Isaiah 23
The Book of Isaiah
܀ ܐܫܥܝܐ ܟܓ ܀
1 ܡܰܫܩܠܳܐ ܕܨܽܘܪ: ܐܰܝ̈ܠܠܺܝܢ. ܐܶܠܦ̈ܶܐ ܕܬܰܪܫܺܝܫ ܡܶܛܽܠ ܕܶܐܬܒܙܶܙ ܡ̣ܶܢ ܒܰܝܬܳܐ: ܡܰܝܬܝܳܢܳܐ. ܘܡ̣ܶܢ ܐܰܪܥܳܐ ܕܟܳܬܺܝܡ ܐܶܬܓܠܺܝ ܠܰܢ.
2 ܫܬܽܘܩܘ ܥܳܡܽܘܖ̈ܶܐ ܕܓܳܙܰܪܬܳܐ: ܬܰܓܳܪܳܐ ܕܨܰܝܕܳܢ ܕܥܳܒܰܪ ܒܝܰܡܳܐ.
3 ܡܠܽܘܐܳܟ ܒܡܰܝ̈ܳܐ ܣܰܓܺܝ̈ܐܶܐ: ܙܰܪܥܳܐ ܕܬܰܓܳܪܳܐ ܚܨܳܕܳܐ ܕܢܰܗܪܳܐ. ܥܠܰܠܬܶܗ ܗܘܳܬ ܬܶܐܓܽܘܪܬܳܐ ܠܥܰܡ̈ܡܶܐ.
4 ܒܗܰܬܝ ܨܰܝܕܳܢ: ܡܶܛܽܠ ܕܶܐܡܰܪ ܝܰܡܳܐ ܘܥܽܘܫܢܶܗ ܕܝܰܡܳܐ: ܠܳܐ ܚܰܒܠܶܬ: ܘܠܳܐ ܝܶܠܕܶܬ. ܘܠܳܐ ܪܰܒܺܝܬ ܓܰܕܽܘ̈ܕܶܐ: ܘܳܐܦܠܳܐ ܪܰܡܪܡܶܬ ܒܬܽܘ̈ܠܳܬܳܐ.
5 ܡܳܐ ܕܶܐܫܬܡܰܥ ܠܡܶܨܪܶܝܢ: ܚܶܒ̈ܠܶܐ ܢܶܐܚܕܽܘܢ ܐܶܢܽܘܢ: ܐܰܝܟ ܫܶܡܥܳܐ ܕܨܽܘܪ.
6 ܥܒܰܪܘ ܠܬܰܪܫܺܝܫ: ܐܰܝܠܶܠܘ ܥܳܡܽܘܖ̈ܶܐ ܕܓܳܙܰܪܬܳܐ.
7 ܗܳܕܳܐ ܗ̱ܝ ܠܟܽܘܢ ܥܰܫܺܝܢܬܳܐ ܕܡ̣ܶܢ ܝܰܘ̈ܡܳܬܳܐ ܩܰܕܡܳܝ̈ܶܐ ܩܕܳܡܶܝܗ̇ ܢܺܐܙ̈ܳܠ̄ܢ ܖ̈ܶܓܠܶܝܗ̇ ܕܬܶܥܡܰܪ ܒܪܽܘܚܩܳܐ.
8 ܡܰܢܽܘ ܐܶܬܡܰܠܰܟ ܗܳܟܰܢܳܐ ܥܰܠ ܨܽܘܪ ܡܟܰܠܰܠܬܳܐ. ܕܬܰܓܳܖ̈ܶܝܗ̇ ܪܰܘܖ̈ܒܳܢܶܐ: ܘܰܟܢܰܥܢܳܝ̈ܶܝܗ̇ ܝܰܩܺܝܖ̈ܶܝܗ̇ ܕܰܐܪܥܳܐ.
9 ܡܳܪܝܳܐ ܚܰܝܠܬܳܢܳܐ ܐܶܬܪܰܥܺܝ: ܠܰܡܒܰܛܳܠܽܘ ܐܺܝܩܳܪܳܐ ܕܟܽܠ ܚܺܝܠ: ܘܠܰܡܨܰܥܳܪܽܘ ܠܟܽܠܗܽܘܢ ܝܰܩܺܝܖ̈ܶܝܗ̇ ܕܰܐܪܥܳܐ.
10 ܥܒܰܪܝ ܠܰܐܪܥܶܟܝ ܐܰܝܟ ܢܰܗܪܳܐ ܒܰܪܬ ܬܰܪܫܺܝܫ ܠܰܝܬ ܬܽܘܒ ܕܕܳܚܶܩ ܠܶܟܝ.
