1 Maccabees 5
The First Book of Maccabees
܀ ܐ ܡܩܒܝ̈ܐ ܗ ܀
1 ܘܰܗܘܳܐ ܟܰܕ ܫܡܰܥܘ ܥܰܡ̈ܡܶܐ ܕܒܰܚܕܳܖ̈ܰܝܗܽܘܢ: ܐܶܬܒܢܺܝ ܡܕܰܒܚܳܐ ܘܶܐܬܚܰܕܰܬ ܒܶܝܬ ܡܰܩܕܫܳܐ ܐܰܝܟ ܕܡܶܢ ܩܕܺܝܡ ܐܶܬܚܰܡܰܬܘ ܣܰܓܺܝ.
2 ܘܶܐܬܚܰܫܰܒܘ ܕܢܶܣܩܽܘܢ ܘܢܶܥܛܽܘܢܳܝܗܝ ܠܙܰܪܥܶܗ ܕܝܰܥܩܽܘܒ: ܗܳܢܽܘܢ ܕܥܳܡܪܺܝܢ ܒܰܝܢܳܬܗܽܘܢ. ܘܫܰܪܺܝܘ ܩܳܛܠܺܝܢ ܘܚܳܪܒܺܝܢ ܒܥܰܡܳܐ.
3 ܘܡܰܩܪܶܒ ܗܘܳܐ ܝܺܗܽܘܕܳܐ ܥܰܡ ܒܢܰܝ̈ ܥܺܣܽܘ ܒܰܐܕܽܘܡ ܒܰܥܩܰܪܒܳܬ. ܡܶܛܽܠ ܕܝܳܬܒܺܝܢ ܗܘܰܘ ܥܰܡ ܝܺܣܪܳܐܶܝܠ. ܘܰܡܚܳܐ ܐܶܢܽܘܢ ܡܚܽܘܬܳܐ ܪܰܒܬܳܐ. ܘܒܰܕܰܪ ܐܶܢܽܘܢ. ܘܰܢܣܰܒ ܒܶܙܬܗܽܘܢ.
4 ܘܶܐܬܕܟܰܪ ܒܺܝ̈ܫܳܬܳܐ ܕܰܒܢܰܝ̈ ܒܰܝܐܰܢ: ܗܳܢܽܘܢ ܕܺܐܝܬܰܝܗܽܘܢ ܗܘܰܘ ܠܥܰܡܳܐ ܠܦܰܚܳܐ ܘܰܠܡܰܟܫܽܘܠܳܐ: ܕܟܳܡܢܺܝܢ ܗܘܰܘ ܠܗܽܘܢ ܒܶܝܬ ܐܽܘܪ̈ܚܳܬܳܐ.
5 ܘܰܚܒܰܫ ܐܶܢܽܘܢ ܒܡܰܓܕ̈ܠܶܐ. ܘܰܐܪܡܺܝ ܥܠܰܝܗܽܘܢ ܘܰܐܚܪܶܡ ܐܶܢܽܘܢ. ܘܰܐܘܩܶܕ ܡܰܓܕ̈ܠܶܝܗ̇ ܒܢܽܘܪܳܐ ܥܰܡ ܟܽܠܡܶܕܶܡ ܕܺܐܝܬ ܒܗܽܘܢ.
6 ܘܰܥܒܰܪ ܝܺܗܽܘܕܳܐ ܥܰܠ ܒܢܰܝ̈ ܥܰܡܽܘܢ. ܘܶܐܫܟܰܚ ܥܰܡܳܐ ܥܰܫܺܝܢܳܐ ܘܺܐܝܕܳܐ ܬܰܩܺܝܦܬܳܐ. ܘܛܺܝܡܳܬܶܐܘܳܣ ܗܘܳܐ ܡܕܰܒܪܳܢܗܽܘܢ.
7 ܘܰܐܩܪܶܒ ܥܰܡܗܽܘܢ ܩܪ̈ܳܒܶܐ ܪܰܘܪ̈ܒܶܐ. ܘܶܐܬܬܒܰܪܘ ܩܕܳܡ ܐܰܦܰܘ̈ܗܝ. ܘܰܡܚܳܐ ܐܶܢܽܘܢ.
8 ܘܟܰܒܫܳܗ̇ ܠܝܰܥܙܺܝܪ ܘܠܰܒ̈ܢܳܬܳܗ̇. ܘܰܗܦܰܟ ܝܺܗܺܘܕܳܐ ܠܰܐܕܽܘܡ.
9 ܘܶܐܬܟܰܢܰܫܘ ܥܰܡ̈ܡܶܐ ܕܰܒܓܶܠܥܳܕ ܥܰܠ ܝܺܣܪܳܐܶܝܠ: ܗܳܢܽܘܢ ܕܺܐܝܬܰܝܗܽܘܢ ܗܘܰܘ ܒܰܬܚܽܘܡܰܝ̈ܗܽܘܢ: ܐܰܝܟ ܕܢܶܥܛܽܘܢ ܐܶܢܽܘܢ. ܘܰܥܪܰܩܘ ܠܪܳܡܬܳܐ ܚܶܣܢܳܐ.
10 ܘܫܰܕܰܪܘ ܐܶܓܪ̈ܳܬܳܐ ܠܘܳܬ ܝܺܗܽܘܕܳܐ ܘܰܐܚܰܘ̈ܗܝ ܘܳܐܡܪܺܝܢ ܠܶܗ. ܐܶܬܟܰܢܰܫܘ ܥܠܰܝܢ ܥܰܡ̈ܡܶܐ ܕܒܰܚܕܳܖ̈ܰܝܢ: ܐܰܝܟ ܕܢܶܥܛܽܘܢܳܢ.
11 ܘܗܳܐ ܡܶܬܥܰܬܕܺܝܢ ܕܢܺܐܬܽܘܢ ܘܢܶܟܒܫܽܘܢ ܚܶܣܢܳܐ ܗܳܢܳܐ ܕܰܡܪܺܝܕܺܝܢܰܢ ܒܶܗ. ܘܛܺܝܡܳܬܶܐܘܳܣ ܗܽܘܝܽܘ ܡܕܰܒܪܳܢܗܽܘܢ.
12 ܗܳܫܳܐ ܕܶܝܢ ܬܳܐ ܘܰܦܪܽܘܩܰܝܢ ܡܶܢ ܐܺܝܕܰܝ̈ܗܽܘܢ. ܡܶܛܽܠ ܕܰܢܦܰܠ ܡܶܢܰܢ ܥܰܡܳܐ ܣܰܓܺܝܐܳܐ.
13 ܘܟܽܠܗܽܘܢ ܐܰܚܰܝ̈ܢ ܕܺܐܝܬܰܝܗܽܘܢ ܗܘܰܘ ܒܛܽܘ̈ܒܺܝܢ ܡܺܝܬܘ. ܘܰܫܒܰܘ ܢܶܫܰܝ̈ܗܽܘܢ ܘܰܒܢܰܝ̈ܗܽܘܢ ܘܟܶܠܳܗ̇ ܝܺܩܰܪܬܗܽܘܢ. ܘܰܐܘܒܶܕܘ ܬܰܡܳܢ ܐܰܝܟ ܐܳܠܶܦ ܐ̱ܢܳܫܺܝ̈ܢ.
14 ܘܟܰܕ ܗܳܠܶܝܢ ܐܶܓܪ̈ܳܬܳܐ ܡܶܬܩܰܪ̈ܝܳܢ ܗܘܰܝ̈: ܘܗܳܐ ܡܰܠܰܐܟ̈ܶܐ ܐ̱ܚܪ̈ܳܢܶܐ ܐܶܬܰܘ ܡܶܢ ܓܠܺܝܠܳܐ: ܟܰܕ ܡܣܰܕܩܺܝܢ ܢܰܚ̈ܬܰܝܗܽܘܢ ܘܰܡܣܰܒܪܺܝܢ ܐܰܝܟ ܡ̈ܶܠܶܐ ܗܳܠܶܝܢ.
15 ܘܳܐܡܪܺܝܢ: ܕܶܐܬܟܰܢܰܫܘ ܥܠܰܝܢ ܡܶܢ ܦܛܽܘܠܡܶܐܳܘܣ ܘܨܽܘܪ ܘܨܰܝܕܳܢ ܘܟܽܠܶܗ ܓܠܺܝܠܳܐ: ܥܰܡ̈ܡܶܐ ܢܽܘܟܪ̈ܳܝܶܐ ܐܰܝܟ ܕܢܶܥܛܽܘܢܳܢ ܘܢܶܓܡܪܽܘܢܳܢ.
16 ܘܟܰܕ ܫܡܰܥ ܕܶܝܢ ܝܺܗܽܘܕܳܐ ܘܟܽܠܶܗ ܥܰܡܳܐ ܠܗܳܠܶܝܢ ܦܶܬܓ̈ܳܡܶܐ: ܐܶܬܟܰܢܰܫܘ ܟܢܽܘܫܬܳܐ ܪܰܒܬܳܐ ܕܢܶܬܡܰܠܟܽܘܢ: ܕܡܳܢܳܐ ܢܶܥܒܕܽܘܢ ܠܰܐܚܰܝ̈ܗܽܘܢ ܐܰܝܠܶܝܢ ܕܶܐܝܬܰܝܗܽܘܢ ܗܘܰܘ ܒܽܐܘܠܨܳܢܳܐ ܕܡܶܬܰܐܠܨܺܝܢ ܗܘܰܘ ܡܶܢܗܽܘܢ.
17 ܘܶܐܡܰܪ ܝܺܗܽܘܕܳܐ ܠܫܶܡܥܽܘܢ ܐܰܚܽܘܗܝ. ܟܰܢܶܫ ܠܳܟ ܓܰܒܖ̈ܶܐ. ܘܙܶܠ ܦܪܽܘܩ ܠܰܐܚܰܝ̈ܟ ܗܳܢܽܘܢ ܕܺܝܬ ܒܰܓܠܺܝܠܳܐ. ܐܶܢܳܐ ܕܶܝܢ ܘܝܽܘܢܳܬܳܢ ܐܳܚܝ: ܢܺܐܙܰܠ ܠܓܶܠܥܳܕ.
18 ܘܰܫܒܰܩ ܠܝܰܘܣܶܦ ܒܰܪ ܙܟܰܪܝܳܐ: ܘܰܠܥܶܙܰܪܝܳܐ ܡܕܰܒܪ̈ܳܢܶܐ ܕܥܰܡܳܐ: ܥܰܡ ܫܰܪܟܶܗ ܕܚܰܝܠܳܐ ܕܒܺܝܗܽܘܕ ܕܢܶܗܘܽܘܢ ܢܳܛܪܺܝܢ.
19 ܘܦܰܩܶܕ ܐܶܢܽܘܢ ܘܶܐܡܰܪ ܠܗܽܘܢ. ܚܙܰܘ ܝܺܨܰܦܘ ܕܗܳܢܳܐ ܥܰܡܳܐ. ܘܠܳܐ ܬܶܡܚܽܘܢ ܩܪܳܒܳܐ ܥܰܡ ܥܰܡ̈ܡܶܐ: ܥܕܰܡܳܐ ܕܢܶܗܦܽܘܟ ܘܢܺܐܬܶܐ.
20 ܘܶܐܬܦܰܠܰܓ ܥܰܡ ܫܶܡܥܽܘܢ ܬܠܳܬܳܐ ܐܰܠܦܺܝ̈ܢ ܓܰܒܪ̈ܺܝܢ: ܕܢܺܐܙܽܠܘܢ ܥܰܡܶܗ ܠܰܓܠܺܝܠܳܐ. ܘܥܰܡ ܝܺܗܽܘܕܳܐ ܬܡܳܢܝܳܐ ܐܰܠܦܺܝ̈ܢ ܓܰܒܪ̈ܺܝܢ ܠܓܶܠܥܳܕ.
21 ܘܶܐܙܰܠ ܫܶܡܥܽܘܢ ܠܰܓܠܺܝܠܳܐ. ܘܰܐܩܪܶܒ ܩܪ̈ܳܒܶܐ ܪܰܘܪ̈ܒܶܐ ܥܰܡ ܥܰܡ̈ܡܶܐ. ܘܶܐܬܬܒܰܪܘ ܥܰܡ̈ܡܶܐ ܡܶܢ ܩܕܳܡ ܐܰܦܰܘ̈ܗܝ.
22 ܘܰܪܕܰܦ ܒܳܬܰܪܗܽܘܢ ܥܕܰܡܳܐ ܠܰܦܛܽܘܠܡܶܐܳܘܣ. ܘܰܢܦܰܠܘ ܡܶܢ ܥܰܡ̈ܡܶܐ ܐܰܝܟ ܬܠܳܬܳܐ ܐܰܠܦܺܝ̈ܢ ܓܰܒܪ̈ܺܝܢ. ܘܰܢܣܰܒܘ ܒܶܙܬܗܽܘܢ.
23 ܘܰܕܒܰܪ ܫܶܡܥܽܘܢ ܐܰܝܠܶܝܢ ܕܒܰܓܠܺܝܠܳܐ ܘܰܕܒܰܪܕܒܰܛ ܥܰܡ ܢܶܫܰܝ̈ܗܽܘܢ ܘܰܒܢܰܝ̈ܗܽܘܢ ܘܟܽܠܳܗ̇ ܝܺܩܰܪܬܗܽܘܢ. ܘܰܐܝܬܺܝ ܐܶܢܽܘܢ ܠܺܝܗܽܘܕ ܒܒܽܘܣܳܡܳܐ ܪܰܒܳܐ.
24 ܘܺܝܗܽܘܕܳܐ ܘܡܰܩܒܰܝ ܘܝܽܘܢܳܬܳܢ ܐܰܚܽܘܗܝ: ܥܒܰܪܘ ܝܽܘܪܕܢܳܢ. ܘܶܐܙܰܠܘ ܡܰܪܕܳܐ ܬܠܳܬܳܐ ܝܰܘ̈ܡܺܝܢ ܒܡܕܰܒܪܳܐ.
25 ܘܰܐܪܰܥܘ ܐܶܢܽܘܢ ܢܰܒܛܳܝ̈ܶܐ: ܘܩܰܒܶܠܘ ܐܶܢܽܘܢ ܒܰܫܠܳܡܳܐ. ܘܶܐܫܬܰܥܺܝܘ ܠܗܽܘܢ ܟܽܠܡܶܕܶܡ ܕܰܓܕܰܫ ܠܰܐܚܰܝ̈ܗܽܘܢ ܒܓܶܠܥܳܕ.
26 ܘܰܕܣܰܓܺܝ̈ܐܶܐ ܡܶܢܗܽܘܢ ܐܰܚܺܝܕܺܝܢ ܒܒܽܘܨܪܳܐ ܘܰܒܒܽܘܣܰܪܝܳܐ: ܘܰܒܐܳܠܺܝܡ: ܘܰܒܟܶܣܦܳܘܪ: ܘܰܒܡܳܩܳܪ: ܘܰܒܩܰܪܢܳܐ. ܗܳܠܶܝܢ ܟܽܠܗܶܝܢ ܡܕܺܝ̈ܢܳܬܳܐ ܕܪܰܘܪ̈ܒܳܢ ܘܥܰܫܺܝ̈ܢܳܢ.
27 ܘܰܒܫܰܪܟܳܐ ܕܰܡܕܺܝ̈ܢܳܬܳܐ ܕܰܒܓܶܠܥܳܕ ܐܰܚܺܝܕܺܝܢ. ܘܠܰܡܚܳܪ ܡܛܰܝܒܺܝܢ ܕܢܰܪܡܽܘܢ ܥܰܠ ܚܶܣܢ̈ܶܐ. ܘܰܢܣܰܚܦܽܘܢ ܐܶܢܽܘܢ ܘܢܰܘܒܕܽܘܢ ܠܟܽܠܗܽܘܢ ܒܝܰܘܡܳܐ ܚܰܕ.
28 ܘܰܗܦܰܟ ܝܺܗܽܘܕܳܐ ܘܟܽܠܳܗ̇ ܡܰܫܪܺܝܬܶܗ ܒܽܐܘܪܚܳܐ ܕܡܰܕܒܪܳܐ ܕܒܽܘܨܪܳܐ: ܘܡܶܢ ܫܶܠܝܳܐ ܢܦܰܠܘ ܥܰܠ ܡܕܺܝܢܬܳܐ. ܘܩܰܛܶܠܘ ܒܳܗ̇ ܟܽܠ ܕܶܟܪܳܐ ܒܦܽܘܡܳܐ ܕܚܰܪܒܳܐ. ܘܰܢܣܰܒܘ ܟܽܠܳܗ̇ ܒܶܙܬܗܽܘܢ: ܘܰܐܘܩܶܕܘ ܒܢܽܘܪܳܐ.
29 ܘܰܫܩܰܠ ܝܺܗܽܘܕܳܐ ܡܶܢ ܬܰܡܳܢ ܒܠܺܠܝܳܐ: ܘܶܐܙܰܠܘ ܥܕܰܡܳܐ ܠܚܶܣܢܳܐ.
30 ܘܰܗܘܳܐ ܠܨܰܦܪܶܗ ܕܝܰܘܡܳܐ: ܘܰܐܪܺܝܡܘ ܥܰܝܢܰܝ̈ܗܽܘܢ ܘܰܚܙܰܘ: ܘܗܳܐ ܥܰܡܳܐ ܣܰܓܺܝܐܳܐ ܕܠܰܝܬ ܠܶܗ ܡܶܢܝܳܢܳܐ. ܕܰܫܩܺܝܠܺܝܢ ܣܶܒ̈ܠܳܬܳܐ ܘܚܰܒ̈ܠܶܐ: ܘܡܰܩܪܒܺܝܢ ܗܘܰܘ ܕܢܶܟܒܫܽܘܢܳܝܗܝ ܠܚܶܣܢܳܐ.
31 ܘܰܚܙܳܐ ܝܺܗܽܘܕܳܐ ܕܰܥܫܶܢ ܩܪܳܒܳܐ. ܘܰܓܥܳܬܳܗ̇ ܕܰܡܕܺܝܢܬܳܐ ܣܶܠܩܰܬ ܥܕܰܡܳܐ ܠܰܫܡܰܝܳܐ ܘܩܳܠܳܐ ܕܩܰܪ̈ܢܳܬܳܐ ܘܪܶܗܒܳܐ ܣܰܓܺܝܐܳܐ.
32 ܘܶܐܡܰܪ ܝܺܗܽܘܕܳܐ ܠܓܰܒܖ̈ܶܐ ܕܚܰܝܠܳܐ. ܐܰܩܪܶܒܘ ܝܰܘܡܳܢܳܐ ܥܰܠ ܐܰܦܰܝ̈ ܐܰܚܰܝ̈ܟܽܘܢ.
33 ܘܰܢܦܰܩ ܝܺܗܽܘܕܳܐ ܒܰܬܠܳܬܳܐ ܪ̈ܺܝܫܺܝܢ ܡܶܢ ܒܶܣܬܰܪܗܽܘܢ: ܘܰܩܪܰܘ ܒܩܰܪ̈ܢܳܬܳܐ. ܘܰܓܥܰܘ ܒܰܨܠܽܘܬܳܐ.
34 ܘܝܶܕܥܰܬ ܡܰܫܪܺܝܬܶܗ ܕܛܺܝܡܳܬܶܐܘܳܣ ܕܡܰܩܒܰܝ ܗܽܘ. ܘܰܥܪܰܩܘ ܡܶܢ ܩܕܳܡܰܘܗܝ. ܘܰܡܚܳܐ ܐܶܢܽܘܢ ܡܚܽܘܬܳܐ ܪܰܒܬܳܐ. ܘܰܢܦܰܠܘ ܡܶܢܗܽܘܢ ܒܗܰܘ ܝܰܘܡܳܐ ܐܰܝܟ ܬܡܳܢܝܳܐ ܐܰܠܦܺܝ̈ܢ ܓܰܒܪ̈ܺܝܢ.
35 ܘܰܐܪܟܶܢ ܝܺܗܽܘܕܳܐ ܠܳܐܠܺܝܡ. ܘܰܥܒܰܕ ܥܰܡܳܗ̇ ܩܪܳܒܳܐ. ܘܟܽܠ ܕܶܟܪܳܐ ܕܒܳܗ̇ ܩܛܰܠ. ܘܰܢܣܰܒ ܒܶܙܬܳܗ̇. ܘܰܐܘܩܕܳܗ̇ ܒܢܽܘܪܳܐ.
36 ܘܶܡܢ ܬܰܡܳܢ ܫܩܰܠ ܝܺܗܽܘܕܳܐ. ܘܟܰܒܫܳܗ̇ ܠܟܰܣܦܳܘܪ: ܘܰܠܡܳܩܰܪ: ܘܰܠܒܽܘܣܰܪܝܳܐ: ܘܰܠܫܰܪܟܳܐ ܕܰܡܕܺܝ̈ܢܳܬܳܐ ܕܰܒܓܶܠܥܳܕ.
37 ܘܡܶܢ ܒܳܬܰܪ ܕܶܝܢ ܗܳܠܶܝܢ: ܟܰܢܶܫ ܛܺܡܳܬܶܐܘܳܣ ܡܰܫܪܺܝܬܳܐ ܐ̱ܚܪܺܬܳܐ. ܘܰܫܪܳܐ ܥܰܠ ܓܶܢܒ ܪܳܦܺܝܢ ܡܶܢ ܣܶܛܪܶܗ ܕܢܰܗܪܳܐ.
38 ܘܫܰܕܰܪ ܝܺܗܽܘܕܳܐ ܕܢܶܓܫܽܘܢ ܠܡܰܫܪܺܝܬܳܐ. ܘܶܐܬܰܘ ܘܶܐܡܰܪܘ ܠܶܗ. ܐܶܬܟܰܢܰܫܘ ܥܠܰܝܟ ܟܽܠܗܽܘܢ ܥܰܡ̈ܡܶܐ ܕܰܚܕܳܖ̈ܰܝܢ: ܚܰܝܠܳܐ ܪܰܒܳܐ ܘܥܰܫܺܝܢܳܐ.
39 ܘܳܐܦ ܥܰܖ̈ܰܒܳܝܶܐ ܐܰܓܺܝܪܺܝܢ ܠܗܽܘܢ ܠܥܽܘܕܪܳܢܳܐ. ܘܰܫܪܶܝܢ ܥܰܠ ܣܶܛܪܶܗ ܕܰܢܗܪܳܐ. ܘܰܡܥܰܬܕܺܝܢ ܕܢܺܐܬܽܘܢ ܥܠܰܝܟ ܠܰܩܪܳܒܳܐ. ܘܶܐܙܰܠ ܝܺܗܽܘܕܳܐ ܠܽܐܘܪܥܗܽܘܢ.
40 ܘܶܐܡܰܪ ܛܺܝܡܳܬܶܐܘܳܣ ܠܖ̈ܰܒܰܝ ܚܰܝܠܶܗ. ܟܰܕ ܢܶܬܩܪܶܒ ܝܺܗܽܘܕܳܐ ܘܡܰܫܪܺܝܬܶܗ ܥܰܠ ܓܶܢܒ ܣܶܦܬܶܗ ܕܢܰܗܪܳܐ. ܐܶܢܗܽܘ ܕܢܶܥܒܰܪ ܒܩܰܕܡܳܝܬܳܐ ܠܘܳܬܰܢ: ܠܳܐ ܡܶܫܟܚܺܝܢܰܢ ܕܰܢܩܽܘܡ ܩܕܳܡܰܘܗܝ ܡܶܛܽܠ ܕܡܶܬܡܨܳܝܽܘ ܢܶܬܡܨܶܐ ܚܰܝܠܰܢ.
41 ܐܶܢ ܕܶܝܢ ܢܶܕܚܰܠ ܘܢܶܫܪܶܐ ܡܢ ܗܰܘ ܣܶܛܪܶܗ ܕܢܰܗܪܳܐ: ܢܶܥܒܰܪ ܠܘܳܬܶܗ ܘܢܶܬܡܨܶܐ ܚܰܝܠܶܗ.
42 ܘܟܰܕ ܡܰܛܺܝ ܝܺܗܽܘܕܳܐ ܠܢܰܗܪܳܐ: ܐܰܩܺܝܡ ܠܣܳܦܖ̈ܰܘܗܝ ܕܥܰܡܳܐ ܥܰܠ ܢܰܗܪܳܐ. ܘܦܰܩܶܕ ܐܶܢܽܘܢ ܘܶܐܡܰܪ ܠܗܽܘܢ. ܠܳܐ ܬܶܫܒܩܽܘܢ ܐܳܦܠܳܐ ܠܐ̱ܢܳܫ ܕܢܶܫܪܶܐ. ܐܶܠܳܐ ܢܺܐܬܽܘܢ ܟܽܠܗܽܘܢ ܠܰܩܪܳܒܳܐ.
43 ܘܰܥܒܰܪ ܗܽܘ ܩܰܕܡܳܝ ܥܠܰܝܗܽܘܢ: ܘܟܽܠܶܗ ܥܰܡܳܐ ܡܶܢ ܒܳܬܪܶܗ. ܘܶܐܬܬܒܰܪܘ ܡܶܢ ܩܕܳܡܰܘܗܝ ܥܰܡ̈ܡܶܐ. ܘܰܫܕܰܘ ܙܰܝܢܗܽܘܢ. ܘܰܥܪܰܩܘ ܠܒܶܝܬ ܦܬܰܟܖ̈ܶܐ ܕܰܒܩܰܪܢܳܐ.
44 ܘܟܰܒܫܽܘܗ̇ ܠܰܡܕܺܝܢܬܳܐ ܕܒܶܝܬ ܝܺܗܽܘܕܳܐ. ܘܰܠܒܶܝܬ ܦܬܰܟܖ̈ܶܐ ܐܰܘܩܶܕܘ ܒܢܽܘܪܳܐ ܥܰܡ ܟܽܠܡܶܕܶܡ ܕܺܐܝܬ ܒܳܗ̇. ܘܶܐܙܕܰܟܝܰܬ ܩܰܪܢܳܐ: ܘܠܳܐ ܬܽܘܒ ܡܶܫܟܚܳܐ ܗܘܳܬ ܠܰܡܩܳܡ ܩܕܳܡ ܝܺܗܽܘܕܳܐ.
45 ܘܟܰܢܶܫ ܝܺܗܽܘܕܳܐ ܠܟܽܠܶܗ ܝܺܣܪܳܐܶܝܠ ܕܰܒܓܶܠܥܳܕ. ܡܶܢ ܙܥܽܘܪܳܐ ܘܰܥܕܰܡܳܐ ܠܪܰܒܳܐ: ܘܰܠܢܶܫܰܝ̈ܗܽܘܢ ܘܠܰܒܢܰܝ̈ܗܽܘܢ ܘܰܠܟܽܠܳܗ̇ ܝܺܩܰܪܬܗܽܘܢ: ܡܰܫܪܺܝܬܳܐ ܪܰܒܬܳܐ ܘܥܰܫܺܝܢܬܳܐ: ܠܡܶܐܬܳܐ ܠܰܐܪܥܳܐ ܕܺܝܗܽܘܕܳܐ.
46 ܘܶܐܬܳܐ ܥܕܰܡܳܐ ܠܥܽܘܦܪܳܐ. ܘܗܺܝ ܡܕܺܝܢܬܳܐ ܗ̱ܝ ܪܰܒܬܳܐ ܕܝܳܬܒܳܐ ܥܰܠ ܐܽܘܪܚܳܐ. ܘܥܰܫܺ݀ܢܳܐ ܣܰܓܺܝ. ܘܠܰܝܬ ܠܶܡܣܛܳܐ ܡܶܢܳܗ̇: ܠܳܐ ܠܝܰܡܺܝܢܳܐ ܐܳܦܠܳܐ ܠܣܶܡܳܠܳܐ: ܐܶܠܳܐ ܐܶܢ ܠܡܶܥܒܰܪ ܒܓܰܘܳܗ̇.
47 ܘܶܐܚܰܕܘ ܒܰܐܦܰܝ̈ܗܽܘܢ ܥܳܡܳܪ̈ܶܝܗ̇ ܕܰܩܪܺܝܬܳܐ. ܘܣܰܟܰܪܘ ܬܰܪ̈ܥܶܐ ܒܟܺܐܦ̈ܶܐ.
48 ܘܫܰܕܰܪ ܠܘܳܬܗܽܘܢ ܝܺܗܽܘܕܳܐ ܒܡ̈ܶܠܶܐ ܕܰܫܠܳܡܳܐ. ܘܶܐܡܰܪ ܠܗܽܘܢ. ܐܶܥܒܰܪ ܒܰܐܪܥܟܽܘܢ ܘܺܐܙܰܠ ܠܰܐܪܥܰܢ. ܘܐ̱ܢܳܫ ܠܰܐ ܢܰܒܐܶܫ ܠܟܽܘܢ. ܐܶܠܳܐ ܒܰܠܚܽܘܕ ܒܪ̈ܶܓܠܰܝܢ ܢܶܥܒܰܪ. ܘܠܳܐ ܨܒܰܘ ܕܢܶܦܬܚܽܘܢ ܠܗܽܘܢ.
49 ܘܰܦܩܰܕ ܝܺܗܽܘܕܳܐ ܕܢܰܟܪܙܽܘܢ ܒܡܰܫܪܺܝܬܳܐ. ܕܟܽܠܢܳܫ ܢܶܫܪܶܐ ܥܰܠ ܕܽܘܟܬܶܗ.
50 ܘܰܫܪܰܘ ܐ̱ܢܳܫ̈ܳܐ ܕܚܰܝܠܳܐ: ܘܰܐܩܪܶܒܘ ܥܰܡ ܕܡܺܕܝܢܬܳܐ ܟܽܠܶܗ ܗܰܘ ܝܰܘܡܳܐ ܘܟܽܠܶܗ ܠܺܠܝܳܐ. ܘܶܐܫܬܰܠܡܰܬ ܡܕܺܝܢܬܳܐ ܒܺܐܝܕܰܘ̈ܗܝ.
51 ܘܰܐܘܒܶܕܘ ܡܶܢܳܗ̇ ܟܽܠ ܕܶܟܪܳܐ ܒܦܽܘܡܳܐ ܕܚܰܪܒܳܐ. ܘܥܰܩܪܽܘܗ̇ ܘܰܢܣܰܒܘ ܒܶܙܬܳܗ̇.
52 ܘܥܒܰܪ ܒܓܰܘ ܡܕܺܝܢܬܳܐ ܠܥܶܠ ܡܶܢ ܩܛܺܝ̈ܠܶܐ. ܘܰܥܒܰܪܘ ܝܽܘܪܕܢܳܢ ܠܰܦܩܰܥܬܳܐ ܪܰܒܬܳܐ ܠܽܘܩܒܰܠ ܒܶܝܬܝܳܫܳܢ.
53 ܘܺܝܗܽܘܕܳܐ ܕܶܝܢ ܡܟܰܢܶܫ ܗܘܳܐ ܠܰܐ̱ܚܪ̈ܳܝܶܐ: ܘܰܡܒܰܝܰܐ ܗܘܳܐ ܠܥܰܡܳܐ ܒܟܽܠܳܗ̇ ܐܽܘܪܚܳܐ: ܥܕܰܡܳܐ ܕܶܐܬܰܘ ܠܰܐܪܥܳܐ ܕܺܝܗܽܘܕ.
54 ܘܰܣܠܶܩܘ ܠܛܽܘܪܳܐ ܕܨܗܶܝܽܘܢ ܒܒܽܘܣܳܡܳܐ ܘܰܒܚܰܕܽܘܬܳܐ. ܘܩܰܪܒܘ ܩܽܘܪ̈ܒܳܢܶܐ ܘܝܰܩܕ̈ܶܐ: ܕܠܰܐ ܢܦܰܠ ܡܶܢܗܽܘܢ ܐܳܦܠܳܐ ܚܰܕ. ܘܰܗܦܰܟܘ ܒܰܫܠܳܡܳܐ.
55 ܘܰܒܗܳܢܽܘܢ ܝܰܘ̈ܡܳܬܳܐ ܕܺܝܬܰܝܗܽܘܢ ܗܘܰܘ ܝܺܗܽܘܕܳܐ ܘܝܽܘܢܳܬܳܢ ܐܰܚܽܘܗܝ ܒܰܐܪܥܳܐ ܕܓܶܠܥܳܕ: ܘܫܶܡܥܽܘܢ ܐܰܚܽܘܗܝ ܒܰܓܠܺܝܠܳܐ ܠܽܘܩܒܰܠ ܦܛܽܘܠܡܶܐܳܘܣ.
56 ܫܡܰܥ ܝܰܘܣܶܦ ܒܰܪ ܙܟܰܪܝܳܐ: ܘܥܶܙܰܪܝܳܐ ܪܺܝܫ ܚܰܝ̈ܠܰܘܳܬܳܐ: ܠܓܰܢܒܳܪܽܘܬܶܗ ܘܰܠܢܶܨܚܳܢܰܘ̈ܗܝ ܘܠܰܩܪ̈ܳܒܰܘܗܝ ܕܺܝܗܽܘܕܳܐ. ܘܶܐܡܰܪ.
57 ܢܶܥܒܶܕ ܠܰܢ ܐܳܦ ܚܢܰܢ ܫܡܳܐ: ܘܢܺܐܙܰܠ ܢܰܩܪܶܒ ܥܰܡ ܥܰܡ̈ܡܶܐ ܕܰܚܕܳܖ̈ܰܝܢ.
58 ܘܰܦܩܰܕܘ ܠܚܰܝܠܳܐ ܕܥܰܡܗܽܘܢ. ܘܶܐܙܰܠܘ ܠܝܰܡܢܺܝܢ.
59 ܘܰܢܦܰܩ ܓܘܪܓܝܐ ܡܶܢ ܡܕܺܝܢܬܳܐ: ܘܓܰܒܖ̈ܶܐ ܕܥܰܡܶܗ ܠܽܘܩܒܰܠܗܽܘܢ ܠܰܩܪܳܒܳܐ.
60 ܘܶܐܙܕܟܺܝܘ ܝܰܘܣܶܦ ܘܥܶܙܰܪܝܳܐ. ܘܰܪܕܰܦܘ ܒܳܬܰܪܗܽܘܢ ܥܕܰܡܳܐ ܠܰܬܚܽܘܡܳܐ ܕܰܐܕܽܘܡ. ܘܰܢܦܰܠܘ ܒܗܰܘ ܝܰܘܡܳܐ ܡܶܢ ܥܰܡܳܐ ܕܺܝܣܪܳܐܶܝܠ: ܐܰܝܟ ܬܪܺܝܢ ܐܠܦܺܝ̈ܢ ܓܰܒܪ̈ܺܝܢ.
