬܠܳܬܳܐ ܐܰܠܦܺܝ̈ܢ ܓܰܒܖ̈ܶܐ ܡܓܰܒܳܝ̈ܶܐ.
6 ܘܰܚܙܰܘ ܠܡܰܫܪܺܝܬܳܐ ܕܰܒܥܠܶܕܒܳܒܰܝ̈ܗܽܘܢ ܕܣܰܓܺܝ ܥܰܫܺܝܢܳܐ: ܘܰܕܚܶܠܘ ܛܳܒ. ܘܫܰܢܺܝܘ ܣܰܓܺܝ̈ܐܶܐ ܡܶܢ ܡܰܫܪܺܝܬܳܐ. ܘܠܳܐ ܐܶܫܬܚܰܪܘ ܐܶܠܳܐ ܬܡܳܢܶܡܳܐܐ ܓܰܒܪ̈ܺܝܢ ܒܰܠܚܽܘܕ.
7 ܘܰܚܙܳܐ ܝܺܗܽܘܕܳܐ ܕܶܐܬܒܰܕܪܰܬ ܠܳܗ̇ ܡܰܫܪܺܝܬܶܗ: ܘܰܩܪܳܒܳܐ ܐܳܠܶܨ ܠܶܗ: ܘܶܐܫܬܚܶܩ ܒܠܶܒܶܗ ܘܶܐܫܬܪܺܝ: ܡܶܛܽܠ ܕܠܳܐ ܐܺܝܬ ܗܘܳܐ ܠܶܗ ܙܰܒܢܳܐ ܠܰܡܟܰܢܳܫܽܘ ܐܶܢܽܘܢ.
8 ܘܶܐܡܰܪ ܠܰܐܝܠܶܝܢ ܕܶܐܫܬܚܰܪܘ ܠܘܳܬܶܗ. ܩܽܘܡܘ ܢܶܣܰܩ ܥܰܠ ܒܥܶܕܒܳܒܰܝ̈ܢ: ܛܒܰܪ ܢܶܫܟܰܚ ܠܡܰܩܪܳܒܽܘ ܥܰܡܗܽܘܢ.
9 ܘܰܗܦܰܟܘ ܠܗܽܘܢ ܡܶܢܶܗ ܘܳܐܡܪܺܝܢ ܠܶܗ. ܠܳܐ ܡܶܬܡܨܶܝܢܰܢ. ܐܶܠܳܐ ܗܳܫܳܐ ܢܦܰܠܶܛ ܢܰܦ̈ܫܳܬܰܢ. ܘܢܶܗܦܽܘܟ ܘܺܐܬܶܐ ܥܰܡ ܐܰܚܰܝ̈ܢ: ܘܢܰܩܪܶܒ ܥܰܡܗܽܘܢ. ܡܶܛܽܠ ܕܰܚܢܰܢ ܙܥܽܘܖ̈ܶܐ ܚܢܰܢ.
10 ܘܶܐܡܰܪ ܝܺܗܽܘܕܳܐ ܚܳܣ ܠܺܝ ܕܶܐܥܒܶܕ ܗܳܕܶܐ ܘܶܐܥܪܽܘܩ ܡܶܢ ܩܕܳܡܰܝܗܽܘܢ. ܘܶܐܢ ܡܰܛܺܝ ܙܰܒܢܰܢ: ܢܡܽܘܬ ܓܰܢܒܳܪܳܐܺܝܬ ܥܰܠ ܐܰܦܰܝ̈ ܐܰܚܰܝ̈ܢ. ܘܠܳܐ ܢܶܫܒܽܘܩ ܡܽܘܡܳܐ ܒܬܶܫܒܽܘܚܬܰܢ.
11 ܘܰܫܩܰܠ ܚܰܝܠܳܐ ܡܶܢ ܡܰܫܪܺܝܬܳܐ. ܘܩܳܡܘ ܠܽܘܩܒܰܠ ܩܪܳܒܳܐ. ܘܶܐܬܦܰܠܰܓܘ ܦܰܪ̈ܳܫܶܐ ܠܰܬܪܶܝܢ ܡܢܰܘ̈ܳܢ. ܘܩܰܫ̈ܳܬܶܐ ܘܫܳܕܝܰܝ̈ ܒܩܶܠ̈ܥܶܐ: ܐܳܙܺܠܝܢ ܗܘܰܘ ܩܕܳܡ ܚܰܝܠܳܐ. ܘܟܽܠܗܽܘܢ ܚܰܝ̈ܠܬܳܢܶܐ ܘܰܩܪ̈ܒܬܳܢܶܐ ܥܰܡܗܽܘܢ.
