1 Maccabees 16
The First Book of Maccabees
܀ ܐ ܡܩܒܝ̈ܐ ܝܘ ܀
1 ܘܰܣܠܶܣ ܝܽܘܚܰܢܳܢ ܡܶܢ ܓܳܙܰܪ. ܘܚܰܘܺܝܘܗܝ ܠܰܐܒܽܘܗܝ ܟܽܠܡܶܕܶܡ ܕܰܥܒܰܕ ܩܰܢܕܒܝܘܣ.
2 ܘܰܩܪܳܐ ܐܶܢܽܘܢ ܠܰܬܖ̈ܰܝܗܽܘܢ ܒܢܰܘ̈ܗܝ ܩܰܫܺܝ̈ܫܶܐ: ܠܺܝܗܽܘܕܳܐ: ܘܰܠܝܽܘܚܰܢܳܢ. ܘܶܐܡܰܪ ܠܗܽܘܢ. ܐܶܢܳܐ ܘܰܐܚܰܝ̈ ܘܒܶܝܬ ܐܳܒܝ: ܐܰܩܪܶܒܢ ܩܪ̈ܳܒܰܘܗܝ ܕܺܝܣܪܳܐܶܝܠ: ܡܶܢ ܛܰܠܝܽܘܬܰܢ ܘܰܥܕܰܡܳܐ ܠܝܰܘܡܳܢܳܐ. ܘܶܐܬܺܝܗܶܒ ܒܺܐܝܕܰܝ̈ܢ ܕܢܶܦܪܽܘܩ ܠܺܝܣܪܳܐܶܝܠ: ܙܰܒ̈ܢܳܬܳܐ ܣܰܓܺܝ̈ܐܳܬܳܐ.
3 ܗܳܫܳܐ ܕܶܝܢ ܣܶܒܶܬ ܠܺܝ. ܘܰܐܢ̱ܬܽܘܢ ܒܖ̈ܰܚܡܰܘܗܝ ܕܰܐܠܳܗܳܐ ܚܰܝܠܬܳܢ̈ܶܐ ܐܰܢ̱ܬܽܘܢ. ܩܽܘܡܘ ܘܰܗܘܰܘ ܚܠܳܦܰܝ ܘܰܚܠܳܦ ܐܰܚܰܝ̈: ܘܦܽܘܩܘ ܘܶܐܬܟܰܬܰܫܘ ܥܰܠ ܐܰܦܰܝ̈ ܥܰܡܰܢ. ܘܥܽܘܕܪܳܢܳܐ ܕܡܶܢ ܫܡܰܝܳܐ ܢܶܗܘܶܐ ܥܰܡܟܽܘܢ.
4 ܘܰܓܒܳܐ ܝܽܘܚܰܢܳܢ ܡܶܢ ܐܰܪܥܳܐ: ܥܶܣܪܺܝܢ ܐܰܠܦܺܝ̈ܢ ܓܰܒܖ̈ܶܐ ܡܰܓܒܳܝ̈ܶܐ ܠܰܩܪܳܒܳܐ. ܘܦܰܪ̈ܳܫܶܐ. ܘܶܐܙܰܠ ܥܰܠ ܩܰܢܕܒܝܘܣ: ܘܒܳܬܘ ܒܡܽܘܪܥܺܝܡ.
5 ܘܩܰܕܶܡܘ ܒܨܰܦܪܳܐ: ܘܳܐܙܺܠܝܢ ܗܘܰܘ ܒܰܦܩܰܥܬܳܐ. ܗܘܳܐ ܚܰܝܠܳܐ ܣܰܓܺܝܐܳܐ ܐܰܪܰܥ ܐܶܢܽܘܢ ܕܖ̈ܰܓܠܶܐ ܘܰܕܦܰܪ̈ܳܫܶܐ. ܘܺܐܝܬ ܗܘܳܐ ܢܰܚܠܳܐ ܒܰܝܢܳܬܗܽܘܢ.
6 ܘܰܫܪܳܐ ܠܩܽܘܒܠܗܽܘܢ ܗܽܘ ܘܥܰܡܶܗ. ܘܰܚܙܳܝܗܝ ܠܥܰܡܳܐ ܕܰܕܚܺܝܠ ܕܢܶܥܒܰܪ ܠܢܰܚܠܳܐ. ܘܰܥܒܰܪ ܗܽܘ ܒܩܰܕܡܳܐ. ܘܰܚܙܰܐܽܘܗܝ ܕܰܥܒܰܪ: ܘܰܥܒܰܪܘ ܐܳܦ ܗܶܢܽܘܢ ܒܳܬܪܶܗ.
7 ܘܦܰܠܓܶܗ ܠܥܰܡܳܐ ܘܰܠܦܰܪ̈ܳܫܶܐ ܒܰܝܢܳܬ ܡܰܫܪ̈ܝܳܬܗܽܘܢ. ܦܰܪ̈ܳܫܶܐ ܕܶܝܢ ܕܰܒܥܶܠܕܒܳܒܰܝ̈ܗܽܘܢ: ܣܰܓܺܝܐܺܝܢ ܗܘܰܘ ܣܰܓܺܝ.