61 ܘܰܗܘܳܐ ܬܒܳܪܳܐ ܪܰܒܳܐ ܒܺܝܣܪܳܐܶܝܠ: ܕܠܳܐ ܐܶܫܬܡܰܥ ܠܺܝܗܽܘܕܳܐ ܘܠܰܐܚܰܘ̈ܗܝ. ܕܨܳܒܶܝܢ ܗܘܰܘ ܐܳܦ ܗܶܢܽܘܢ ܕܢܶܥܒܕܽܘܢ ܠܗܽܘܢ ܫܡܳܐ ܘܢܶܨܚܳܢܳܐ.
62 ܗܶܢܽܘܢ ܕܶܝܢ ܠܳܐ ܐܺܝܬܰܝܗܽܘܢ ܗܘܰܘ ܡܶܢ ܙܰܪܥܳܐ ܕܗܳܢܽܘܢ ܓܰܒܖ̈ܶܐ: ܕܒܺܐܝܕܰܝ̈ܗܽܘܢ ܥܒܰܕ ܐܰܠܳܗܳܐ ܦܽܘܪܩܳܢܳܐ ܠܺܝܣܪܳܐܶܝܠ.
63 ܘܺܝܗܽܘܕܳܐ ܕܶܝܢ ܘܰܐܚܰܘ̈ܗܝ ܐܶܫܬܰܒܰܚܘ ܝܰܬܺܝܪܳܐܺܝܬ ܠܥܺܝܢ ܟܽܠܶܗ ܝܺܣܪܳܐܶܝܠ: ܘܒܰܝܢܳܬ ܟܽܠܗܽܘܢ ܥܰܡ̈ܡܶܐ: ܘܟܽܠ ܐܰܝܟܳܐ ܕܡܶܫܬܡܰܥ ܗܘܳܐ ܫܶܡܥܗܽܘܢ.
64 ܡܶܬܟܰܢܫܺܝܢ ܗܘܰܘ: ܘܳܐܬܶܝܢ ܡܫܰܒܚܺܝܢ ܠܗܽܘܢ.
65 ܘܰܢܦܰܩ ܝܺܗܽܘܕܳܐ ܘܰܐܚܰܘ̈ܗܝ. ܘܡܰܩܪܒܺܝܢ ܗܘܰܘ ܥܰܡ ܒܢܰܝ̈ ܥܺܣܽܘ ܒܰܐܪܥܳܐ ܕܬܰܝܡܢܳܐ. ܘܰܡܚܰܐܘܽܗ̇ ܠܚܶܒܪܽܘܢ ܘܠܰܒ̈ܢܳܬܳܗ̇: ܘܣܰܚܶܦܘ ܚܶܣ̈ܢܶܝܗ̇. ܘܡܰܓ̈ܕܠܶܝܗ̇ ܐܰܘܩܶܕܘ ܒܢܽܘܪܳܐ ܟܰܕ ܚܳܕܪܳܝܢ.
66 ܘܰܫܩܰܠ ܝܺܗܽܘܕܳܐ ܡܶܢ ܬܰܡܳܢ ܕܢܺܐܙܰܠ ܠܰܐܪܥܳܐ ܕܰܦܠܶܫܬܳܝ̈ܶܐ. ܘܥܳܒܰܪ ܗܘܳܐ ܒܫܳܡܪܺܝܢ.
67 ܘܰܒܗܰܘ ܝܰܘܡܳܐ ܢܦܰܠܘ ܟܳܗ̈ܢܶܐ ܒܰܩܪܳܒܳܐ: ܘܕܰܨܒܰܘ ܕܶܥܒܕܽܘܢ ܠܗܽܘܢ ܢܶܨܚܳܢܳܐ. ܘܰܢܦܰܩܘ ܠܰܩܪܳܒܳܐ ܕܠܳܐ ܒܡܶܠܟܳܐ.
68 ܘܰܐܪܟܶܢ ܝܺܗܽܘܕܳܐ ܠܙܽܘܛܳܘܣ ܕܒܰܐܪܥܳܐ ܕܰܦܠܶܫܬܳܝ̈ܶܐ. ܘܣܰܚܶܦܘ ܥܳܠܰܘ̈ܳܬܗܽܘܢ. ܘܰܓܠܺܝ̈ܦܶܐ ܕܰܦܬܰܟܖ̈ܰܝܗܽܘܢ ܐܰܘܩܶܕܘ ܒܢܽܘܪܳܐ ܘܒܰܙܘ ܒܶܙܬܗܽܘܢ ܕܰܡܕܺܝ̈ܢܳܬܳܐ. ܘܰܗܦܰܟܘ ܠܰܐܪܥܳܐ ܕܺܝܗܽܘܕ.