12 ܘܒܺܝܟܪܺܝܳܘܣ ܐܺܝܬܰܘܗܝ ܗܘܳܐ ܒܟܶܢܦܳܐ ܕܝܰܡܺܝܢܳܐ. ܘܰܩܪܶܒܘ ܦܠܰܓ̈ܶܐ ܡܶܢ ܬܖ̈ܰܝܗܽܘܢ ܓܰܒ̈ܶܐ: ܘܩܳܪܶܝܢ ܗܘܰܘ ܒܩܰܪ̈ܢܳܬܳܐ. ܐܳܦ ܕܒܶܝܬ ܝܺܗܽܘܕܳܐ ܩܳܪܶܝܢ ܗܘܰܘ ܒܩܰܪ̈ܢܳܬܳܐ.
13 ܘܶܐܬܬܙܺܝܥܰܬ ܐܰܪܥܳܐ ܡܶܢ ܩܳܠܳܐ ܕܡܰܫܪ̈ܝܳܬܳܐ. ܘܫܰܪܺܝܘ ܠܡܰܩܪܳܒܽܘ ܡܶܢ ܨܰܦܪܳܐ ܘܰܥܕܰܡܳܐ ܠܪܰܡܫܳܐ.
14 ܘܰܚܙܳܐ ܝܺܗܽܘܕܳܐ ܕܒܺܝܟܪܺܝܳܘܣ ܘܥܽܘܫܢܳܗ̇ ܕܡܰܫܪܺܝܬܳܐ ܒܓܰܒܳܐ ܗܰܘ ܕܝܰܡܺܝܢܳܐ: ܘܰܐܫܠܶܘ ܚܰܒܖ̈ܰܘܗܝ ܢܰܦܫܗܽܘܢ ܡܶܢ ܟܽܠܶܗ ܠܶܒܗܽܘܢ.
15 ܘܶܐܬܬܒܰܪ ܘܶܐܫܬܚܶܩ ܡܶܢ ܩܕܳܡܰܝܗܽܘܢ ܓܰܒܳܐ ܕܝܰܡܺܝܢܳܐ. ܘܰܪܕܰܦ ܗܘܳܐ ܒܳܬܰܪܗܽܘܢ ܥܕܰܡܳܐ ܠܛܽܘܪܳܐ ܕܙܽܘܛܳܘܣ.
16 ܘܗܳܠܶܝܢ ܕܡܶܢ ܓܰܒܳܐ ܕܣܶܡܳܠܳܐ: ܟܰܕ ܚܙܰܘ ܕܶܐܙܕܟܺܝ ܠܶܗ ܓܰܒܳܐ ܕܝܰܡܺܝܢܳܐ.ܗܦܰܟ ܒܳܬܰܪ ܝܺܗܽܘܕܳܐ ܘܰܐܝܠܶܝܢ ܕܥܰܡܶܗ ܡܶܢ ܒܶܣܬܰܪܗܽܘܢ.
17 ܘܰܐܥܫܶܢܘ ܩܪܳܒܳܐ. ܘܰܢܦܰܠܘ ܡܶܢ ܗܳܠܶܝܢ ܘܡܶܢ ܗܳܠܶܝܢ.
18 ܘܳܐܦ ܝܺܗܽܘܕܳܐ ܢܦܰܠ. ܘܶܐܫܬܚܰܪܘ ܥܪܰܩܘ.
19 ܘܰܢܣܰܒ ܝܽܘܢܳܬܳܢ ܘܫܶܡܥܽܘܢ ܠܺܝܗܽܘܕܳܐ ܐܰܚܽܘܗܽܘܢ: ܘܩܰܒܪܽܘܗܝ ܒܩܰܒܪܳܐ ܕܰܐܒܳܗܰܘ̈ܗܝ ܒܡܽܘܪܥܺܝܡ.
20 ܘܰܒܟܳܐ ܘܰܐܪܩܶܕ ܥܰܠ ܝܺܗܽܘܕܳܐ ܟܽܠܶܗ ܝܺܣܪܳܐܶܝܠ. ܘܶܐܬܶܐܒܶܠܘ ܥܠܰܘܗܝ ܐܶܒܠܳܐ ܪܰܒܳܐ ܝܰܘ̈ܡܳܬܳܐ ܣܰܓܺܝ̈ܐܶܐ. ܘܶܐܡܰܪܘ.
21 ܐܰܝܟܰܢܳܐ ܢܦܰܠ ܓܰܢܒܳܪܳܐ ܚܰܝܠܬܳܢܳܐ ܦܳܪܽܘܩܶܗ ܕܺܝܣܪܳܐܶܝܠ.