8 ܘܰܩܪܰܘ ܒܩܰܪ̈ܢܳܬܳܐ: ܘܶܐܙܕܟܺܝ ܩܰܢܕܒܝܘܣ ܘܡܰܫܪܺܝܬܶܗ. ܘܰܢܦܰܠܘ ܡܶܢܗܽܘܢ ܩܛܺܝ̈ܠܶܐ ܣܰܓܺܝ̈ܐܶܐ. ܫܰܪܟܳܐ ܕܶܝܢ ܕܶܐܫܬܚܰܪܘ ܥܪܰܩܘ ܠܚܶܣܢ̈ܶܐ.
9 ܝܺܗܽܘܕܳܐ ܕܶܝܢ ܐܰܚܽܘܗܝ ܕܝܽܘܚܰܢܳܢ ܒܠܰܥ. ܝܽܘܚܰܢܳܢ ܕܶܝܢ ܪܳܕܶܦ ܗܘܳܐ ܒܳܬܰܪܗܽܘܢ ܥܕܰܡܳܐ ܠܚܶܒܪܽܘܢ: ܗܳܝ ܕܰܒܢܰܘ.
10 ܘܰܥܪܰܩܘ ܥܕܰܡܳܐ ܠܡܰܓܕܠܳܐ ܕܰܒܙܽܘܛܽܘܣ. ܘܰܐܘܩܕܳܗ̇ ܒܢܽܘܪܳܐ. ܘܰܢܦܰܠܘ ܡܶܢܗܽܘܢ ܐܰܝܟ ܬܠܳܬܳܐ ܐܰܠܦܺܝ̈ܢ ܓܰܒܪ̈ܺܝܢ. ܘܰܕܒܶܝܬ ܝܽܘܚܰܢܳܢ: ܗܦܰܟܘ ܠܺܝܗܽܘܕܳܐ ܒܰܫܠܳܡܳܐ.
11 ܦܛܽܘܠܡܶܐܳܘܣ ܕܶܝܢ ܒܰܪ ܚܰܒܽܘܒܳܐ: ܡܩܳܡ ܗܘܳܐ ܪܺܝܫܳܐ ܘܰܡܕܰܒܪܳܢܳܐ ܒܰܦܩܰܥܬܳܐ ܕܺܐܝܪܺܝܚܽܘ: ܘܰܩܢܳܐ ܕܰܗܒܳܐ ܘܣܺܐܡܳܐ ܣܰܓܺܝܐܳܐ.
12 ܐܺܝܬܰܘܗܝ ܗܘܳܐ ܓܶܝܪ ܚܰܬܢܶܗ ܕܪܰܒ ܟܳܗ̈ܢܶܐ.
13 ܘܶܐܬܬܪܺܝܡ ܠܶܒܶܗ: ܘܰܨܒܳܐ ܕܢܶܐܚܽܘܕ ܘܢܶܫܬܰܠܰܛ ܥܰܠ ܐܰܪܥܳܐ. ܘܡܶܬܚܰܫܰܒ ܗܘܳܐ ܢܶܟܠܳܐ ܥܰܠ ܫܶܡܥܽܘܢ ܘܥܰܠ ܒܢܰܘ̈ܗܝ: ܕܰܐܝܟܰܢܳܐ ܢܶܩܛܽܘܠ ܐܶܢܽܘܢ.
14 ܫܶܡܥܽܘܢ ܕܶܝܢ ܡܶܬܟܪܶܟ ܗܘܳܐ ܘܣܰܥܰܪ ܗܘܳܐ ܡܕܺܝ̈ܢܳܬܶܗ ܕܰܐܬܪܳܐ. ܘܝܳܨܶܦ ܗܘܳܐ ܕܟܽܠ ܡܶܕܶܡ ܕܡܶܬܒܥܶܐ ܗܘܳܐ ܠܗܶܝܢ. ܘܰܢܚܶܬ ܠܺܐܝܪܺܝܚܽܘ ܗܽܘ ܘܡܰܬܺܝܬܳܐ ܘܺܝܗܽܘܕܳܐ ܒܢܰܘ̈ܗܝ: ܒܰܫܢܰܬ ܡܳܐܐ ܘܫܰܒܥܺܝܢ ܘܰܫܒܰܥ ܒܝܰܪܚܳܐ ܕܰܚܕܰܥܣܰܪ: ܕܺܐܝܬܰܘܗܝ ܫܒܳܛ.
15 ܘܩܰܒܶܠ ܐܶܢܽܘܢ ܦܛܽܘܠܡܶܐܳܘܣ ܒܰܪ ܚܰܒܽܘܒܳܐ ܒܢܶܟܠܳܐ ܒܚܶܣܢܳܐ ܕܡܶܬܩܪܶܐ ܕܘܐܝܩ: ܗܰܘ ܕܰܒܢܳܐ ܗܘܳܐ. ܘܰܥܒܰܕ ܠܗܽܘܢ ܡܰܫܬܝܳܐ ܪܰܒܳܐ. ܘܛܰܫܺܝ ܬܰܡܳܢ ܓܰܒܖ̈ܶܐ.
