1 Maccabees 6
The First Book of Maccabees
܀ ܐ ܡܩܒܝ̈ܐ ܘ ܀
1 ܐܰܢܛܝܰܟܳܘܣ ܡܗܰܠܶܟ ܗܘܳܐ ܒܰܐܪ̈ܥܳܬܳܐ ܥܶܠܳܝ̈ܳܬܳܐ. ܘܰܫܡܰܥ ܕܺܐܝܬ ܒܦܳܪܶܣ: ܥܺܝܠܰܡ ܡܕܺܝܢܬܳܐ ܫܒܺܝܚܬܳܐ: ܒܥܽܘܬܪܳܐ ܕܕܰܗܒܳܐ ܘܰܕܣܺܐܡܳܐ.
2 ܘܗܰܝܟܠܳܐ ܕܒܶܝܬ ܦܬܰܟܪ̈ܶܝܗ̇ ܥܰܬܺܝܪ ܣܰܓܺܝ. ܘܬܰܡܳܢ ܐܺܝܬ ܣܰܢܘܪ̈ܳܬܳܐ ܕܕܰܗܒܳܐ ܘܫܶܪ̈ܝܳܢܶܐ ܘܡܳܐܢܰܝ̈ ܙܰܝܢܳܐ: ܗܳܠܶܝܢ ܕܰܫܒܰܩ ܗܘܳܐ ܬܰܡܳܢ ܐܰܠܶܟܣܰܢܕܪܽܘܣ ܒܰܪ ܦܺܝܠܺܝܦܳܘܣ ܡܰܠܟܳܐ ܡܰܩܶܕܽܘܢܳܝܳܐ: ܗܰܘ ܕܗܽܘ ܗܘܳܐ ܠܽܘܩܕܰܡ ܡܰܠܟܳܐ ܕܝܰܘ̈ܢܳܝܶܐ.
3 ܘܶܐܬܳܐ ܘܰܒܥܳܐ ܗܘܳܐ ܕܡܶܟܒܫܺܝܗ̇ ܠܰܡܕܺܝܢܬܳܐ ܘܢܶܒܙܺܝܗ̇: ܘܠܳܐ ܐܶܫܟܰܚ. ܡܶܛܽܠ ܕܶܐܬܝܰܕܥܰܬ ܡܶܠܬܳܐ ܠܥܳܡܽܘܪ̈ܶܝܗ̇ ܕܰܡܕܺܝܢܬܳܐ.
4 ܘܩܳܡܘ ܠܩܽܘܒܠܶܗ ܥܳܡܽܘܪ̈ܶܝܗ̇ ܒܰܩܪܳܒܳܐ. ܘܰܥܪܰܩ. ܘܰܫܩܰܠ ܡܶܢ ܬܰܡܳܢ ܒܥܳܩܬܳܐ ܪܰܒܬܳܐ ܘܢܶܗܦܽܘܟ ܠܒܳܒܶܝܠ.
5 ܘܶܐܬܰܘ ܘܶܐܡܰܪܘ ܠܶܗ ܠܰܐܢܛܝܰܟܳܘܣ ܒܦܳܪܶܣ: ܕܶܐܙܕܟܺܝ̈ ܡܰܫܪ̈ܝܳܬܶܗ ܗܳܠܶܝܢ ܕܶܐܙܰܠܝ̈ ܠܺܝܗܽܘܕ.
6 ܘܕܰܐܝܟܰܢܳܐ ܐܶܙܰܠ ܠܽܘܣܺܝܳܐ ܠܽܘܩܕܰܡ ܒܚܰܝܠܳܐ ܪܰܒܳܐ ܘܶܐܙܕܟܺܝ ܡܶܢܗܽܘܢ: ܘܶܐܬܥܰܫܰܢܘ ܒܙܰܝܢܳܐ ܕܒܶܝܬ ܝܺܗܽܘܕܳܐ ܘܰܒܚܰܝܠܳܐ: ܘܰܒܒܶܙܬܳܐ ܣܰܓܺܝܐܬܳܐ ܕܰܢܣܰܒܘ ܡܶܢ ܡܰܫܪ̈ܝܳܬܳܐ.
7 ܘܣܰܚܦܽܘܗ̇ ܠܛܰܡܐܽܘܬܳܐ ܗܳܝ ܕܶܐܬܒܰܢܝܰܬ ܥܰܠ ܡܰܕܒܚܳܐ ܕܒܽܐܘܪܺܫܠܶܡ. ܘܰܠܒܶܝܬ ܡܩܰܕܫܳܐ ܐܰܚܕܪܽܘܗܝ ܫܽܘܖ̈ܶܐ ܪܰܘܪ̈ܒܶܐ ܐܰܝܟ ܕܶܡܢ ܩܕܺܝܡ. ܘܰܠܒܶܝܬ ܫܽܘܪܳܐ ܒܢܰܘ ܕܰܡܕܺܝܢܬܗܽܘܢ.