22 ܘܫܰܪܟܳܐ ܕܡܶܠܰܘ̈ܗܝ ܕܺܝܗܽܘܕܳܐ: ܘܰܩܪ̈ܳܒܰܘܗܝ ܘܢܶܨܚܳܢܰܘ̈ܗܝ ܘܓܰܢܒܳܪܽܘܬܶܗ ܘܚܰܝܠܬܳܢܽܘܬܶܗ: ܠܳܐ ܐܶܬܟܬܶܒܘ. ܣܰܓܺܝܐܺܝܢ ܗܘܰܘ ܓܶܝܪ ܣܰܓܺܝ.
23 ܘܰܗܘܳܐ ܡܶܢ ܒܳܬܰܪ ܡܰܘܬܶܗ ܕܺܝܗܽܘܕܳܐ: ܐܰܕܺܝܩܘ ܘܶܐܬܚܙܺܝܘ ܓܰܒܖ̈ܶܐ ܥܰܘ̈ܳܠܶܐ ܒܟܽܠܶܗ ܬܚܽܘܡܰܝ̈ܗܽܘܢ ܕܰܒܢܰܝ̈ ܝܺܣܪܳܐܶܝܠ. ܘܶܐܬܓܠܺܝܘ ܟܽܠܗܽܘܢ ܖ̈ܰܫܺܝܥܶܐ: ܘܥܳܒܖ̈ܰܝ ܢܳܡܽܘܣܳܐ.
24 ܘܰܒܗܳܢܽܘܢ ܝܰܘ̈ܡܳܬܳܐ ܗܘܳܐ ܟܰܦܢܳܐ ܪܰܒܳܐ. ܘܶܐܬܚܰܒܠܰܬ ܐܳܦ ܐܰܪܥܳܐ ܥܰܡܗܽܘܢ.
25 ܘܰܓܒܳܐ ܒܺܝܟܪܺܝܳܘܣ ܠ̱ܐܢܳܫ̈ܳܐ ܖ̈ܰܫܺܝܥܶܐ. ܘܰܐܩܺܝܡ ܐܶܢܽܘܢ ܡܳܖ̈ܰܘܳܬܳܐ ܘܫܰܠܺܝܛܳܢ̈ܶܐ ܥܰܠ ܐܰܪܥܳܐ.
26 ܘܰܡܥܰܩܒܺܝܢ ܗܘܰܘ ܘܒܳܥܶܝܢ ܠܪ̈ܳܚܡܰܘܗܝ ܕܺܝܗܽܘܕܳܐ. ܘܡܰܝܬܶܝܢ ܗܘܰܘ ܠܗܽܘܢ ܠܒܶܝܬ ܒܺܝܟܪܺܝܳܘܣ. ܘܰܡܒܰܙܰܚ ܗܘܳܐ ܘܡܶܫܬܰܢܰܕ ܗܘܳܐ ܒܗܽܘܢ.
27 ܘܰܗܘܳܐ ܐܽܘܠܨܳܢܳܐ ܪܰܒܳܐ ܠܺܝܣܪܳܐܶܝܠ: ܕܠܳܐ ܗܘܳܐ ܐܰܟܘܳܬܶܗ ܡܶܢ ܝܰܘܡܳܐ ܕܠܳܐ ܐܶܬܚܙܺܝ ܢܒܺܝܳܐ ܒܰܝܢܳܬܗܽܘܢ.
28 ܘܶܐܬܟܰܢܰܫܘ ܟܽܠܗܽܘܢ ܪ̈ܳܚܡܰܘܗܝ ܕܺܝܗܽܘܕܳܐ ܘܶܐܡܰܪܘ ܠܝܽܘܢܳܬܳܢ.
29 ܡܶܢ ܝܰܘܡܳܐ ܕܡܺܝܬ ܝܺܗܽܘܕܳܐ ܐܰܚܽܘܟ: ܠܳܐ ܐܺܝܬ ܓܰܒܪܳܐ ܕܕܳܡܶܐ ܠܶܗ: ܕܢܶܦܽܘܩ ܠܽܘܩܒܰܠ ܒܥܶܠܕܒܳܒܰܝ̈ܢ ܘܠܽܘܩܒܰܠ ܒܺܝܟܪܺܝܳܘܣ. ܘܠܽܘܩܒܰܠ ܟܽܠܗܽܘܢ ܐܰܝܠܶܝܢ ܕܡܶܬܟܰܬܫܺܝܢ ܥܰܡܰܢ ܘܣܳܢܶܝܢ ܠܰܢ ܡܶܢ ܒܢܰܝ̈ ܥܰܡܰܢ.
30 ܘܗܳܫܳܐ ܒܳܟ ܡܶܨܛܒܶܝܢܰܢ ܝܰܘܡܳܢܳܐ: ܕܬܶܗܘܶܐ ܠܰܢ ܪܺܝܫܳܐ ܘܰܡܕܰܒܪܳܢܳܐ ܠܡܰܩܪܳܒܽܘ ܩܪ̈ܳܒܰܝܢ.