11 ܐܺܝܕܶܗ ܐܰܪܺܝܡ ܥܰܠ ܝܰܡܳܐ: ܘܰܐܪܓܶܙ ܡܰܠܟ̈ܘܳܬܳܐ. ܡܳܪܝܳܐ ܦܩܰܕ ܥܰܠ ܟܢܰܥܢ ܕܢܳܘܒܶܕ ܥܰܫܺܝ̈ܢܶܝܗ̇.
12 ܘܶܐܡܰܪ: ܠܳܐ ܬܽܘܣܦܺܝܢ ܬܽܘܒ ܠܡܶܬܥܰܫܳܢܽܘ: ܛܠܺܝܡܬܳܐ ܒܬܽܘܠܬܳܐ ܒܰܪܬ ܨܰܝܕܳܢ. ܩܽܘܡܝ ܥܒܰܪܝ ܠܟܳܬܺܝܡ ܐܳܦ ܬܰܡܳܢ ܠܳܐ ܢܢܺܝܚ ܠܶܟܝ.
13 ܗܳܐ ܐܰܪܥܳܐ ܕܟܰܠ̈ܕܳܝܶܐ: ܗܳܢܳܐ ܗ̱ܘ̣ ܥܰܡܳܐ ܕܠܳܐ ܗ̱ܘܳܐ ܐܳܬܽܘܪܳܝܳܐ ܥܰܒܕܶܗ ܠܪܽܘܚܳܐ. ܘܰܐܩܺܝܡܘ ܒܳܨܽܘܝ̈ܶܐ. ܒܨ̣ܰܘ ܣܳܚܖ̈ܳܬܶܗ̇: ܘܥܰܒܕܽܘܗ̇ ܠܡܰܦܽܘܠܬܳܐ.
14 ܐܰܝ̈ܠܠܺܝܢ ܐܰܠ̈ܦܶܐ ܕܬܰܪܫܺܝܫ: ܡܶܛܽܠ ܕܶܐܬܒܙܶܙ ܥܽܘܫܢܟܶܝܢ.
15 ܢܶܗܘܶܐ ܕܶܝܢ ܒܝܰܘܡܳܐ ܗܰܘ: ܬܶܬܛܥܶܐ ܨܽܘܪ ܫܰܒܥܺܝܢ ܫܢܺܝ̈ܢ: ܐܰܝܟ ܝܰܘܡܰܝ̈ ܡܰܠܟܳܐ ܚܰܕ. ܘܡ̣ܶܢ ܒܳܬܰܪ ܫܰܒܥܺܝܢ ܫܢܺܝ̈ܢ: ܢܶܙܡܪܽܘܢ ܠܨܽܘܪ ܙܡܺܝܪܬܳܐ ܕܙܳܢܺܝܬܳܐ.
16 ܣܰܒܝ ܟܶܢܳܪܳܐ: ܘܶܐܬܟܪܰܟܝ ܩܪܺܝܬܳܐ: ܙܳܢܺܝܬܳܐ ܕܶܐܬܛܰܥܝܰܬ. ܩܽܘܫܝ ܫܰܦܺܝܪ: ܐܰܣܓܳܝ ܙܡܳܪܳܐ: ܕܬܶܬܕܰܟܪܺܝܢ.
17 ܘܢܶܗܘܶܐ ܡ̣ܶܢ ܒܳܬܰܪ ܫܰܒܥܺܝܢ ܫܢܺܝ̈ܢ: ܢܶܦܩܽܘܕ ܡܳܪܝܳܐ ܠܨܽܘܪ: ܘܢܰܗܦܟܺܝܗ̇ ܠܰܐܓܺܝܖ̈ܳܬܳܗ̇. ܘܰܬܙܰܢܶܐ ܒܟܽܠܗܶܝܢ ܡܰܠ̈ܟܘܳܬܳܐ ܕܥܰܠ ܐܰܦܰܝ̈ ܐܰܪܥܳܐ.
18 ܘܬܶܗܘܶܐ ܬܶܐܓܽܘܪܬܳܗ̇ ܘܰܐܓܖ̈ܳܬܳܗ̇ ܩܽܘܕܫܳܐ ܠܡܳܪܝܳܐ. ܠܳܐ ܢܶܬܬܣܺܝ̈ܡܳܢ ܒܶܝܬ ܓܰܙܳܐ: ܘܠܳܐ ܢܶܬܢܰܛܖ̈ܳܢ. ܐܶܠܳܐ ܠܰܕܥܳܡܪܺܝܢ ܩܕܳܡ ܡܳܪܝܳܐ ܬܶܗܘܶܐ ܬܶܐܓܽܘܪܬܳܗ̇: ܠܡܶܐܟܰܠ: ܘܰܠܡܶܣܒܰܥ: ܘܠܰܡܟܰܣܳܝܽܘ ܥܰܬܺܝܩܶܝ̈ܗ̇.