Nehemiah 13
The Book of Nehemiah
܀ ܢܚܡܝܐ ܝܓ ܀
1 ܒܶܗ ܒܝܰܘܡܳܐ ܗܰܘ ܐܶܬܩܪܺܝ ܟܬܳܒܳܐ ܕܢܳܡܽܘܣܳܐ ܕܡܽܘܫܶܐ ܒܶܐܕܢܰܝ̈ ܥܰܡܳܐ. ܘܶܐܫܬܟܰܚ ܕܰܟܬܺܝܒ ܒܶܗ. ܠܳܐ ܢܶܥܠܽܘܢ ܥܰܡܽܘܢܳܝ̈ܶܐ ܘܡܽܘܐܒܳܝ̈ܶܐ ܠܰܟܢܽܘܫܬܶܗ ܕܡܳܪܝܳܐ: ܥܕܰܡܳܐ ܠܥܳܠܰܡ.
2 ܡܶܛܽܠ ܕܠܳܐ ܐܰܪܰܥܘ ܠܰܒܢܰܝ̈ ܝܺܣܪܳܐܶܝܠ ܒܠܰܚܡܳܐ ܘܰܒܡܰܝ̈ܳܐ. ܘܶܐܓܰܪܘ ܠܗܽܘܢ ܠܒܶܠܥܰܡ ܠܰܡܠܳܛ ܐܶܢܽܘܢ. ܘܰܐܗܦܶܟ ܐܰܠܳܗܳܐ ܠܰܘ̈ܛܳܬܶܗ ܠܒܽܘܖ̈ܟܳܬܳܐ.
3 ܗܳܝܕܶܝܢ ܟܰܕ ܫܡܰܥܘ ܡ̈ܶܠܶܐ ܕܢܳܡܽܘܣܳܐ: ܐܶܬܦܪܶܫܘ ܟܽܠܗܽܘܢ ܥܰܖ̈ܽܘܒܶܐ ܡܶܢ ܝܺܣܪܳܐܶܝܠ.
4 ܘܶܐܬܳܐ ܐܶܠܺܝܫܳܒ ܟܽܘܡܪܳܐ: ܘܰܒܢܳܐ ܠܶܗ ܬܰܡܳܢ ܕܳܪܬܳܐ ܚܕܳܐ ܪܰܒܬܳܐ.
5 ܘܬܰܡܳܢ ܡܶܢ ܠܩܽܘܕܡܺܝܢ ܣܳܝܡܺܝܢ ܗ̱ܘܰܘ ܩܽܘܖ̈ܒܳܢܶܐ ܘܰܠܒܽܘܢܬܳܐ. ܘܡܳܐܢ̈ܶܐ ܕܡܰܥܣܳܖ̈ܶܐ ܕܰܥܒܽܘܪܳܐ ܘܰܕܚܰܡܪܳܐ ܘܰܕܡܶܫܚܳܐ ܘܰܒܩܽܘܖ̈ܝܳܐ ܕܠܶܘ̈ܳܝܶܐ ܘܰܡܫܰܡ̈ܫܳܢܶܐ: ܘܰܕܬܰܖ̈ܥܶܐ: ܖ̈ܺܝܫܝܳܬܳܐ ܕܟܳܗ̈ܢܶܐ.
6 ܘܰܒܟܽܠܗܶܝܢ ܗܳܠܶܝܢ ܠܳܐ ܗܘܺܝܬ ܒܽܐܘܪܺܫܠܶܡ: ܡܶܛܽܠ ܕܒܰܫܢܰܬ ܬܠܳܬܺܝܢ ܘܬܰܪܬܶܝܢ ܠܰܐܪܛܰܚܫܶܫܬ ܡܰܠܟܳܐ ܕܒܳܒܶܠ: ܐܶܬܺܝܬ ܠܘܳܬ ܡܰܠܟܳܐ ܒܚܰܪܬܳܐ ܕܝܰܘ̈ܡܳܬܳܐ ܐܶܫܬܰܐܠܶܬ ܡܶܢ ܡܰܠܟܳܐ.
7 ܘܶܐܬܺܝܬ ܠܽܐܘܪܺܫܠܶܡ: ܘܶܐܣܬܰܟܽܠܬ ܒܺܝܫܬܳܐ ܕܰܥܒܰܕ ܐܶܠܺܝܫܳܒ ܠܛܽܘܒܝܳܐ. ܕܰܥܒܰܕ ܠܶܗ ܒܰܝܬܳܐ ܒܕܳܪܬܳܐ ܕܡܳܪܝܳܐ.
8 ܘܶܐܬܒܐܶܫ ܠܺܝ ܛܳܒ: ܘܰܫܕܺܝܬ ܟܽܠܗܽܘܢ ܡܳܐܢ̈ܶܐ ܕܒܰܝܬܶܗ ܕܛܽܘܒܝܳܐ: ܒܫܽܘܩܳܐ ܠܒܰܪ ܡܶܢ ܕܳܪܬܳܐ.
9 ܘܶܐܡܪܶܬ ܘܕܰܟܺܝܘ ܕܳܪܬܳܐ ܘܰܐܗܦܟܶ݀ܬ ܠܬܰܡܳܢ ܡܳܐܢܰܝ̈ ܒܰܝܬܶܗ ܕܡܳܪܝܳܐ: ܘܩܽܘܖ̈ܒܳܢܶܐ ܘܰܠܒܽܘܢܬܳܐ.
10 ܘܝܶܕܥܶ݀ܬ ܕܰܡܢܳܬܳܐ ܕܠܶܘ̈ܳܝܶܐ ܠܳܐ ܡܶܬܝܰܗܒܳܐ. ܘܰܥܪܰܩܘ ܓܒܰܪ ܠܚܰܩܠܶܗ: ܠܶܘ̈ܳܝܶܐ ܘܰܡܫܰܡ̈ܫܳܢܶܐ ܘܥܳܒܕܰܝ̈ ܥܒܺܝ̈ܕܳܬܳܐ.
11 ܘܶܐܢܳܐ ܕܳܢܶ݀ܬ ܥܰܡ ܪܺܝܫܳܐ: ܘܶܐܡܪܶܬ ܠܗܽܘܢ: ܡܶܛܽܠ ܡܳܢܳܐ ܫܒܺܝܩ ܒܰܝܬܶܗ ܕܡܳܪܝܳܐ ܘܟܰܢܫܶ݀ܬ ܐܶܢܽܘܢ: ܘܰܐܩܺܝܡܶ݀ܬ ܐܶܢܽܘܢ ܥܰܠ ܩܝܳܡܰܝ̈ܗܽܘܢ.
12 ܘܟܽܠ ܝܽܗ̱ܘܕܳܝ̈ܶܐ ܐܰܝܬܺܝܘ ܡܰܥܣܳܖ̈ܶܐ ܕܰܥܒܽܘܪܳܐ: ܘܰܕܚܰܡܪܳܐ: ܘܰܕܡܶܫܚܳܐ: ܠܰܐܘܨܖ̈ܶܐ.
13 ܘܰܐܫܠܛܶܬ ܥܰܠ ܐܰܘܨܖ̈ܶܐ ܠܰܫܠܰܡܝܳܐ ܟܽܘܡܪܳܐ: ܘܰܠܨܳܕܽܘܩ ܣܳܦܪܳܐ: ܘܠܰܦܪܳܝܳܐ ܒܰܪ ܠܶܘ̈ܳܝܶܐ: ܘܥܰܡܗܽܘܢ ܚܰܢܰܢ ܒܰܪ ܙܟܽܘܪ ܒܰܪ ܡܬܰܢܝܳܐ. ܡܶܛܽܠ ܕܫܰܪܺܝܖ̈ܶܐ ܐܶܬܚܰܫܰܒܘ: ܘܦܶܨܰܬܗܽܘܢ ܣܶܠܩܰܬ ܠܡܶܗܘܳܐ ܖ̈ܺܝܫܶܐ ܠܰܐܚܰܝ̈ܗܽܘܢ.
14 ܐܶܬܕܰܟܪ ܠܺܝ ܐܰܠܳܗܝ ܡܶܛܽܠ ܗܳܕܶܐ. ܘܠܳܐ ܬܰܥܒܰܪ ܛܰܝܒܽܘܬܝ ܕܥܶܒܕܶܬ ܒܒܶܝܬ ܐܰܠܳܗܝ ܘܒܰܢܛܽܘܖ̈ܳܬܳܟ.
15 ܒܝܰܘ̈ܡܳܬܳܐ ܗܳܢܽܘܢ ܚܙܺܝ݀ܬ ܒܰܝܗܽܘܕ ܐܽܘܖ̈ܚܳܬܳܐ ܕܖ̈ܳܕܝܳܢ ܒܫܰܒܬܳܐ. ܘܡܰܝܬܶܝܢ ܛܰܥܢ̈ܶܐ: ܘܫܳܩܠܺܝܢ ܥܰܠ ܚܶܡܖ̈ܶܐ: ܘܳܐܦ ܚܰܡܪܳܐ: ܘܥܶܢܒ̈ܶܐ: ܘܬܺܐܢ̈ܶܐ. ܘܛܰܥܢ̈ܶܐ ܡܰܥܠܺܝܢ ܠܽܐܘܪܺܫܠܶܡ ܒܝܰܘܡܳܐ ܕܫܰܒܬܳܐ ܘܰܐܣܗܕܶܬ ܒܗܽܘܢ: ܕܠܳܐ ܬܙܰܒܢܽܘܢ ܨܰܝܕܳܐ.
16 ܘܠܳܐ ܬܰܝܬܽܘܢ ܢܽܘ̈ܢܶܐ. ܘܠܳܐ ܬܙܰܒܢܽܘܢ ܒܝܰܘܡܳܐ ܕܫܰܒܬܳܐ: ܠܰܒܢܰܝ̈ ܝܺܗܽܘܕܳܐ ܒܽܐܘܪܺܫܠܶܡ.
17 ܘܕܳܢܶ݀ܬ ܥܰܡ ܖ̈ܺܝܫܶܐ ܕܺܝܗܽܘܕܳܐ. ܘܶܐܡܪܶܬ ܠܗܽܘܢ: ܡܶܛܽܠ ܡܳܢܳܐ ܦܶܬܓܳܡܳܐ ܗܳܢܳܐ ܒܺܝܫܳܐ ܥܳܒܕܺܝܢ ܐܢ̱ܬܽܘܢ ܘܡܰܚܠܺܝܢ ܐܢ̱ܬܽܘܢ ܝܰܘܡܳܐ ܕܫܰܒܬܳܐ.
18 ܗܳܟܰܢܳܐ ܥܒܰܕܘ ܐܰܒܳܗܰܝ̈ܟܽܘܢ ܘܰܐܝܬܺܝ ܐܰܠܳܗܳܐ ܥܠܰܝܢ ܟܽܠܳܗ̇ ܒܺܝܫܬܳܐ ܗܳܕܶܐ: ܘܥܰܠ ܩܪܺܝܬܳܐ ܗܳܕܶܐ. ܘܰܐܢ̱ܬܽܘܢ ܡܰܘܣܦܺܝܢ ܚܶܡܬܳܐ ܘܪܽܘܓܙܳܐ ܥܰܠ ܝܺܣܪܳܐܶܝܠ: ܕܰܐܢ̱ܬܽܘܢ ܡܰܚܠܺܝܢ ܝܰܘܡܳܐ ܕܫܰܒܬܳܐ.
19 ܗܳܝܕܶܝܢ ܟܰܕ ܐܶܬܦܰܬܰܚܘ ܬܰܖ̈ܥܶܐ ܕܽܐܘܪܺܫܠܶܡ ܩܕܳܡ ܫܰܒܬܳܐ: ܐܶܡܪܶܬ ܕܢܶܬܬܰܚܕܽܘܢ ܬܰܖ̈ܥܶܐ. ܘܶܐܡܪܶܬ ܕܠܳܐ ܢܶܬܦܰܬܚܽܘܢ ܬܰܖ̈ܥܶܐ: ܥܕܰܡܳܐ ܠܒܳܬܰܪ ܫܰܒܬܳܐ ܘܡܶܢ ܛܰܠܝܰܝ̈ ܐܰܩܺܝܡܶ݀ܬ ܥܰܠ ܬܰܖ̈ܥܶܐ: ܕܠܳܐ ܢܶܥܽܘܠ ܛܰܥܢܳܐ ܒܝܰܘܡܳܐ ܕܫܰܒܬܳܐ.
