Zephaniah 1
The Book of Zephaniah
܀ ܨܦܢܝܐ ܐ ܀
1 ܦܶܬܓܳܡܶܗ ܕܡܳܪܝܳܐ ܕܰܗܘܳܐ ܥܰܠ ܨܦܰܢܝܳܐ ܒܰܪ ܟܽܘܫܺܝ: ܒܰܪ ܓܕܰܠܝܳܐ ܒܰܪ ܐܳܡܰܪܝܳܐ ܒܪܶܗ ܕܚܶܠܰܩܝܳܐ: ܒܝܰܘ̈ܡܳܬܶܗ ܕܝܽܘܫܺܝܳܐ ܒܰܪ ܐܰܡܽܘܢ ܡܰܠܟܳܐ ܕܺܝܗܽܘܕܳܐ.
2 ܡܰܥܒܳܪܽܘ ܡܰܥܒܰܪ ܐ̱ܢܳܐ ܟܽܠ ܡܶܢ ܐܰܦܶܝ̈ܗ̇ ܕܰܐܪܥܳܐ ܐܳܡܰܪ ܡܳܪܝܳܐ.
3 ܡܰܥܒܰܪ ܐ̱ܢܳܐ ܒܢܰܝ̈ܢܳܫܳܐ ܘܰܒܥܺܝܪܳܐ: ܡܰܥܒܰܪ ܐ̱ܢܳܐ ܦܳܪܰܚܬܳܐ ܕܰܫܡܰܝܳܐ: ܘܢܽܘ̈ܢܶܐ ܕܝܰܡܳܐ: ܘܬܽܘܩܠܬܳܐ ܐܰܝܬܶܐ ܥܰܠ ܚܰܛܳܝ̈ܶܐ: ܘܰܐܘܒܶܕ ܒܢܰܝ̈ܢܳܫܳܐ ܡܶܢ ܐܰܦܶܝ̈ܗ̇ ܕܰܐܪܥܳܐ: ܐܳܡܰܪ ܡܳܪܝܳܐ.
4 ܘܰܐܪܺܝܡ ܐܺܝܕܝ ܥܰܠ ܝܺܗܽܘܕܳܐ: ܘܥܰܠ ܟܽܠܗܽܘܢ ܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܘܰܐܘܒܶܕ ܡܶܢ ܐܰܬܪܳܐ ܗܳܢܳܐ ܫܰܪܟܶܗ ܕܒܰܥܠܳܐ: ܘܰܫܡܳܐ ܕܟܽܘܡܖ̈ܶܐ ܥܰܡ ܕܟܳܗܢ̈ܶܐ.
5 ܘܰܠܟܽܠ ܕܣܳܓܕܺܝܢ ܗ̱ܘܰܘ ܥܰܠ ܐܶܓܳܖ̈ܶܐ ܠܚܰܝ̈ܠܰܘܳܬܳܐ ܕܰܫܡܰܝܳܐ: ܘܰܠܟܽܠ ܕܣܳܓܕܺܝܢ ܗ̱ܘܰܘ ܘܝܳܡܶܝܢ ܒܡܳܪܝܳܐ: ܘܝܳܡܶܝܢ ܒܡܰܠܟܽܘܡ.
6 ܘܰܠܟܽܠ ܕܗܳܦܟܺܝܢ ܡܶܢ ܡܳܪܝܳܐ: ܘܰܠܟܽܠ ܕܠܳܐ ܒܳܥܶܝܢ ܠܡܳܪܝܳܐ: ܘܠܳܐ ܡܥܰܩܒܺܝܢ ܥܠܰܘܗܝ.
7 ܕܚܰܠܘ ܡܶܢ ܩܕܳܡ ܡܳܪܶܐ ܡܳܖ̈ܰܘܳܬܳܐ: ܡܶܛܽܠ ܕܩܰܪܺܝܒܽ ܗ̱ܘ ܝܰܘܡܶܗ ܕܡܳܪܝܳܐ: ܘܛܰܝܶܒ ܡܳܪܝܳܐ ܕܶܒܚ̈ܶܐ: ܘܙܰܡܶܢ ܩܖ̈ܰܘܗܝ.
8 ܘܢܶܗܘܶܐ ܒܝܰܘܡܳܐ ܕܕܶܒܚܶܗ ܕܡܳܪܝܳܐ: ܐܶܦܩܽܘܕ ܥܰܠ ܪܰܘܖ̈ܒܳܢܶܐ: ܘܥܰܠ ܒܢܰܝ̈ ܡܰܠ̈ܟܶܐ: ܘܥܰܠ ܟܽܠ ܕܠܳܒܫܺܝܢ ܗ̱ܘܰܘ ܠܒܽܘ̈ܫܶܐ ܢܽܘܟܖ̈ܳܝܶܐ.
9 ܘܶܐܦܩܽܘܕ ܥܰܠ ܟܽܠܗܽܘܢ ܚܳܛܽܘ̈ܦܶܐ ܘܒܳܙܽܘ̈ܙܶܐ ܒܝܰܘܡܳܐ ܗܰܘ: ܕܡܳܠܶܝܢ ܗ̱ܘܰܘ ܒܶܝܬ ܡܰܕܳܢܰܝ̈ܗܽܘܢ ܚܛܽܘܦܝܳܐ ܘܢܶܟܠܳܐ.