31 ܘܩܰܒܶܠ ܝܽܘܢܳܬܳܢ ܒܗܰܘ ܙܰܒܢܳܐ ܕܢܶܗܘܶܐ ܡܕܰܒܪܳܢܳܐ. ܘܩܳܡ ܚܠܳܦ ܝܺܗܽܘܕܳܐ ܐܰܚܽܘܗܝ.
32 ܘܺܝܕܰܥ ܒܺܝܟܪܺܝܳܘܣ ܕܨܳܒܶܐ ܗܘܳܐ ܕܢܶܩܛܠܺܝܘܗܝ.
33 ܘܺܝܕܰܥ ܝܽܘܢܳܬܳܢ ܘܫܶܡܥܽܘܢ ܐܰܚܽܘܗܝ ܘܟܽܠܗܽܘܢ ܐܰܝܠܶܝܢ ܕܺܐܝܬ ܗܘܰܘ ܥܰܡܶܗ: ܘܰܥܪܰܩܘ ܠܗܽܘܢ ܠܡܰܕܒܪܳܐ ܕܬܩܽܘܥ. ܘܰܫܪܰܘ ܥܰܠ ܡܰܝ̈ܳܐ ܕܓܽܘܒܳܐ ܕܶܐܣܦܶܪ.
34 ܘܺܝܕܰܥ ܒܺܝܟܪܺܝܳܘܣ ܒܝܰܘܡܳܐ ܕܫܰܒܬܳܐ: ܘܶܐܬܳܐ ܗܽܘ ܘܟܽܠܶܗ ܚܰܝܠܶܗ ܠܥܶܒܖ̈ܰܘܗܝ ܕܝܽܘܪܕܢܳܢ ܢܰܗܪܳܐ.
35 ܘܫܰܕܰܪ ܝܽܘܢܳܬܳܢ ܠܝܽܘܚܰܢܳܢ ܐܰܚܽܘܗܝ ܕܢܶܗܘܶܐ ܡܕܰܒܪܳܢܳܐ ܠܥܰܡܳܐ. ܘܰܒܥܳܐ ܡܶܢ ܢܰܒܛܳܝ̈ܶܐ ܪ̈ܳܚܡܰܘܗܝ ܕܢܶܫܒܽܘܩ ܠܘܳܬܗܽܘܢ ܟܽܠܳܗ̇ ܝܺܩܰܪܬܗܽܘܢ.
36 ܘܰܢܦܰܩܘ ܒܢܰܝ̈ ܐܰܡܒܪܺܝ ܡܶܢ ܡܶܐܕܒܳܐ. ܘܰܐܚܕܽܘܗܝ ܠܝܽܘܚܰܢܳܢ ܘܰܠܟܽܠ ܕܺܐܝܬ ܗܘܳܐ ܥܰܡܶܗ. ܘܰܕܒܰܪܘ ܘܶܐܙܰܠܘ.
37 ܡܶܢ ܒܳܬܰܪ ܕܶܝܢ ܗܳܠܶܝܢ ܡ̈ܶܠܶܐ: ܐܶܡܰܪܘ ܠܝܽܘܢܳܬܳܢ ܘܰܠܫܶܡܥܽܘܢ ܐܰܚܽܘܗܝ ܕܰܒܢܰܝ̈ ܐܰܡܒܪܺܝ ܥܳܒܕܺܝܢ ܡܶܫܬܽܘܬܳܐ ܪܰܒܬܳܐ. ܘܡܰܝܬܶܝܢ ܟܰܠܬܳܐ ܡܶܢ ܢܳܒܳܛ: ܒܰܪܬ ܪ̈ܺܝܫܶܐ ܕܚܰܕ ܡܶܢ ܪܰܘܪ̈ܒܳܢܶܐ ܕܰܟܢܰܥܢ: ܒܬܶܫܒܽܘܚܬܳܐ ܪܰܒܬܳܐ ܘܰܒܥܰܡܳܐ ܣܰܓܺܝܐܳܐ.
38 ܘܶܐܬܕܰܟܪ ܝܽܘܢܳܬܳܢ ܠܝܽܘܚܰܢܳܢ ܐܰܚܽܘܗܝ: ܘܰܣܠܶܩܘ ܘܶܐܬܛܰܫܝܘ ܒܟܶܢܦܳܐ ܕܛܽܘܪܳܐ.
