Micah 3
The Book of Micah
܀ ܡܝܟ̣ܐ ܓ ܀
1 ܘܶܐܡܰܪ: ܫܡܰܥܘ ܗܳܟܺܝܠ ܗܳܠܶܝܢ ܪܺܝܫܐ ܕܒܶܝܬ ܝܰܥܩܽܘܒ: ܫܰܠܺܝܛܳܢ̈ܶܐ ܕܒܶܝܬ ܝܺܣܪܳܐܶܝܠ: ܠܳܐ ܗ̱ܘܳܐ ܠܟܽܘܢ ܘܳܠܶܐ ܠܡܶܕܰܥ ܕܺܝܢܳܐ.
2 ܣܳܢ̈ܝܰܝ ܛܳܒܬܳܐ ܘܖ̈ܳܚܡܰܝ ܒܺܝ̈ܫܳܬܳܐ: ܕܚܳܛܦܺܝܢ ܐܢ̱ܬܽܘܢ ܡܶܫܟܗܽܘܢ ܡܶܢܗܽܘܢ ܘܒܶܣܪܗܽܘܢ ܡܶܢ ܓܰܖ̈ܡܰܝܗܽܘܢ.
3 ܕܶܐܟܰܠܘ ܒܶܣܪܶܗ ܕܥܰܡܝ: ܘܡܶܫܟܗܽܘܢ ܡܶܢܗܽܘܢ ܐܰܫܠܰܚܘ: ܘܓܰܖ̈ܡܰܝܗܽܘܢ ܬܰܒܰܪܘ: ܘܰܐܪܡܺܝܘ ܐܝܟ ܕܰܒܩܰܕܣܳܐ: ܘܰܐܝܟ ܒܶܣܪܳܐ ܒܩܶܕܪܳܐ.
4 ܗܳܝܕܶܝܢ ܢܶܓܥܽܘܢ ܠܘܳܬ ܡܳܪܝܳܐ ܘܠܳܐ ܢܶܥܢܶܐ ܐܶܢܽܘܢ: ܘܢܰܗܦܶܟ ܐܰܦܰܘ̈ܗܝ ܡܶܢܗܽܘܢ ܒܙܰܒܢܳܐ ܗܰܘ: ܥܰܠ ܕܰܐܒܶܐܫܘ ܥܒܳܕܰܝ̈ܗܽܘܢ.
5 ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܢܒܺܝ̈ܶܐ ܕܡܰܛܥܶܝܢ ܠܥܰܡܝ: ܕܢܳܟܬܺܝܢ ܒܫܶܢܰܝ̈ܗܽܘܢ ܘܡܰܟܪܙܺܝܢ ܫܠܳܡܳܐ: ܘܡܰܢ ܕܠܳܐ ܪܳܡܶܐ ܒܦܽܘܡܗܽܘܢ ܡܰܟܪܙܺܝܢ ܥܠܰܘܗܝ ܩܪܳܒܳܐ.
6 ܡܶܛܽܠ ܗܳܢܳܐ ܠܺܠܝܳܐ ܠܟܽܘܢ ܡܶܢ ܚܶܙܘܳܐ: ܘܬܶܚܫܰܟ ܠܟܽܘܢ ܡܶܢ ܩܶܨܡܳܐ: ܘܬܶܥܪܰܒ ܫܶܡܫܳܐ ܥܰܠ ܢܒܺܝ̈ܶܐ: ܘܢܶܥܡܰܛ ܥܠܰܝܗܽܘܢ ܝܰܘܡܳܐ.
7 ܘܢܶܒܗܬܽܘܢ ܐܰܝܠܶܝܢ ܕܚܳܙܶܝܢ ܚܶܙܘܳܢ̈ܶܐ: ܘܢܰܚܦܪܽܘܢ ܩܳܨܽܘ̈ܡܶܐ: ܘܢܶܬܥܰܛܦܽܘܢ ܟܽܠܗܽܘܢ ܥܰܠ ܣܶܦ̈ܘܳܬܗܽܘܢ: ܡܶܛܽܠ ܕܠܳܐ ܥܳܢܶܐ ܠܗܽܘܢ ܐܰܠܳܗܳܐ.
8 ܒܪܰܡ ܕܶܝܢ ܐܶܢܳܐ ܡܠܶܐ ܐ̱ܢܳܐ ܚܰܝܠܳܐ ܕܪܽܘܚܶܗ ܕܡܳܪܝܳܐ: ܘܕܺܝܢܳܐ ܘܓܰܢ̱ܒܳܪܽܘܬܳܐ: ܕܶܐܚܰܘܶܐ ܠܝܰܥܩܽܘܒ ܥܰܘܠܶܗ: ܘܠܺܝܣܪܳܐܶܝܠ ܚܛܺܝܬܶܗ.
9 ܫܡܰܥܘ ܗܳܟܺܝܠ ܗܳܕܶܐ ܪܺܝܫܐ ܕܒܶܝܬ ܝܰܥܩܽܘܒ: ܫܰܠܺܝܛܳܢ̈ܶܐ ܕܒܶܝܬ ܝܺܣܪܳܐܶܝܠ: ܕܡܰܣܠܶܝܢ ܕܺܝܢܳܐ ܘܰܡܥܰܩܡܺܝܢ ܟܽܠܗܶܝܢ ܬܖ̈ܺܝܨܳܬܳܐ.
10 ܕܒܳܢܶܝܢ ܠܨܶܗܝܽܘܢ ܒܰܕܡܳܐ: ܘܠܽܐܘܪܺܫܠܶܡ ܒܥܰܘܠܳܐ.
11 ܖ̈ܺܝܫܶܝܗ̇ ܒܫܽܘܚܕܳܐ ܕܳܝܢܺܝܢ: ܘܟܳܗ̈ܢܶܝܗ̇ ܒܰܐܓܪܳܐ ܡܰܠܦܺܝܢ: ܘܰܢܒܺܝ̈ܝܶܗ̇ ܒܟܶܣܦܳܐ ܩܳܨܡܺܝܢ: ܘܥܰܠ ܡܳܪܝܳܐ ܡܶܬܬܰܟܠܺܝܢ: ܘܳܐܡܪܺܝܢ: ܗܳܐ ܡܳܪܝܳܐ ܒܰܝܢܳܬܰܢ ܠܳܐ ܐܳܬܝܳܐ ܥܠܰܝܢ ܒܺܝܫܬܳܐ.
12 ܡܶܟܺܝܠ ܡܶܛܽܠܬܟܽܘܢ ܨܶܗܝܽܘܢ ܚܰܩܠܳܐ ܬܶܬܕܒܰܪ: ܐܘܪܺܫܠܶܡ ܚܰܪܒܬܳܐ ܬܶܗܘܶܐ: ܘܛܽܘܪ ܒܰܝܬܳܐ ܠܒܶܝܬ ܥܳܒܳܐ.