8 ܘܰܗܘܳܐ ܕܟܰܕ ܫܡܰܥ ܡܰܠܟܳܐ ܗܳܠܶܝܢ ܦܶܬܓ̈ܳܡܶܐ: ܬܡܰܗ ܘܶܐܬܬܙܺܝܥ ܣܰܓܺܝ. ܘܰܢܦܰܠ ܥܰܠ ܥܰܪܣܶܗ ܘܶܐܬܟܪܰܗ ܡܶܢ ܥܳܩܬܶܗ. ܡܶܛܽܠ ܕܠܳܐ ܗܘܳܐ ܠܶܗ ܐܰܝܟ ܕܡܶܬܪܰܥܶܐ ܗܘܳܐ.
9 ܘܰܗܘܳܐ ܬܰܡܳܢ ܝܰܘ̈ܡܳܬܳܐ ܣܰܓܺܝ̈ܐܶܐ. ܡܶܛܽܠ ܕܶܐܬܚܰܕܬܰܬ ܥܠܰܘܗܝ ܥܳܩܬܶܗ. ܘܶܐܬܚܰܫܰܒ ܐܰܢܛܝܰܟܳܘܣ ܕܡܳܐܐܶܬ ܠܶܗ.
10 ܘܰܩܪܳܐ ܠܟܽܠܗܽܘܢ ܪ̈ܳܚܡܰܘܗܝ ܘܶܐܡܰܪ ܠܗܽܘܢ. ܕܦܶܪܕܰܬ ܠܳܗ̇ ܫܶܢܬܳܐ ܡܶܢ ܥܰܝܢܰܝ̈. ܘܠܶܒܝ ܐܶܬܡܣܺܝ ܠܶܗ ܒܓܰܘܝ ܡܶܢ ܪܶܢܝܳܐ ܣܰܓܺܝܐܳܐ.
11 ܘܶܐܡܪܶܬ ܠܶܗ ܠܠܶܒܝ: ܕܰܥܕܰܡܳܐ ܠܰܐܝܢܳܐ ܐܽܘܠܨܳܢܳܐ ܐܶܬܰܝܬ: ܘܰܠܡܰܚܫܽܘܠܳܐ ܗܳܢܳܐ ܪܰܒܳܐ ܕܰܪܡܶܐ ܐ̱ܢܳܐ ܒܶܗ. ܡܶܛܽܠ ܕܒܰܣܺܝܡ ܗܘܺܝܬ ܘܰܪܚܺܝܡ ܒܫܽܘܠܛܳܢܝ.
12 ܗܳܫܳܐ ܕܶܝܢ ܗܳܐ ܡܶܬܰܥܗܕ ܐ̱ܢܳܐ ܒܺܝ̈ܫܳܬܳܐ ܕܥܶܒܕܶܬ ܒܽܐܘܪܺܫܠܶܡ. ܘܢܶܣܒܶܬ ܡܳܐܢ̈ܶܐ ܕܕܰܗܒܳܐ ܘܰܕܟܶܣܦܳܐ ܕܰܒܓܰܘܳܗ̇: ܘܫܰܕܪܶܬ ܕܢܶܥܛܽܘܢ ܠܥܳܡܽܘܪ̈ܶܝܗ̇ ܕܺܝܗܽܘܕܳܐ ܣܪܺܝܩܳܐܺܝܬ.
13 ܝܶܕܥܶܬ ܕܶܝܢ ܕܡܶܛܽܠ ܗܳܠܶܝܢ ܐܶܬܰܝ̈ ܥܠܰܝ ܗܳܠܶܝܢ ܟܽܠܗܶܝܢ ܒܺܝ̈ܫܳܬܳܐ. ܘܗܳܐ ܐܳܒܶܕ ܐ̱ܢܳܐ ܡܶܢ ܥܳܩܬܳܐ ܣܰܓܺܝܐܬܳܐ ܕܒܰܐܪܥܳܐ ܢܽܘܟܪܳܝܬܳܐ.
14 ܘܰܩܪܳܐ ܐܰܢܛܝܰܟܳܘܣ ܠܦܺܝܠܺܝܦܳܘܣ ܚܰܕ ܡܶܢ ܪ̈ܳܚܡܰܘܗܝ. ܘܰܐܩܺܝܡܶܗ ܥܰܠ ܟܽܠܳܗ̇ ܡܰܠܟܽܘܬܶܗ.
15 ܘܝܰܗܒ ܠܶܗ ܬܳܓܳܐ ܘܶܐܣܛܠܶܗ ܘܥܶܙܩܬܶܗ: ܕܢܰܝܬܶܐ ܐܶܢܽܘܢ ܠܰܐܢܛܺܝܰܟܳܘܣ ܒܪܶܗ. ܘܢܪܰܒܶܝܘܗܝ ܐܰܝܟ ܕܢܶܗܘܶܐ ܡܰܠܟܳܐ.
16 ܘܡܺܝܬ ܬܰܡܳܢ ܐܰܢܛܝܰܟܳܘܣ ܡܰܠܟܳܐ: ܒܰܫܢܰܬ ܡܳܐܐ ܘܰܐܪܒܥܺܝܢ ܘܰܬܫܰܥ.
17 ܘܺܝܕܰܥ ܠܽܘܣܺܝܳܐ ܕܡܺܝܬ ܠܶܗ ܡܰܠܟܳܐ: ܘܰܐܩܺܝܡ ܠܰܐܢܛܺܝܰܟܳܘܣ ܒܪܶܗ ܒܡܰܠܟܽܘܬܶܗ: ܗܰܘ ܕܗܽܘ ܪܰܒܝܶܗ ܗܘܳܐ ܡܶܢ ܛܰܠܝܽܘܬܶܗ. ܘܰܩܪܳܐ ܫܡܶܗ ܐܽܘܦܳܛܳܘܪ.
18 ܘܰܐܝܠܶܝܢ ܕܝܳܬܒܺܝ ܗܘܰܘ ܒܡܶܪܕܳܐ: ܚܒܺܝܫܺܝܢ ܗܘܰܘ ܠܺܝܣܪܳܐܶܝܠ ܡܶܢ ܟܽܠ ܚܕܳܖ̈ܰܘܗܝ ܕܒܶܝܬ ܡܰܩܕܫܳܐ. ܘܨܳܒܶܝܢ ܗܘܰܘ ܕܟܽܠ ܡܰܒܐܳܫܽܘ ܢܰܒܐܳܫܽܘܢ. ܘܗܳܘܶܝܢ ܗܘܰܘ ܥܽܘܕܪܳܢܳܐ ܠܥܰܡ̈ܡܶܐ.
19 ܘܶܐܬܚܰܫܰܒ ܝܺܗܽܘܕܳܐ ܕܰܢܪܺܝܡ ܐܶܢܽܘܢ. ܘܟܰܢܶܫ ܠܟܽܠܶܗ ܥܰܡܳܐ ܕܢܶܬܒܽܘܢ ܥܠܰܝܗܽܘܢ.
20 ܘܶܐܬܟܰܢܰܫܘ ܐܰܟܚܕܳܐ ܘܝܺܬܶܒܘ ܥܠܰܝܗܽܘܢ. ܒܰܫܢܰܬ ܡܳܐܐ ܘܚܰܡܫܺܝܢ. ܘܰܥܒܰܕܘ ܠܩܽܘܒܠܗܽܘܢ ܡܰܓ̈ܕܠܶܐ ܘܡܰܐܟܶܢܳܘ̈ܣ ܠܡܶܬܟܰܬܳܫܽܘ ܥܰܡܗܽܘܢ.
21 ܘܰܢܦܰܩܘ ܐ̱ܢܺܫܺܝ̈ܢ ܡܶܢܗܽܘܢ ܡܶܢ ܒܶܝܬ ܚܒܽܘܫܝܳܐ. ܘܰܢܩܶܦܘ ܐܶܢܽܘܢ ܐ̱ܢܳܫ̈ܳܐ ܖ̈ܰܫܺܝܥܶܐ ܡܶܢ ܝܺܣܪܳܐܶܝܠ.
22 ܘܶܐܙܰܠܘ ܠܘܳܬ ܡܰܠܟܳܐ: ܘܶܐܡܰܪܘ ܠܶܗ. ܥܕܰܡܳܐ ܠܶܐܡܰܬܝ ܠܳܐ ܬܶܥܒܶܕ ܕܺܝܢܳܐ ܘܰܬܒܰܥܬܳܐ ܡܶܢ ܐܰܚܰܝ̈ܢ.
23 ܚܢܰܢ ܡܶܨܛܒܶܝܢܰܢ ܕܢܶܦܠܽܘܚ ܥܰܒܕܽܘܬܳܐ ܠܰܐܒܽܘܟ. ܘܰܢܗܰܠܶܟ ܒܟܽܠܗܽܘܢ ܦܽܘܩܕܳܢܰܘ̈ܗܝ. ܘܢܺܐܙܰܠ ܒܳܬܰܪ ܟܽܠܗܽܘܢ ܨܶܒܝܳܢܰܘ̈ܗܝ.
24 ܘܗܳܐ ܒܢܰܝ̈ ܥܰܡܰܢ ܝܳܬܒܺܝܢ ܥܰܠ ܡܶܪܕܳܐ ܡܶܛܽܠܳܬܳܗ̇ ܕܗܳܕܶܐ. ܘܰܥܒܺܝܕܺܝܢܰܢ ܠܗܽܘܢ ܐܰܝܟ ܢܽܘܟܪ̈ܳܝܶܐ. ܘܰܠܟܽܠ ܡܰܢܽܘ ܕܡܶܫܟܚܺܝܢ ܡܶܢܰܢ ܩܳܛܠܺܝܢ: ܘܝܳܪܬܽܘܬܰܢ ܡܶܬܒܰܙܙܳܐ ܡܶܢܗܽܘܢ.
25 ܘܠܳܐ ܗܘܳܐ ܥܠܰܝܢ ܒܰܠܚܽܘܕ ܐܰܘܫܶܛܘ ܐܺܝܕܰܝ̈ܳܐ. ܐܶܠܳܐ ܐܳܦ ܥܰܠ ܟܽܠܗܽܘܢ ܬܚܽܘܡܰܝ̈ܗܽܘܢ.
26 ܘܗܳܐ ܫܪܶܝܢ ܝܰܘܡܳܢܳܐ ܥܰܠ ܡܶܪܕܳܐ ܕܒܽܐܘܪܺܫܠܶܡ. ܘܢܶܟܒܫܽܘܢܳܝܗܝ ܘܰܠܒܶܝܬ ܡܰܩܕܫܳܐ. ܘܰܠܒܶܝܬ ܫܽܘܖ̈ܶܐ ܐܰܥܫܶܢܘ.
27 ܘܶܐܠܳܐ ܒܰܥܓܰܠ ܬܰܕܪܟܽܘܢ ܐܶܢܽܘܢ. ܕܪܰܘܪ̈ܒܳܢ ܘܰܕܝܰܬܺܝܪ̈ܳܢ ܡܶܢ ܗܳܠܶܝܢ ܢܳܥܒܕܽܘܢ. ܘܠܳܐ ܡܶܬܡܨܶܝܢ ܐܢ̱ܬܽܘܢ ܚܰܝܠܗܽܘܢ.
28 ܘܶܐܬܚܰܡܰܬ ܡܰܠܟܳܐ ܟܰܕ ܫܡܰܥ ܗܳܠܶܝܢ. ܘܟܰܢܶܫ ܠܟܽܠܗܽܘܢ ܪ̈ܳܚܡܰܘܗܝ ܘܰܠܖ̈ܰܒܰܝ ܚܰܝܠܶܗ. ܘܠܰܐܝܠܶܝܢ ܕܰܥܒܺܝܕܺܝܢ ܥܰܠ ܡܰܪ̈ܟܒܳܬܳܐ.
29 ܘܡܶܢ ܡܰܠܟ̈ܘܳܬܳܐ ܐ̱ܚܪ̈ܳܢܝܳܬܳܐ ܘܡܶܢ ܓܳܙܪ̈ܳܬܳܐ ܣܰܓܺܝ̈ܐܬܳܐ. ܘܶܐܬܰܘ ܠܘܳܬܶܗ ܚܰܝ̈ܠܶܐ ܕܰܐܓܺܝܪܺܝܢ ܠܶܗ.
30 ܘܺܐܝܬܰܘܗܝ ܗܘܳܐ ܡܶܢܝܳܢܳܐ ܕܚܰܝܠܶܗ: ܡܳܐܐ ܐܰܠܦܺܝ̈ܢ ܪ̈ܶܓܠܳܝܺܢ: ܘܥܶܣܪܺܝܢ ܐܰܠܦܺܝ̈ܢ ܦܰܪ̈ܳܫܶܐ: ܘܦܺܝ̈ܠܶܐ ܬܠܳܬܺܝܢ ܘܰܬܪܶܝܢ ܕܝܳܕܥܺܝܢ ܩܪܳܒܳܐ.
31 ܘܶܐܬܰܘ ܥܰܠ ܐܰܕܽܘܡ. ܘܰܫܪܰܘ ܥܰܠ ܒܶܝܬ ܫܽܘܖ̈ܶܐ. ܘܰܐܩܪܶܒܘ ܝܰܘ̈ܡܳܬܳܐ ܣܰܓܺܝ̈ܐܶܐ. ܘܰܥܒܰܕܘ ܡܰܐܟܶܢܳܘ̈ܣ. ܘܰܢܦܰܩܘ ܘܰܐܘܩܶܕܘ ܐܶܢܶܝܢ ܒܢܽܘܪܳܐ. ܘܶܐܬܟܰܬܰܫܘ ܓܰܢܒܳܪܳܐܺܝܬ.
32 ܘܰܫܩܰܠ ܡܶܢ ܝܺܗܽܘܕܳܐ ܡܶܢ ܒܶܝܬ ܡܶܪܕܳܐ. ܘܰܫܪܳܐ ܥܰܠ ܓܶܢܒ ܒܶܝܬ ܙܟܰܪܝܳܐ: ܠܽܘܩܒܰܠ ܡܰܫܪܶܝܬܶܗ ܕܡܰܠܟܳܐ.
33 ܘܩܰܕܶܡ ܡܰܠܟܳܐ ܒܨܰܦܪܳܐ. ܘܕܰܒܪܳܗ̇ ܠܡܰܫܪܺܝܬܳܐ ܒܚܺܐܦܳܐ ܒܽܐܘܪܚܳܐ ܕܒܶܝܬ ܙܟܰܪܝܳܐ. ܘܶܐܬܥܰܬܰܕܘ ܚܰܝ̈ܠܶܐ ܠܰܩܪܳܒܳܐ. ܘܰܩܪܰܘ ܒܩܰܪ̈ܢܳܬܳܐ.
34 ܘܰܠܦܺܝ̈ܠܶܐ ܚܰܘܺܝܘ ܐܶܢܽܘܢ ܕܡܳܐ ܕܥܶܢ̈ܒܶܐ ܘܰܕܬܽܘ̈ܬܶܐ. ܘܛܰܝܶܒܘ ܐܶܢܽܘܢ ܠܰܩܪܳܒܳܐ.
35 ܘܦܰܠܶܓܘ ܐܶܢܽܘܢ ܒܰܦ̈ܠܰܓܶܐ. ܘܰܐܫܠܶܡܘ ܠܟܽܠ ܚܰܕ ܚܰܕ ܡܶܢ ܦܺܝ̈ܠܶܐ ܐܳܠܶܦ ܓܰܒܪ̈ܺܝܢ ܕܡܰܠܒܫܺܝܢ ܒܫܶܪ̈ܝܳܢܶܐ ܕܦܰܪܙܠܳܐ: ܘܣܺܝܡܺܝܢ ܣܰܢܘܪ̈ܳܬܳܐ ܕܰܢܚܳܫܳܐ ܒܪ̈ܺܝܫܰܝܗܽܘܢ. ܘܚܰܡܶܫܡܳܐܐ ܦܰܪ̈ܳܫܺܝܢ ܕܰܒܺܝܩܺܝܢ ܠܚܰܕ ܚܰܕ ܡܶܢ ܦܺܝ̈ܠܶܐ ܕܡܰܓܒܶܝܢ.
36 ܗܳܠܶܝܢ ܡܶܢ ܩܕܳܡ ܙܰܒܢܳܐ. ܘܠܰܐܝܟܳܐ ܕܳܐܙܶܠ ܗܘܳܐ ܚܰܕ ܡܶܢܗܽܘܢ: ܬܰܡܳܢ ܗܳܘܶܝܢ ܗܘܰܘ ܐܳܦ ܗܳܠܶܝܢ. ܘܠܳܐ ܡܰܪܚܩܺܝܢ ܗܘܰܘ ܡܶܢ ܠܘܳܬܶܗ.
37 ܘܺܐܝܬ ܗܘܳܐ ܠܥܶܠ ܡܶܢܗܽܘܢ ܡܰܓ̈ܕܠܶܐ ܕܩܰܝ̈ܣܶܐ ܥܰܫܺܝ̈ܢܶܐ: ܕܡܰܛܠ̱ܠܺܝܢ ܗܘܰܘ ܥܰܠ ܚܰܕ ܚܰܕ ܡܶܢ ܦܺܝ̈ܠܶܐ: ܘܰܡܚܰܙܩܺܝܢ ܗܘܰܘ ܒܡܰܐܟܶܢܳܘ̈ܣ. ܘܥܰܠ ܟܽܠ ܚܰܕ ܚܰܕ ܡܶܢܗܽܘܢ: ܓܰܒܖ̈ܶܐ ܕܚܰܝܠܳܐ ܬܠܳܬܺܝܢ: ܗܳܢܽܘܢ ܕܡܰܩܪܒܺܝܢ ܗܘܰܘ ܥܠܰܘܗܝ ܘܰܡܕܰܒܪܳܢܶܗ.
38 ܘܰܠܫܰܪܟܳܐ ܕܦܰܪ̈ܳܫܶܐ: ܐܰܩܺܝܡܘ ܡܶܟܳܐ ܘܡܶܟܳܐ ܡܶܢ ܬܖ̈ܰܝܗܽܘܢ ܓܰܒ̈ܶܐ ܕܡܰܫܪܺܝܬܳܐ ܟܰܕ ܡܰܩܪܒܺܝܢ. ܘܰܡܚܰܘܶܝܢ ܚܶܙܘܳܐ ܕܙܰܝܢܗܽܘܢ ܒܓܰܘ ܦܶܠܓܶܐ.
39 ܘܰܗܘܳܐ ܕܶܝܢ ܟܰܕ ܕܢܰܚ ܫܶܡܫܳܐ ܘܰܨܡܰܚ ܥܰܠ ܡܓܰܢ̈ܶܐ ܕܕܰܗܒܳܐ ܘܕܰܢܚܳܫܳܐ: ܡܰܢܗܪܺܝܢ ܗܘܰܘ ܘܡܰܙܗܪܺܝܢ ܛܽܘܖ̈ܶܐ ܡܶܢܗܶܝܢ ܐܰܝܟ ܠܰܡܦܺܝ̈ܕܶܐ ܕܢܽܘܪܳܐ.
40 ܘܡܶܢܳܗ̇ ܡܶܢ ܡܰܫܪܺܝܬܳܐ ܐܶܣܬܰܪܕܰܬ ܘܩܳܡܰܬ ܥܰܠ ܛܽܘܖ̈ܶܐ ܪ̈ܳܡܶܐ. ܘܡܶܢܳܗ̇ ܥܰܠ ܛܽܘܖ̈ܶܐ ܙܥܽܘܖ̈ܶܐ. ܘܳܐܬܶܝܢ ܗܘܰܘ ܬܟܺܝܠܳܐܺܝܬ ܒܣܶܕܖ̈ܰܝܗܽܘܢ.
41 ܘܡܶܬܬܙܺܝܥܺܝܢ ܗܘܰܘ ܟܽܠܗܽܘܢ ܐܰܝܠܶܝܢ ܕܫܳܡܥܺܝܢ ܗܘܰܘ ܩܳܠܳܐ ܕܚܰܝܠܗܽܘܢ. ܘܗܶܠܟܬܳܐ ܕܣܽܘܓܐܗܽܘܢ: ܘܰܢܩܳܫܳܐ ܕܙܰܝܢܗܽܘܢ. ܐܺܝܬܶܝܗ̇ ܗܘܳܬ ܓܶܝܪ ܡܰܫܪܺܝܬܳܐ ܪܰܒܳܐ ܘܥܰܫܺܝܢܳܐ ܣܰܓܺܝ.
42 ܘܰܩܪܶܒ ܝܺܗܽܘܕܳܐ ܘܡܰܫܪܺܝܬܶܗ ܠܰܩܪܳܒܳܐ. ܘܰܢܦܰܠܘ ܡܶܢ ܡܰܫܪܺܝܬܶܗ ܕܡܰܠܟܳܐ ܫܶܬܡܳܐܐ ܓܰܒܪ̈ܺܝܢ.
43 ܘܰܚܙܳܐ ܐܶܠܺܝܥܳܙܰܪ ܕܡܶܬܩܪܶܐ ܚܰܘܪܳܢ ܠܚܰܕ ܡܶܢ ܦܺܝ̈ܠܶܐ: ܕܰܡܚܰܙܰܩ ܒܙܰܝܢܳܐ ܕܡܰܠܟܽܘܬܳܐ: ܘܰܡܝܰܬܰܪ ܗܘܳܐ ܡܶܢ ܟܽܠܗܽܘܢ ܦܺܝ̈ܠܶܐ. ܘܶܐܬܚܙܺܝ ܕܒܶܗ ܗܽܘ ܡܰܠܟܳܐ.
44 ܘܝܰܗܒ ܢܰܦܫܶܗ ܕܢܶܦܪܽܘܩ ܠܥܰܡܶܗ ܘܰܕܢܶܥܒܶܕ ܠܶܗ ܫܡܳܐ ܠܥܳܠܰܡ.
45 ܘܰܪܗܶܛ ܥܠܰܘܗܝ ܒܚܰܝܠܳܐ ܘܒܰܠܒܺܝܒܽܘܬܳܐ ܒܰܝܢܰܬ ܡܰܫܪ̈ܝܳܬܳܐ ܘܰܦܠܰܓ̈ܶܐ: ܘܰܚܪܰܒ ܗܘܳܐ ܠܝܰܡܺܝܢܶܗ ܘܰܠܣܶܡܳܠܶܗ. ܘܥܳܪܩܺܝܢ ܗܘܰܘ ܡܶܢ ܩܕܳܡܰܘܗܝ ܠܟܳܐ ܘܰܠܟܳܐ.
46 ܘܥ̣ܰܠ ܬܚܽܘܬܰܘܗܝ ܕܦܺܝܠܳܐ: ܘܰܡܚܳܝܗܝ ܒܟܰܪܣܶܗ ܒܣܰܝܦܳܐ ܘܩܰܛܚܶܗ. ܘܰܢܦܰܠ ܠܥܶܠ ܡܶܢܶܗ ܥܰܠ ܐܰܪܥܳܐ: ܘܡܺܝܬ ܬܰܡܳܢ.
47 ܘܰܚܙܳܐ ܝܺܗܽܘܕܳܐ ܥܽܘܫܢܳܗ̇ ܕܡܰܠܟܽܘܬܳܐ ܘܛܽܘܝܳܒܶܗ ܕܚܰܝܠܳܐ. ܘܰܐܪܟܶܢ ܡܶܢܗܽܘܢ.
48 ܘܡܶܢ ܡܰܫܪܺܝܬܶܗ ܕܡܰܠܟܳܐ ܣܳܠܩܺܝܢ ܗܘܰܘ ܠܩܽܘܒܠܗܽܘܢ ܠܽܐܘܪܺܫܠܶܡ. ܘܰܫܪܳܐ ܡܰܠܟܳܐ ܒܺܝܗܽܘܕ ܘܰܒܛܽܘܪܳܐ ܕܨܶܗܝܽܘܢ.
49 ܘܰܥܒܰܕ ܫܠܳܡܳܐ ܥܰܡ ܐܰܝܠܶܝܢ ܕܺܐܝܬ ܗܘܰܘ ܒܫܽܘܖ̈ܶܐ. ܘܰܢܦܰܩܘ ܡܢ ܡܕܺܝܢܬܳܐ: ܡܶܛܽܠ ܕܠܰܝܬ ܗܘܳܐ ܠܗܽܘܢ ܐܰܣܳܢܳܐ ܕܢܶܬܚܰܒܫܽܘܢ ܒܓܰܘܳܗ̇. ܡܶܛܽܠ ܕܫܰܒܬܳܐ ܗܘܳܬ ܕܰܐܪܥܳܐ.
50 ܘܟܰܒܫܶܗ ܡܰܠܟܳܐ ܠܒܶܝܬ ܫܽܘܪܳܐ. ܘܰܐܩܺܝܡ ܬܰܡܳܢ ܡܰܛܰܪܬܳܐ ܕܢܶܗܘܽܘܢ ܢܳܛܪܺܝܢ ܠܶܗ.
51 ܘܰܫܪܳܐ ܥܰܠ ܒܶܝܬ ܡܰܩܕܫܳܐ: ܘܶܐܬܟܰܬܰܫ ܥܠܰܘܗܝ ܝܰܘ̈ܡܳܬܳܐ ܣܰܓܺܝ̈ܐܶܐ. ܘܰܐܩܺܝܡ ܬܰܡܳܢ ܡܰܓ̈ܕܠܶܐ ܘܡܰܐܟܶܢܳܘ̈ܣ: ܠܡܰܩܪܳܒܽܘ ܥܠܰܝܗܽܘܢ: ܘܰܠܡܶܫܕܳܐ ܒܒܰܠܶܣܛܽܘܣ ܓܶܐܖ̈ܶܐ ܘܟܺܐܦ̈ܶܐ ܘܢܽܘܪܳܐ.
52 ܘܰܥܒܰܕܘ ܐܳܦ ܗܶܢܽܘܢ ܡܰܐܟܶܢܳܘ̈ܣ ܠܽܘܩܒܰܠ ܡܰܐܟܳܢ̈ܘܳܬܗܽܘܢ. ܘܰܐܩܪܶܒܘ ܝܰܘ̈ܡܳܬܳܐ ܣܰܓܺܝ̈ܐܶܐ.
53 ܐܰܣܳܢܳܐ ܕܶܝܢ ܠܰܝܬ ܗܘܳܐ ܒܶܝܬ ܡܰܩܕܫܳܐ. ܡܶܛܽܠ ܕܫܰܢܬܳܐ ܗܘܳܬ ܫܒܺܝܥܳܝܬܳܐ. ܘܰܐܝܠܶܝܢ ܕܡܶܬܦܰܨܶܝܢ ܗܘܰܘ ܡܶܢ ܒܶܝܬ ܥܰܡ̈ܡܶܐ: ܐܳܟܠܺܝܢ ܗܘܰܘ ܠܳܗ̇ ܠܫܰܪܟܳܐ ܕܣܰܝܒܳܪܬܳܗ̇.
54 ܘܶܐܫܬܚܰܪ ܒܒܶܝܬ ܡܰܩܕܫܳܐ ܐ̱ܢܳܫ̈ܳܐ ܙܥܽܘܖ̈ܶܐ: ܡܶܛܽܠ ܕܰܥܫܶܢ ܥܠܰܝܗܽܘܢ ܟܰܦܢܳܐ. ܘܶܐܬܒܰܕܰܪܘ ܐܠܢܳܫ ܠܰܐܬܪܶܗ.
55 ܘܰܫܡܰܥ ܠܽܘܣܺܝܳܐ ܕܦܺܝܠܺܝܦܳܘܣ ܗܰܘ ܕܰܐܩܺܝܡܶܗ ܗܘܳܐ ܐܰܢܛܝܰܟܳܘܣ ܥܰܕ ܗܽܘ ܚܰܝ ܕܰܢܪܰܒܶܐ ܠܰܒܪܶܗ ܘܢܰܡܠܟܺܝܘܗܝ.
56 ܗܦܰܟ ܡܶܢ ܦܳܪܶܣ ܘܡܳܕܰܝ ܘܥܰܡܶܗ ܟܽܠܶܗ ܚܰܝܠܳܐ ܕܳܐܙܶܠ ܗܘܳܐ ܥܰܡ ܡܰܠܟܳܐ: ܕܰܨܒܳܐ ܕܢܶܚܽܘܕ ܨܶܒ̈ܘܳܬܳܐ ܕܡܰܠܟܽܘܬܳܐ.
57 ܘܡܶܣܬܰܪܗܰܒ ܗܘܳܐ ܕܢܺܐܙܰܠ. ܘܶܐܡܰܪ ܠܽܘܣܺܝܳܐ ܠܡܰܠܟܳܐ ܘܠܰܡܕܰܒܪ̈ܳܢܰܘܗܝ ܕܚܰܝܠܳܐ ܘܰܠܪܰܘܪ̈ܒܳܢܶܐ ܕܥܰܡܳܐ. ܡܶܬܓܰܡܪܺܝܢܰܢ ܗܳܪܟܳܐ. ܘܣܰܝܒܳܪܬܳܐ ܙܥܽܘܪܝܳܐ ܗ̱ܝ ܠܰܢ. ܘܰܐܬܪܳܐ ܗܳܢܳܐ ܕܰܫܪܰܝܢܰܢ ܥܠܰܘܗܝ: ܥܰܫܺܝܢ ܗܽܘ ܚܶܣܢܶܗ ܣܰܓܺܝ: ܘܨܶܒ̈ܘܳܬܳܐ ܕܡܰܠܟܽܘܳܐ ܣܺܝ̈ܡܳܢ ܥܠܰܝܢ.
58 ܗܳܫܳܐ ܢܶܬܶܠ ܝܰܡܺܝܢܳܐ ܠܗܳܠܶܝܢ ܐ̱ܢܳܫ̈ܳܐ. ܘܢܶܥܒܶܕ ܥܰܡܗܽܘܢ ܫܠܳܡܳܐ ܘܥܰܡ ܟܽܠܶܗ ܥܰܡܗܽܘܢ.
59 ܘܰܢܩܺܝܡ ܠܗܽܘܢ ܕܰܢܗܰܠܟܽܘܢ ܒܢܳܡܽܘ̈ܣܰܝܗܽܘܢ: ܐܰܝܟ ܕܡܶܢ ܩܕܺܝܡ. ܡܶܛܽܠ ܓܶܝܪ ܕܒܰܛܶܠܢ ܢܳܡܽܘܣܰܝ̈ܗܽܘܢ ܐܶܬܚܰܡܰܬܘ ܘܰܪܓܶܙܘ: ܘܰܥܒܰܕܘ ܗܳܠܶܝܢ ܟܽܠܗܶܝܢ.
60 ܘܫܶܦܪܰܬ ܡܶܠܬܳܐ ܩܕܳܡ ܡܰܠܟܳܐ ܘܪܰܘܪ̈ܒܳܢܰܘܗܝ. ܘܫܰܕܰܪܘ ܠܘܳܬܗܽܘܢ ܕܢܶܥܒܶܕ ܥܰܡܗܽܘܢ ܫܠܳܡܳܐ. ܘܩܰܒܶܠܘ ܡܶܢܗܽܘܢ.
61 ܘܺܝܡܳܐ ܠܗܽܘܢ ܡܰܠܟܳܐ ܘܪܰܘܪ̈ܒܳܢܰܘܗܝ. ܘܥܰܠ ܗܳܠܶܝܢ ܢܦܰܩܘ ܡܶܢ ܚܶܣܢܗܽܘܢ.
62 ܘܥ̣ܰܠ ܡܰܠܟܳܐ ܠܛܽܘܪܳܐ ܕܨܶܗܝܽܘܢ. ܘܰܚܙܳܐ ܚܶܣܢܶܗ ܕܳܐܬܪܳܐ: ܘܰܗܦܰܟ ܒܡܰܘ̈ܡܳܬܳܐ ܕܺܝܡܳܐ. ܘܰܦܩܰܕ ܕܢܶܣܬܪܽܘܢܳܝܗܝ. ܫܽܘܪܳܐ ܟܰܕ ܚܳܕܰܪ.
63 ܘܰܫܩܰܠ ܡܶܢ ܬܰܡܳܢ: ܘܰܗܦܰܟ ܚܦܺܝܛܳܐܺܝܬ ܠܰܐܢܛܝܳܟܺܝܰܐ. ܘܶܐܫܟܚܶܗ ܠܦܺܝܠܺܝܦܳܘܣ ܕܰܐܚܕܳܗ̇ ܠܰܡܕܺܝܢܬܳܐ ܘܶܐܫܬܰܠܰܛ ܥܠܶܝܗ̇. ܘܰܐܩܪܶܒ ܥܰܡܶܗ. ܘܢܰܣܒܳܗ̇ ܠܰܡܕܺܝܢܬܳܐ ܡܶܢܶܗ ܒܰܩܛܺܝܪܳܐ.