20 ܘܒܳܬܰܪ ܬܰܓܳܖ̈ܶܐ ܘܙܳܒܢܰܝ̈ ܙܶܒܢܳܐ ܠܒܰܪ ܡܶܢ ܐܽܘܪܺܫܠܶܡ: ܒܝܰܘܡܳܐ ܕܰܬܪܶܝܢ.
21 ܘܣܰܗܕܶܬ ܒܗܽܘܢ: ܘܶܐܡܪܶܬ ܠܗܽܘܢ: ܡܶܛܽܠ ܡܳܢܳܐ ܐܰܢ̱ܬܽܘܢ ܠܳܐ ܥܳܐܠܺܝܢ ܐܢ̱ܬܽܘܢ ܥܰܕ ܩܝܳܡ ܝܰܘܡܳܐ ܒܬܰܪܥܳܐ ܕܫܽܘܪܳܐ. ܐܶܢ ܬܰܣܠܽܘܢ ܡܶܠܬܳܐ ܗܳܕܶܐ: ܐܰܘܫܶܛ ܐܺܝܕܳܐ ܥܠܰܝܟܽܘܢ ܘܡܶܢܶܗ ܡܶܢ ܙܰܒܢܳܐ ܗܰܘ ܠܳܐ ܥ̣ܰܠܘ ܒܫܰܒܬܳܐ.
22 ܘܶܐܡܪܶܬ ܠܠܶܘ̈ܳܝܶܐ ܕܢܶܗܘܽܘܢ ܡܶܬܕܰܟܶܝܢ: ܘܥܳܐܠܺܝܢ ܢܳܛܽܘܖ̈ܶܐ ܘܬܰܖ̈ܥܶܐ ܠܰܡܩܰܕܳܫܽܘ ܠܝܰܘܡܳܐ ܕܫܰܒܬܳܐ ܐܳܦ ܗܳܕܶܐ ܐܰܬܕܰܟܪ ܠܺܝ ܐܰܠܳܗܝ: ܘܚܽܘܣ ܥܠܰܝ ܐܰܝܟ ܣܽܘܓܰܐܬ ܖ̈ܰܚܡܰܝܟ.
23 ܐܳܦ ܒܝܰܘ̈ܡܳܬܳܐ ܗܳܢܽܘܢ ܚܙܺܝܬ ܝܽܗ̱ܘܕܳܝ̈ܶܐ ܕܰܐܘܬܶܒܘ ܢܶܫ̈ܶܐ ܢܽܘܟܖ̈ܳܝܳܬܳܐ: ܘܰܐܫܕܽܘܕܳܝ̈ܳܬܳܐ: ܐܳܦ ܥܰܡܽܘܢܳܝ̈ܳܬܳܐ: ܘܡܽܘܐ̈ܒܳܝܳܬܳܐ.
24 ܘܰܒܢܰܝ̈ܗܽܘܢ ܡܡܰܠܠܺܝܢ ܒܦܶܠܓܳܐ ܐܰܫܕܽܘܕܳܐܺܝܬ: ܘܰܒܦܶܠܓܳܐ ܠܳܐ ܚܳܟܡܺܝܢ ܠܰܡܡܰܠܳܠܽܘ ܝܽܗ̄ܘܕܺܐܺܝܬ: ܐܶܠܳܐ ܐܰܝܟ ܠܶܫܳܢܳܐ ܕܥܰܡ̈ܡܶܐ.
25 ܘܕܳܢܶ݀ܬ ܥܰܡܗܽܘܢ: ܘܠܳܛܶ݀ܬ ܐܶܢܽܘܢ: ܘܩܶܛܠܶ݀ܬ ܡܶܢܗܽܘܢ ܓܰܒܖ̈ܶܐ: ܘܛܶܡܪܶܬ ܐܶܢܽܘܢ. ܘܰܐܘܡܺܝܬ ܐܶܢܽܘܢ ܒܰܐܠܳܗܳܐ: ܘܠܳܐ ܬܶܬܠܽܘܢ ܒܢ̈ܳܬܟܽܘܢ ܠܰܒܢܰܝ̈ܗܽܘܢ: ܕܠܳܐ ܬܶܣܒܽܘܢ ܡܶܢ ܒܢ̈ܳܬܗܽܘܢ ܠܰܒܢܰܝ̈ܟܽܘܢ: ܐܰܘ ܠܟܽܘܢ.