16 ܘܟܰܕ ܐܶܫܬܺܝܘ ܘܶܐܬܒܰܣܰܡܘ ܫܶܡܥܽܘܢ ܘܰܒܢܰܘ̈ܗܝ: ܩܳܡܘ ܦܛܽܘܠܡܶܐܳܘܣ ܘܰܐܝܠܶܝܢ ܕܥܰܡܶܗ: ܘܰܢܣܰܒܘ ܙܰܝܢܗܽܘܢ ܘܥܰܠܘ ܥܰܠ ܫܶܡܥܽܘܢ ܠܒܶܝܬ ܡܰܫܬܝܳܐ. ܘܩܰܛܠܽܘܗܝ ܠܶܗ ܘܠܰܒܢܰܘ̈ܗܝ ܘܰܠܐ̱ܢܳܫܺܝ̈ܢ ܡܶܢ ܥܰܒܕܰܘ̈ܗܝ.
17 ܘܰܥܒܰܕ ܒܺܝܫܬܳܐ ܪܰܒܬܳܐ. ܘܰܦܪܰܥ ܒܺܝܫܬܳܐ ܚܠܳܦ ܛܳܒܬܳܐ.
18 ܘܰܟܬܰܒ ܘܫܰܕܰܪ ܗܳܠܶܝܢ ܦܛܽܘܠܡܶܐܳܘܣ ܠܡܰܠܟܳܐ. ܕܰܢܫܰܕܰܪ ܠܶܗ ܚܰܝܠܳܐ ܠܥܽܘܕܪܳܢܳܐ. ܘܰܕܢܰܫܠܶܡ ܠܶܗ ܐܰܪ̈ܥܳܬܳܐ ܘܰܡܕܺܝ̈ܢܳܬܳܐ.
19 ܘܫܰܕܰܪ ܓܰܒܖ̈ܶܐ ܐ̱ܚܪ̈ܳܢܶܐ ܠܓܳܙܰܪ ܕܶܢܩܛܠܽܘܢܳܝܗܝ ܠܝܽܘܚܰܢܳܢ. ܘܰܠܪ̈ܺܝܫܰܝ ܐܰܠܦ̈ܶܐ ܕܶܝܢ ܟܬܰܒ: ܕܢܺܐܬܽܘܢ ܨܶܐܕܰܘܗܝ: ܕܢܶܬܶܠ ܠܗܽܘܢ ܕܰܗܒܳܐ ܘܣܺܐܡܳܐ ܘܡܰܘܗ̈ܒܳܬܳܐ.
20 ܘܠܰܐ̱ܚܪ̈ܳܢܶܐ ܫܰܕܰܪ ܕܢܶܐܚܕܽܘܢ ܠܽܐܘܪܺܫܠܶܡ ܘܰܠܛܽܘܪܶܗ ܕܰܗܝܟܠܳܐ.
21 ܘܶܐܙܰܠܘ ܘܰܐܘܕܥܽܘܗܝ ܠܝܽܘܚܰܢܳܢ ܒܓܳܙܰܪ: ܕܡܺܝܬ ܠܶܗ ܐܰܒܽܘܗܝ ܘܰܐܚܰܘ̈ܗܝ. ܘܫܰܕܰܪ ܕܳܐܦ ܠܳܟ ܢܶܩܛܠܳܟ.
22 ܘܟܰܕ ܫܡܰܥ ܝܽܘܚܰܢܳܢ. ܙܳܥ ܘܰܬܡܰܗ ܣܰܓܺܝ. ܘܶܐܚܰܕ ܐܶܢܽܘܢ ܠܓܰܒܖ̈ܶܐ ܕܶܐܙܰܠܘ ܥܠܰܘܗܝ ܘܩܰܛܶܠ ܐܶܢܽܘܢ. ܝܳܕܰܥ ܗܘܳܐ ܓܶܝܪ ܝܽܘܚܰܢܳܢ: ܕܰܠܡܶܩܛܠܶܗ ܗܽܘ ܨܳܒܶܝܢ ܗܘܰܘ.
23 ܘܫܰܪܟܳܐ ܕܡܶܠܰܘ̈ܗܝ ܕܝܽܘܚܰܢܳܢ ܘܰܩܪ̈ܳܒܰܘܗܝ ܘܢܶܨܚܳܢܰܘ̈ܗܝ ܕܶܐܬܢܰܨܰܚ ܘܰܙܟܳܐ: ܘܒܶܢܝܳܢܳܐ ܕܫܽܘܪܳܐ ܕܰܒܢܳܐ ܘܰܥܒܳܕܰܘ̈ܗܝ.
24 ܗܳܐ ܗܳܠܶܝܢ ܟܬܺܝ̈ܒܳܢ: ܒܰܟܬܳܒܳܐ ܕܝܰܘ̈ܡܳܬܳܐ ܕܪܰܒܽܘܬ ܟܳܗܢܽܘܬܶܗ. ܕܰܗܘܳܐ ܪܰܒ ܟܳܗ̈ܢܶܐ.