39 ܘܰܐܪܺܝܡܘ ܥܰܝܢܰܝ̈ܗܽܘܢ ܘܰܚܙܰܘ: ܘܗܳܐ ܪܰܘܒܳܐ ܕܟܢܫܳܐ ܣܰܓܺܝܐܳܐ: ܘܚܰܬܢܳܐ ܘܪ̈ܳܚܡܰܘܗܝ. ܢܦܰܩܘ ܓܶܝܪ ܪ̈ܳܚܡܰܘܗܝ ܘܰܐܚܰܘ̈ܗܝ ܠܽܐܘܪܥܶܗ: ܒܩܺܝܬܳܖ̈ܶܐ ܘܰܒܟܶܢܳܖ̈ܶܐ ܘܰܒܡܳܐܢܰܝ̈ ܙܰܝܢܳܐ ܣܰܓܺܝܐܳܐ.
40 ܘܩܳܡܘ ܥܠܰܝܗܽܘܢ ܡܶܢ ܟܡܺܐܢܳܐ ܕܒܶܝܬ ܝܽܘܢܳܬܳܢ. ܩܰܛܶܠܘ ܐܶܢܽܘܢ ܘܰܢܦܰܠܘ ܩܛܺܝ̈ܠܶܐ ܣܰܓܺܝ̈ܐܶܐ. ܘܫܰܪܟܳܐ ܕܰܐ̱ܚܪ̈ܳܢܶܐ ܥܪܰܩܘ ܠܛܽܘܪܳܐ. ܘܰܢܣܰܒܘ ܟܽܠܳܗ̇ ܒܶܙܬܗܽܘܢ.
41 ܘܶܐܬܗܰܦܟܶܬ ܡܶܫܬܽܘܬܳܐ ܠܶܐܒܠܳܐ: ܘܩܳܠܳܐ ܕܰܙܡܳܪܳܗ̇ ܠܡܰܪܩܽܘܕܬܳܐ.
42 ܘܶܐܬܬܒܰܥܘ ܬܒܰܥܬܳܐ ܕܰܕܡܶܗ ܕܰܐܚܽܘܗܽܘܢ. ܘܰܗܦܰܟܘ ܠܥܶܒܪܳܐ ܕܝܽܘܪܕܢܳܢ.
43 ܘܰܫܡܰܥ ܒܺܝܟܪܺܝܳܘܣ ܕܰܗܦܰܟ ܝܽܘܢܳܬܳܢ ܘܶܐܬܳܐ ܠܰܬܚܽܘܡܰܘ̈ܗܝ ܕܝܽܘܪܕܢܳܢ ܒܝܰܘܡܳܐ ܕܫܰܒܬܳܐ ܒܚܰܝܠܳܐ ܣܰܓܺܝܐܳܐ.
44 ܘܶܐܡܰܪ ܝܽܘܢܳܬܳܢ ܠܰܐܝܠܶܝܢ ܕܥܰܡܶܗ. ܩܽܘܡܘ ܘܢܶܬܟܰܬܰܫ ܥܰܠ ܐܰܦܰܝ̈ ܢܰܦ̈ܫܳܬܰܢ: ܠܳܐ ܓܶܝܪ ܐܺܝܬܰܘܗܝ ܝܰܘܡܳܢܳܐ ܐܰܝܟ ܐܶܬܡܳܠܝ ܘܰܐܝܟ ܕܡܢ ܩܕܳܡܰܘܗܝ.
45 ܡܶܛܽܠ ܕܗܳܐ ܩܪܳܒܳܐ ܡܛܰܝܰܒ ܠܩܽܘܒܠܳܢ: ܡܶܢ ܩܕܳܡܰܝܢ ܘܡܶܢ ܒܶܣܬܪܰܢ: ܘܡܰܘ̈ܗܝ ܕܝܽܘܪܕܢܳܢ ܚܕܺܝܪܺܝܢ ܠܰܢ ܡܶܟܳܐ ܘܡܶܟܳܐ: ܘܥܳܒܳܐ ܒܰܡܨܰܥܬܳܐ. ܘܠܳܐ ܐܺܝܬ ܐܰܬܪܳܐ ܠܰܡܪܰܟܳܢܽܘ ܡܶܢܶܗ.
46 ܗܳܫܳܐ ܓܥܰܘ ܠܘܳܬ ܥܳܡܽܘܪܳܐ ܕܰܫܡܰܝܳܐ: ܕܰܐܝܟܰܢܳܐ ܬܶܬܦܰܪܩܽܘܢ ܡܶܢ ܐܺܝܕܳܐ ܕܰܒܥܶܠܕܒܳܒܰܝ̈ܟܽܘܢ.
47 ܘܫܰܪܺܝܘ ܠܡܰܩܪܳܒܽܘ. ܘܰܐܪܺܝܡ ܝܽܘܢܳܬܳܢ ܐܺܝܕܶܗ ܕܢܶܡܚܶܝܘܗܝ ܠܒܺܝܟܪܺܝܳܘܣ. ܘܰܐܪܟܶܢ ܠܶܗ ܡܶܢܶܗ ܠܒܶܣܬܪܶܗ.