26 ܡܶܛܽܠ ܗܳܠܶܝܢ ܗܽܘ ܚܛܳܐ ܫܠܶܝܡܽܘܢ ܡܰܠܟܳܐ ܕܺܝܣܪܳܐܶܝܠ ܗܰܘ ܕܰܒܥܰܡ̈ܡܶܐ ܣܰܓܺܝ̈ܐܶܐ ܠܳܐ ܗ̱ܘܳܐ ܡܰܠܟܳܐ ܐܰܟܘܳܬܶܗ. ܘܰܪܚܺܝܡ ܗ̱ܘܳܐ ܥܰܠ ܐܰܠܳܗܶܗ ܘܝܰܗܒܶܗ ܐܰܠܳܗܳܐ ܡܰܠܟܳܐ ܥܰܠ ܟܽܠܶܗ ܝܺܣܪܳܐܶܝܠ ܘܳܐܦ ܠܶܗ ܐܰܚ̈ܛܺܝ ܢܶܫ̈ܶܐ ܢܽܘܟܖ̈ܳܝܳܬܳܐ.
27 ܘܰܠܟܽܘܢ ܐܶܫܬܡܰܥ ܦܶܬܓܳܡܳܐ. ܘܰܥܒܰܕܬܽܘܢ ܗܳܕܶܐ ܒܺܝܫܬܳܐ ܪܰܒܬܳܐ: ܠܰܡܟܰܕܳܒܽܘ ܒܰܐܠܳܗܰܢ: ܘܰܠܡܰܘܬܳܒܽܘ ܢܶܫ̈ܶܐ ܢܽܘܟܖ̈ܳܝܳܬܳܐ.
28 ܘܡܶܢ ܒܢܰܝ̈ ܝܽܘܝܳܕܰܥ ܒܰܪ ܐܶܠܺܝܫܳܒ ܟܽܘܡܪܳܐ ܪܰܒܳܐ: ܗܘܳܐ ܚܰܬܢܳܐ ܠܣܰܡܒܠܳܛ ܚܰܘܪܳܢܳܝܳܐ: ܘܰܐܦܪܶܩܬܶܗ ܡܶܢ ܠܘܳܬܝ.
29 ܐܶܬܕܰܟܪ ܠܺܝ ܐܰܠܳܗܝ: ܥܰܠ ܫܰܪܟܳܐ ܕܟܽܘܡܪܽܘܬܳܐ: ܘܥܰܠ ܫܰܪܟܳܐ ܕܟܽܘܡܖ̈ܶܐ: ܘܰܕܠܶܘ̈ܳܝܶܐ.
30 ܘܕܰܟܺܝܬ ܐܶܢܽܘܢ ܡܶܢ ܟܽܠܗܽܘܢ ܥܰܡ̈ܡܶܐ: ܘܰܐܩܺܝܡܶܬ ܐܶܢܽܘܢ ܒܰܢܛܽܘܖ̈ܳܬܗܽܘܢ: ܠܟܽܘܡܖ̈ܶܐ ܘܰܠܠܶܘ̈ܳܝܶܐ: ܐ̱ܢܳܫ ܒܰܥܒܳܕܶܗ.
31 ܘܰܒܩܽܘܖ̈ܒܳܢܶܐ: ܘܰܠܩܽܘܕܫ̈ܶܐ ܒܙܰܒܢܗܽܘܢ: ܘܰܒܥܳܐܕܰܝ̈ܗܽܘܢ: ܘܰܒܒܽܘܟܖ̈ܶܐ. ܐܶܬܕܰܟܪ ܠܺܝ ܐܰܠܳܗܝ ܗܳܕܶܐ ܠܛܰܝܒܽܘܬܳܐ.