Isaiah 13
The Book of Isaiah
܀ ܐܫܥܝܐ ܝܓ ܀
1 ܡܰܫܩܠܳܐ ܕܒܳܒܶܠ ܕܰܚܙܳܐ ܐܶܫܰܥܝܳܐ ܒܰܪ ܐܰܡܽܘܨ.
2 ܥܰܠ ܛܽܘܖ̈ܶܐ ܫܦܰܝ̈ܳܐ ܫܩܽܘܠܘ ܐܳܬܳܐ. ܐܰܪܺܝܡܘ ܠܗܽܘܢ ܩܳܠܳܐ. ܐܰܢܺܝܦܘ ܒܺܐܝܕܶܗ ܢܶܥܠܽܘܢ ܒܬܰܖ̈ܥܰܝ ܫܰܠܺܝܛܳ̈ܢ̈ܶܐ.
3 ܐܶܢܳܐ ܦܶܩܕܶܬ ܠܡܰܩܕܰܫܝ. ܘܰܩܪܺܝܬ ܠܓܰܢ̱ܒܳܖ̈ܶܐ ܒܪܽܘܓܙܝ. ܘܡܶܬܥܰܫܢܺܝܢ ܒܓܰܐܝܽܘܬܝ.
4 ܩܳܠܳܐ ܕܰܪܓܽܘܫܝܳܐ ܒܛܽܘܪܳܐ: ܕܽܘܡܝܳܐ ܕܥܰܡ̈ܡܶܐ ܣܰܓܺܝ̈ܐܶܐ ܩܳܠܳܐ ܕܰܪܓܽܘܫܝܳܐ ܕܡܰܠܟ̈ܘܳܬܳܐ ܕܥܰܡ̈ܡܶܐ ܕܡܶܬܟܰܢܫܺܝܢ. ܡܳܪܝܳܐ ܚܰܝܠܬܳܢܳܐ ܣܳܥܰܪ ܚܰܝ̈ܠܶܐ.
5 ܩܖ̈ܰܒܬܳܢܶܐ ܐܳܬܶܝܢ ܡ̣ܶܢ ܪܽܘܚܩܳܐ: ܘܡ̣ܶܢ ܣܰܘ̈ܦܰܝ ܫܡܰܝܳܐ ܡܳܪܝܳܐ: ܘܡܳܐܢ̈ܶܐ ܕܪܽܘܓܙܶܗ: ܠܰܡܚܰܒܳܠܽܘ ܠܟܽܠܳܗ̇ ܐܰܪܥܳܐ.
6 ܐܰܝܠܠܶܘ ܡܶܛܽܠ ܕܩܰܪܺܝܒ ܗ̱ܘ̣ ܝܳܘܡܶܗ ܕܡܳܪܝܳܐ: ܘܰܐܝܟ ܒܶܙܬܳܐ ܡ̣ܶܢ ܫܶܠܝܳܐ ܢܺܐܬܶܐ.
7 ܡܶܛܽܠ ܗܳܢܳܐ ܟܽܠܗܶܝܢ ܐܺܝ̈ܕܰܝܳܐ ܢܶܬܖ̈ܰܦܝܳܢ. ܘܟܽܠܶܗ ܠܶܒܳܐ ܕܐ̱ܢܳܫܳܐ ܢܶܬܡܣܶܐ ܘܢܶܬܕܰܠܚܽܘܢ.
8 ܘܨܰܘܖ̈ܳܢܶܐ ܘܚܶܒܠܶܐ ܐܰܝܟ ܕܝܳܠܶܕܬܳܐ ܢܶܐܚܕܽܘܢ ܐܶܢܽܘܢ. ܘܢܶܬܡܗܽܘܢ ܓܒܰܪ ܒܚܰܒܪܶܗ. ܘܰܐܦ̈ܶܐ ܕܫܰܠܗܶܒܺܝܬܳܐ ܐܰܦܰܝ̈ܗܽܘܢ.
9 ܗܳܐ ܝܳܘܡܶܗ ܕܡܳܪܝܳܐ ܐܳܬܳܐ: ܕܳܐܣܝܽܘ ܠܰܝܬ ܠܶܗ ܐܰܟܬܰܢ ܘܚܰܡܺܝܡ ܪܽܘܓܙܶܗ ܕܢܶܥܒܕܺܝܗ̇ ܠܰܐܪܥܳܐ ܠܚܽܘܪܒܳܐ: ܘܰܚܛܳܝ̈ܶܝܗ̇ ܢܰܘܒܶܕ ܡܶܢܳܗ̇.
10 ܡܶܛܽܠ ܕܟܰܘ̈ܟܒܶܐ ܕܰܫܡܰܝܳܐ ܘܚܰܝ̈ܠܳܘܳܬܗܽܘܢ ܠܳܐ ܢܰܢܗܪܽܘܢ ܢܶܚܫܰܟ ܫܶܡܫܳܐ ܒܡܰܦܩܶܗ. ܘܢܽܘܗܪܶܗ ܕܣܰܗܪܳܐ ܠܳܐ ܢܰܢܗܰܪ.
11 ܐܶܦܩܽܘܕ ܒܺܝܫܬܳܐ ܥܰܠ ܬܺܒܶܝܠ: ܘܥܰܠ ܖ̈ܰܫܺܝܥܶܐ ܥܰܘܠܗܽܘܢ. ܐܶܒܰܛܶܠ ܪܳܡܽܘܬܳܐ ܕܫܰܒܗܖ̈ܳܢܶܐ. ܘܓܰܐܝܽܘܬܳܐ ܕܥܰܫܺܝ̈ܢܶܐ ܐܶܡܰܟܶܟ.
12 ܐܰܘܩܰܪ ܓܰܒܪܳܐ ܡ̣ܶܢ ܕܰܗܒܳܐ: ܘܐ̱ܢܳܫܳܐ ܡ̣ܶܢ ܕܰܗܒܳܐ ܕܰܐܘܦܺܝܪ.
13 ܡܶܛܽܠ ܗܳܢܳܐ ܠܰܫܡܰܝܳܐ ܐܰܪܓܶܙ. ܘܰܬܙܽܘܥ ܐܰܪܥܳܐ ܡ̣ܶܢ ܕܽܘܟܬܳܗ̇: ܒܰܟܐܳܬܶܗ ܕܡܳܪܝܳܐ ܚܰܝܠܬܳܢܳܐ: ܒܝܰܘܡܳܐ ܕܚܶܡܬܳܐ ܕܪܽܘܓܙܶܗ.
14 ܢܶܗܘܽܘܢ ܐܰܝܟ ܛܒܰܝ̈ܳܐ ܕܥܳܪܩܺܝܢ: ܘܰܐܝܟ ܥܳܢ̈ܳܐ ܕܠܰܝܬ ܠܳܗ̇ ܡܟܰܢܫܳܢܳܐ ܐ̱ܢܳܫ ܠܥܰܡܶܗ ܢܶܬܦܢܽܘܢ: ܘܰܓܒܰܪ ܠܰܐܪܥܶܗ ܢܶܥܪܩܽܘܢ.
15 ܟܠ ܕܢܶܫܬܰܟܰܚ: ܢܶܬܕܩܰܪ. ܘܟܽܠ ܕܢܶܬܬܰܘܣܰܦ: ܢܶܦܶܠ ܒܚܰܪܒܳܐ.
16 ܘܝܰܠܽܘܕܰܝ̈ܗܽܘܢ ܢܶܫܬܰܩܦܽܘܢ ܠܥܰܢܰܝ̈ܗܽܘܢ ܘܢܶܬܒܰܙܙܽܘܢ ܒܳܬܰܝ̈ܗܽܘܢ. ܘܢܶܫܰܝ̈ܗܽܘܢ ܢܶܨܛܰܥܖ̈ܳܢ.
17 ܗܳܐ ܡܥܺܝܪ ܐ̱ܢܳܐ ܥܠܰܝܟܽܘܢ ܠܡܳܕܳܝ̈ܶܐ: ܕܟܶܣܦܳܐ ܠܳܐ ܚܫܺܝܒ ܠܗܽܘܢ: ܘܰܒܕܰܗܒܳܐ ܠܳܐ ܡܶܨܛܒܶܝܢ.
18 ܩܶܫ̈ܬܳܬܳܐ ܕܰܥܠܰܝ̈ܡܶܐ ܢܶܬܬܰܒܖ̈ܳܢ. ܘܥܰܠ ܦܺܐܖ̈ܶܐ ܕܟܰܪܣܳܐ ܠܳܐ ܢܪܰܚܡܽܘܢ. ܘܥܰܠ ܒܢܰܝ̈ܟܽܘܢ ܠܳܐ ܢܚܽܘ̈ܣܳܢ ܥܰܝܢܰܝ̈ܗܽܘܢ.
19 ܘܬܶܗܘܶܐ ܒܳܒܶܠ ܚܰܝܠܳܐ ܕܡܰܠ̈ܟܽܘܬܳܐ: ܘܫܽܘܒܚܳܐ ܕܓܰܐܝܽܘܬܳܐ ܕܟܰܠܕܳܝ̈ܶܐ: ܐܰܝܟ ܕܰܗܦܰܟ ܐܰܠܳܗܳܐ ܠܰܣܕܽܘܡ ܘܰܠܥܳܡܽܘܪܳܐ.
20 ܠܳܐ ܬܶܬܰܒ ܠܥܳܠܰܡ: ܘܠܳܐ ܬܶܫܪܶܐ ܠܕܳܪܕܳܖ̈ܺܝܢ ܘܠܳܐ ܢܶܫܪܽܘܢ ܬܰܡܳܢ ܥܰܖ̈ܰܒܳܝܶܐ: ܘܖ̈ܳܥܰܘܳܬܳܐ ܠܳܐ ܢܶܪܥܽܘܢ ܬܰܡܳܢ.
21 ܐܶܠܳܐ ܢܶܖ̈ܒܥܳܢ ܬܰܡܳܢ ܚܰܝ̈ܘܳܬܳܐ. ܘܢܶܬܡܠܽܘܢ ܒܳܬܰܝ̈ܗܽܘܢ ܒ̈ܢܳܬ ܩ̈ܳܠܶܐ. ܘܢܶܫܖ̈ܝܳܢ ܬܰܡܳܢ ܒ̈ܢܳܬ ܢܰܥܳܡ̈ܶܐ: ܘܫܺܐܕ̈ܶܐ ܢܶܪܩܕܽܘܢ ܬܰܡܳܢ.
22 ܘܢܶܥܢ̈ܝܳܢ ܣܺܝܖ̈ܶܢܳܣ ܒܣܳܚܖ̈ܳܬܗܽܘܢ: ܘܝܳܪܽܘܖ̈ܶܐ ܒܗܰܝ̈ܟܠܶܐ ܕܦܽܘܢܳܩܰܝ̈ܗܽܘܢ ܩܰܪܺܝܒ ܗ̱ܘ̣ ܙܰܒܢܳܗ̇ ܠܡܶܐܬܳܐ: ܘܝܳܘ̈ܡܳܬܳܗ̇ ܬܽܘܒ ܠܳܐ ܢܶܬܡܰܬܚܽܘܢ.