48 ܘܰܗܦܰܟܘ ܘܥܰܒܪܽܘܗܝ ܠܝܽܘܪܕܢܳܢ ܒܣܰܚܘܳܐ: ܝܽܘܢܳܬܳܢ ܘܰܐܝܠܶܝܢ ܕܥܰܡܶܗ: ܘܠܳܐ ܥܒܰܪܘ ܒܳܬܪܗܽܘܢ.
49 ܢܦܰܠܘ ܕܶܝܢ ܡܶܢ ܕܒܶܝܬ ܒܺܝܟܪܺܝܳܘܣ ܒܗܰܘ ܝܰܘܡܳܐ ܐܰܝܟ ܐܳܠܶܦ ܓܰܒܪ̈ܺܝܢ.
50 ܘܰܗܦܰܟ ܒܺܝܟܪܺܝܳܘܣ ܠܽܐܘܪܺܫܠܶܡ ܘܰܒܢܳܐ ܡܕܺܝ̈ܢܳܬܳܐ ܥܰܫܺܝ̈ܢܳܬܳܐ ܒܺܝܗܽܘܕ: ܠܚܶܣܢܳܐ ܕܒܺܐܝܪܺܝܚܽܘ: ܘܰܠܥܶܡܰܐܘܳܣ: ܘܰܠܒܝܬ ܚܰܘܪܳܢ: ܘܰܠܒܶܝܬܐܺܝܠ: ܘܰܠܬܳܡܢܰܬ: ܘܠܦܪܳܬ: ܘܰܠܛܳܦܳܘܣ: ܒܫܽܘܖ̈ܶܐ ܪ̈ܳܡܶܐ ܘܰܒܬܰܪ̈ܥܶܐ ܘܰܒܡܽܘ̈ܟܠܶܐ.
51 ܘܰܐܩܺܝܡ ܒܗܶܝܢ ܢܳܛܽܘܖ̈ܶܐ ܠܶܒܥܶܠܕܒܳܒܰܘ̈ܗܝ ܕܺܝܣܪܳܐܶܝܠ.
52 ܘܰܐܥܫܢܳܗ̇ ܠܒܶܝܬ ܫܽܘܖ̈ܶܐ ܡܕܺܝܢܬܳܐ: ܘܠܰܓܙܺܝܪܳܐ ܘܰܠܒܶܝܬ ܡܶܪܕܳܐ. ܘܰܐܘܬܶܒ ܒܗܶܝܢ ܚܰܝܠܳܐ. ܘܣܳܡ ܠܗܽܘܢ ܒܗܶܝܢ ܐܰܣܳܢܳܐ.
53 ܘܰܢܣܰܒ ܒܺܝܟܪܺܝܳܘܣ ܠܰܒܢܰܝ̈ ܪܰܘܪ̈ܒܳܢܶܝܗ̇ ܕܰܐܪܥܳܐ ܠܰܗܡܺܝܖ̈ܶܐ. ܘܣܳܡ ܐܶܢܽܘܢ ܒܰܢܛܽܘܪ̈ܘܳܬܳܐ ܒܡܶܪܕܳܐ ܕܐܽܘܪܺܫܠܶܡ.
54 ܘܒܰܫܢܰܬ ܡܳܐܐ ܘܚܰܡܫܺܝܢ ܘܰܬܠܳܬ ܒܝܰܪܚܳܐ ܕܰܬܪܶܝܢ: ܦܩܰܕ ܐܶܠܩܺܝܡܳܘܣ ܕܢܶܣܬܪܽܘܢ ܫܽܘܪܳܐ ܕܕܳܪܬܳܐ ܓܰܘܳܝܬܳܐ ܕܒܶܝܬ ܡܰܩܕܫܳܐ. ܘܣܰܚܶܦ ܥܒܳܕܰܝ̈ܗܽܘܢ ܕܰܢܒܺܝ̈ܶܐ: ܘܫܰܪܺܝ ܕܰܢܓܰܡܰܪ.
55 ܘܒܶܗ ܒܗܰܘ ܙܰܒܢܳܐ: ܒܠܰܥ ܐܶܠܩܺܝܡܳܘܣ. ܘܰܒܛܶܠܘ ܥܒܳܕܰܘ̈ܗܝ ܘܶܐܫܬܪܺܝ. ܘܶܐܣܬܟܰܪ ܦܽܘܡܶܗ. ܘܠܳܐ ܐܶܫܟܰܚ ܠܰܡܡܰܠܳܠܽܘ ܐܳܦܠܳܐ ܚܕܳܐ ܡܶܠܬܳܐ: ܐܳܦܠܳܐ ܠܰܡܦܰܩܳܕܽܘ ܥܰܠ ܒܶܝܬܶܗ.
56 ܘܡܺܝܬ ܐܶܠܩܺܝܡܳܘܣ ܒܗܰܘ ܙܰܒܢܳܐ ܒܬܰܫܢܺܝ̈ܩܶܐ ܪܰܘܪ̈ܒܶܐ.
57 ܘܰܚܙܳܐ ܒܺܝܟܪܺܝܳܘܣ ܕܡܺܝܬ ܠܶܗ ܐܶܠܩܺܝܡܳܘܣ: ܘܰܗܦܰܟ ܠܘܳܬ ܡܰܠܟܳܐ. ܘܫܶܠܝܰܬ ܘܶܐܬܬܢܺܝܚܰܬ ܐܰܪܥܳܐ ܕܺܝܗܽܘܕܳܐ ܬܰܪܬܶܝܢ ܫܢܺܝ̈ܢ.
58 ܘܶܐܬܡܰܠܰܟܘ ܟܽܠܗܽܘܢ ܐ̱ܢܳܫ̈ܳܐ ܥܰܘ̈ܳܠܶܐ ܘܶܐܡܰܪܘ. ܗܳܐ ܝܽܘܢܳܬܳܢ ܘܰܐܝܠܶܝܢ ܕܥܰܡܶܗ ܝܳܬܒܺܝܢ ܒܫܶܠܝܳܐ ܬܟܺܝܠܳܐܺܝܬ. ܗܳܫܳܐ ܢܰܝܬܶܐ ܠܒܺܝܟܪܺܝܳܘܣ: ܘܢܺܐܚܽܘܕ ܐܶܢܽܘܢ ܒܚܰܕ ܠܺܠܝܳܐ.
59 ܘܶܐܙܰܠܘ ܘܡܰܠܟܽܘܗܝ.
60 ܘܰܫܩܰܠ ܒܺܝܟܪܺܝܳܘܣ ܕܢܺܐܬܶܐ ܒܚܰܝܠܳܐ ܪܰܒܳܐ. ܘܫܰܕܰܪ ܐܶܓܪ̈ܳܬܳܐ ܡܰܛܫܝܳܐܺܝܬ ܠܟܽܠܗܽܘܢ ܡܥܰܕܪ̈ܳܢܰܘܗܝ ܕܒܺܝܗܽܘܕ: ܕܢܶܐܚܕܽܘܢܝܗܝ ܠܝܽܘܢܳܬܳܢ ܘܰܠܟܽܠܗܽܘܢ ܕܥܰܡܶܗ. ܘܠܳܐ ܡܶܫܟܚܺܝܢ ܗܘܰܘ: ܡܶܛܽܠ ܕܶܬܓܰܠܝܰܬ ܗܘܳܬ ܠܶܗ ܡܰܚܫܰܒܬܗܽܘܢ ܠܝܽܘܢܳܬܳܢ.
61 ܘܶܐܚܰܕܘ ܕܒܶܝܬ ܝܽܘܢܳܬܳܢ ܚܰܡܫܺܝܢ ܓܰܒܪ̈ܺܝܢ ܡܶܢ ܒܢܰܝ̈ ܐܰܪܥܳܐ: ܪ̈ܺܝܫܳܢܶܗ̇ ܕܒܺܝܫܬܳܐ. ܘܩܰܛܶܠܘ ܐܶܢܽܘܢ.
62 ܘܫܰܢܺܝ ܝܽܘܢܳܬܳܢ ܘܫܶܡܥܽܘܢ ܘܰܐܝܠܶܝܢ ܕܥܰܡܶܗ ܠܒܶܝܬ ܝܳܫܳܢ ܕܰܒܡܰܕܒܪܳܐ. ܘܰܒܢܰܘ ܡܣܰܚ̈ܦܳܬܳܐ ܘܫܰܪܪܺܘܗ̇.
63 ܘܺܝܕܰܥ ܒܺܝܟܪܺܝܳܘܣ. ܘܟܰܢܶܫ ܠܟܽܠܶܗ ܚܰܝܠܶܗ. ܘܰܦܩܰܕ ܠܰܐܝܠܶܝܢ ܕܺܐܝܬ ܒܺܝܗܽܘܕ.
64 ܘܰܢܦܰܩ ܘܺܝܬܶܒ ܥܰܠ ܒܶܝܬ ܝܳܫܳܢ. ܘܰܐܩܪܶܒ ܥܰܡܳܗ̇ ܝܰܘ̈ܡܳܬܳܐ ܣܰܓܺܝ̈ܐܶܐ. ܘܰܥܒܰܕ ܡܰܐܟܢܘ̈ܣ.
65 ܘܰܫܒܰܩ ܝܽܘܢܳܬܳܢ ܠܫܶܡܥܽܘܢ ܐܰܚܽܘܗܝ ܒܓܰܘ ܡܕܺܝܢܬܳܐ. ܘܰܢܦܰܩ ܗܽܘ ܠܰܐܬܪܳܐ. ܘܰܢܦܰܩ ܒܡܶܢܝܳܢܳܐ.
66 ܘܡܚܳܝܗܝ ܠܥܳܕܽܘܪܳܐ ܘܠܰܐܚܰܘ̈ܗܝ ܘܠܰܒܢܰܝ̈ ܦܫܺܝܪܳܘܢ ܒܡܰܫܟܢܗܽܘܢ. ܘܫܰܪܺܝܘ ܡܳܚܶܝܢ ܘܣܳܠܩܺܝܢ ܒܚܰܝܠܰܘ̈ܳܬܳܐ.
67 ܘܫܶܡܥܽܘܢ ܘܰܐܝܠܶܝܢ ܕܥܰܡܶܗ ܢܦܰܩܘ ܡܶܢ ܡܕܺܝܢܬܳܐ: ܘܰܐܘܩܶܕܘ ܐܶܢܶܝܢ ܠܡܐܟܢܘ̈ܣ.
68 ܘܰܐܩܪܶܒܘ ܥܰܡ ܒܺܝܟܪܺܝܳܘܣ. ܘܶܐܬܬܒܰܪ ܩܕܳܡܰܝܗܽܘܢ. ܘܳܐܠܨܺܝܢ ܗܘܰܘ ܠܶܗ ܣܰܓܺܝ: ܡܶܛܽܠ ܕܶܐܣܬܰܪܩܰܬ ܗܘܳܬ ܠܳܗ̇ ܡܰܚܫܰܒܬܶܗ ܘܡܶܐܬܺܝܬܶܗ.
69 ܘܶܐܬܚܰܡܰܬ ܒܺܝܟܪܺܝܳܘܣ ܒܪܽܘܓܙܳܐ ܥܰܠ ܓܰܒܖ̈ܶܐ ܥܰܘ̈ܳܠܶܐ: ܗܳܢܽܘܢ ܕܡܰܠܟܽܘܗܝ ܗܘܰܘ ܕܢܺܐܬܶܐ ܥܰܠ ܐܰܪܥܳܐ. ܘܩܰܛܶܠ ܡܶܢܗܽܘܢ ܣܰܓܶܝ̈ܐܶܐ. ܘܶܐܬܚܰܫܰܒ ܕܢܺܐܙܰܠ ܠܶܗ ܠܰܐܪܥܶܗ.
70 ܘܺܝܕܰܥ ܝܽܘܢܳܬܳܢ ܘܫܰܕܰܪ ܠܘܳܬܶܗ ܐܺܝܙܓܰܕ̈ܶܐ ܠܡܶܥܒܰܕ ܥܰܡܶܗ ܫܠܳܡܳܐ: ܘܰܕܢܶܬܶܠ ܠܗܽܘܢ ܫܒܺܝܬܗܽܘܢ.
71 ܘܩܰܒܶܠ ܒܺܝܟܪܺܝܳܘܣ ܘܰܥܒܰܕ ܐܰܝܟ ܡܶܠܰܘ̈ܗܝ. ܘܺܝܡܳܐ ܠܶܗ ܕܠܳܐ ܢܶܒܥܶܐ ܠܶܗ ܒܺܝܫܬܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗܝ.
72 ܘܝܰܗܒ ܠܶܗ ܫܒܺܝܬܳܐ ܗܳܝ ܕܰܫܒܳܐ ܗܘܳܐ ܡܶܢ ܩܕܺܝܡ ܡܶܢ ܐܰܪܥܳܐ ܕܺܝܗܽܘܕܳܐ. ܘܰܗܦܰܟ ܘܶܐܙܰܠ ܒܺܝܟܪܺܝܳܘܣ ܠܰܐܪܥܶܗ. ܘܠܳܐ ܬܽܘܒ ܐܰܘܣܶܦ ܠܡܶܚܙܳܐ ܬܚܽܘܡܰܝ̈ܗܽܘܢ.
73 ܘܫܶܠܝܰܬ ܪܽܘܡܚܳܐ ܡܶܢ ܝܺܣܪܳܐܶܝܠ. ܘܰܥܡܰܪ ܝܽܘܢܳܬܳܢ ܒܡܰܟܡܰܣ. ܘܫܰܪܺܝ ܝܽܘܢܳܬܳܢ ܠܰܡܕܳܢ ܠܥܰܡܳܐ ܕܺܝܣܪܳܐܶܝܠ. ܘܠܰܡܚܰܒܳܠܽܘ ܘܰܠܡܰܘܒܳܕܽܘ ܡܶܢܶܗ ܐ̱ܢܳܫ̈ܳܐ ܖ̈ܰܫܺܝܥܶܐ.