10 ܘܢܶܗܘܶܐ ܒܝܰܘܡܳܐ ܗܰܘ ܐܳܡܰܪ ܡܳܪܝܳܐ: ܩܳܠܳܐ ܕܰܩܥܳܬܳܐ ܡܶܢ ܬܰܪܥܳܐ ܕܨܰܝ̈ܳܕܶܐ: ܘܺܝܠܰܠܬܳܐ ܡܶܢ ܐ̱ܚܪܺܢܳܐ: ܘܰܬܒܳܪܳܐ ܪܰܒܳܐ ܡܶܢ ܖ̈ܳܡܳܬܳܐ.
11 ܐܰܝܠܶܠܘ ܥܳܡܽܘܖ̈ܶܝܗ̇ ܕܡܰܟܬܰܫ: ܡܶܛܽܠ ܕܰܬܘܰܪܘ ܟܽܠܶܗ ܥܰܡܳܐ ܕܰܟܢܰܥܢ: ܘܶܐܒܰܕܘ ܟܽܠ ܫܳܩܠܰܝ̈ ܣܺܐܡܳܐ.
12 ܘܢܶܗܘܶܐ ܒܶܗ ܒܙܰܒܢܳܐ ܗܰܘ ܐܳܡܰܪ ܡܳܪܝܳܐ: ܐܶܒܨܶܝܗ̇ ܠܽܐܘܪܺܫܠܶܡ ܒܰܫܪܳܓܳܐ: ܘܶܐܦܩܽܘܕ ܥܰܠ ܓܰܒܖ̈ܶܐ ܕܫܳܝܛܺܝܢ ܠܢܳܛܽܘܪܗܽܘܢ: ܘܳܐܡܪܺܝܢ ܒܠܶܒܗܽܘܢ: ܠܳܐ ܡܰܛܶܐܒ ܡܳܪܝܳܐ ܐܳܦ ܠܳܐ ܡܰܒܶܐܫ.
13 ܢܶܗܘܶܐ ܩܶܢܝܳܢܗܽܘܢ ܠܒܶܙܬܳܐ: ܘܒܳܬܰܝ̈ܗܽܘܢ ܠܰܚܒܳܠܳܐ: ܘܢܶܒܢܽܘܢ ܒ̈ܳܬܶܐ ܘܠܳܐ ܢܶܬܒܽܘܢ ܒܗܽܘܢ: ܘܢܶܨܒܽܘܢ ܟܰܖ̈ܡܶܐ ܘܠܳܐ ܢܶܫܬܽܘܢ ܚܰܡܪܗܽܘܢ.
14 ܩܰܪܺܝܒܽ ܗ̱ܘ ܝܰܘܡܶܗ ܪܰܒܳܐ ܕܡܳܪܝܳܐ: ܩܰܪܺܝܒܽ ܗ̱ܘ ܛܳܒ ܘܰܡܣܰܪܗܰܒ ܩܳܠܳܐ ܕܝܰܘܡܶܗ ܕܡܳܪܝܳܐ: ܡܰܪܺܝܪ ܘܰܩܫܶܐ ܘܥܰܫܺܝܢ.
15 ܝܰܘܡܰܐ ܗ̱ܘ ܕܰܐܟܬܳܐ ܝܰܘܡܰܐ ܗ̱ܘ: ܝܰܘܡܰܐ ܗ̱ܘ ܕܽܐܘܠܨܳܢܳܐ ܘܰܕܥܳܩܬܳܐ: ܝܰܘܡܰܐ ܗ̱ܘ ܕܕܽܘܘܳܕܳܐ ܘܕܰܚܒܳܠܳܐ: ܝܰܘܡܰܐ ܗ̱ܘ ܕܚܶܫܽܘܟܳܐ ܘܰܕܥܰܡܛܳܢܳܐ: ܝܰܘܡܳܐ ܕܰܥܢܳܢܳܐ ܘܰܕܥܰܪܦܶܠܳܐ.
16 ܝܰܘܡܰܐ ܗ̱ܘ ܕܩܰܪܢܳܐ ܘܕܰܩܥܳܬܳܐ ܥܰܠ ܡܕܺܝ̈ܢܳܬܳܐ ܥܰܫܺܝܢܳܬܳܐ: ܘܥܰܠ ܘܳܙ̈ܝܳܬܳܐ ܖ̈ܳܡܳܬܳܐ.
17 ܘܳܐܠܶܨ ܠܰܒܢܰܝ̈ܢܳܫܳܐ ܕܰܢܗܰܠܟܽܘܢ ܐܰܝܟ ܥܘܺܝܖ̈ܶܐ: ܥܰܠ ܕܰܚܛܰܘ ܠܡܳܪܝܳܐ: ܘܢܶܬܶܐܫܶܕ ܕܶܡܗܽܘܢ ܐܰܝܟ ܥܰܦܪܳܐ: ܘܒܶܣܪܗܽܘܢ ܐܰܝܟ ܟܒܰܝ̈ܳܐ.
18 ܘܰܕܗܒܗܽܘܢ ܘܣܺܐܡܗܽܘܢ ܠܳܐ ܢܶܫܟܰܚ ܠܰܡܦܰܨܳܝܽܘ ܐܶܢܽܘܢ ܒܝܰܘܡܳܐ ܕܪܽܘܓܙܶܗ ܕܡܳܪܝܳܐ: ܘܰܒܢܽܘܪܳܐ ܕܰܛܢܳܢܶܗ ܬܶܬܶܐܟܶܠ ܟܽܠܳܗ̇ ܐܰܪܥܳܐ: ܡܶܛܽܠ ܕܰܕܠܽܘܚܝܳܐ ܘܣܳܘܦܳܢܳܐ ܥܳܒܶܕ ܥܰܠ ܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ.