Genesis 48
The Book of Genesis
܀ ܒܪܝܬܐ ܡܚ ܀
1 ܘܰܗܘܳܐ ܡܶܢ ܒܳܬܰܪ ܦܶܬܓܳܡ̈ܶܐ ܗܳܠܶܝܢ: ܐܶܬܶܐܡܰܪ ܠܝܰܘܣܶܦ ܕܗܳܐ ܐܰܒܽܘܟ ܐܶܬܟܪܰܗ: ܘܰܕܒܰܪ ܠܰܬܪܶܝܢ ܒܢܰܘ̈ܗܝ ܥܰܡܶܗ: ܠܰܡܢܰܫܶܐ ܘܠܰܐܦܪܶܝܡ.
2 ܘܚܰܘܺܝܘ ܠܝܰܥܩܽܘܒ ܘܶܐܡܰܪܘ ܠܶܗ: ܗܳܐ ܒܪܳܟ ܝܰܘܣܶܦ ܐܶܬܳܐ ܠܘܳܬܳܟ: ܘܶܐܬܚܰܝܰܠ ܝܺܣܪܳܐܶܝܠ ܘܺܝܬܶܒ ܥܰܠ ܥܰܪܣܳܐ.
3 ܘܶܐܡܰܪ ܝܺܣܪܳܐܶܝܠ ܠܝܰܘܣܶܦ: ܐܺܝܠܫܰܕܰܝ ܐܶܬܓܠܺܝ ܥܠܰܝ ܒܠܽܘܙ ܒܰܐܪܥܳܐ ܕܰܟܢܰܥܢ: ܘܒܰܪܟܰܢܝ.
4 ܘܶܐܡܰܪ ܠܺܝ: ܗܳܐ ܡܒܰܪܶܟ ܐ̱ܢܳܐ ܠܳܟ ܘܡܰܣܓܶܐ ܐ̱ܢܳܐ ܠܳܟ: ܘܶܐܬܶܠ ܠܳܟ ܠܟܶܢܫܳܐ ܕܥܰܡ̈ܡܶܐ: ܘܶܐܬܶܠ ܐܰܪܥܳܐ ܗܳܕܶܐ ܠܙܰܪܥܳܟ ܡܶܢ ܒܳܬܪܳܟ: ܝܳܪܬܽܘܬܳܐ ܠܥܳܠܰܡ.
5 ܘܗܳܫܳܐ ܬܪܶܝܢ ܒܢܰܝ̈ܟ ܕܶܐܬܺܝܠܶܕܘ ܠܳܟ ܒܰܐܪܥܳܐ ܕܡܶܨܪܶܝܢ: ܥܰܕܠܳܐ ܐܺܬܶܐ ܠܘܳܬܳܟ ܠܰܐܪܥܳܐ ܕܡܶܨܪܶܝܢ: ܕܺܝܠܝ ܐܶܢܽܘܢ ܐܰܦܪܶܝܡ ܘܰܡܢܰܫܶܐ ܕܺܝܠܝ ܢܶܗܘܽܘܢ: ܐܰܝܟ ܪܽܘܒܺܝܠ ܘܰܐܝܟ ܫܶܡܥܽܘܢ ܢܶܗܘܽܘܢ ܠܺܝ.
6 ܘܰܒܢܰܝ̈ܐ ܕܬܰܘܠܶܕ ܒܳܬܰܪܗܽܘܢ ܠܳܟ ܢܶܗܘܽܘܢ: ܥܰܠ ܫܡܳܐ ܕܰܐܚܰܝ̈ܗܽܘܢ ܢܶܬܩܪܽܘܢ ܒܝܳܪܬܽܘܬܗܽܘܢ.
7 ܘܶܐܢܳܐ ܟܰܕ ܐܳܬܶܐ ܐ̱ܢܳܐ ܡܶܢ ܦܳܕܳܢ ܕܳܐܪܳܡ: ܡܺܝܬܰܬ ܥܠܰܝ ܪܳܚܶܝܠ ܒܰܐܪܥܳܐ ܕܰܟܢܰܥܢ ܒܽܐܘܪܚܳܐ: ܐܰܝܟ ܡܰܪܕܶܐ ܦܰܪܣܚܳܐ ܕܰܐܪܥܳܐ ܠܡܶܥܰܠ ܠܳܐܦܪܳܬ: ܘܰܩܒܰܪܬܳܗ̇ ܬܰܡܳܢ ܒܽܐܘܪܚܳܐ ܕܳܐܦܪܳܬ: ܗܺܝ ܗܺܝ ܒܶܝܬ ܠܚܶܡ.
8 ܘܰܚܙܳܐ ܝܺܣܪܳܐܶܝܠ ܠܰܒܢܰܘ̈ܗܝ ܕܝܰܘܣܶܦ ܘܶܐܡܰܪ ܠܶܗ: ܡܰܢ ܐܶܢܽܘܢ ܗܳܠܶܝܢ.
9 ܘܶܐܡܰܪ ܝܰܘܣܶܦ: ܠܰܐܒܽܘܗܝ: ܒܢܰܝ̈ ܐܶܢܽܘܢ ܕܝܰܗܒ ܠܺܝ ܐܰܠܳܗܳܐ ܗܳܪܟܳܐ: ܘܶܐܡܰܪ: ܩܰܪܶܒ ܐܶܢܽܘܢ ܠܘܳܬܝ ܘܶܐܒܰܪܶܟ ܐܶܢܽܘܢ.
10 ܘܥܰܝܢܰܘ̈ܗܝ ܕܺܝܣܪܳܐܶܝܠ ܝܺܩܰܖ̈ܝ ܡܶܢ ܣܰܝܒܽܘܬܳܐ: ܘܠܳܐ ܡܶܫܟܰܚ ܗܘܳܐ ܕܢܶܚܙܶܐ ܫܰܦܺܝܪ: ܘܩܰܪܶܒ ܐܶܢܽܘܢ ܠܘܳܬܶܗ: ܘܢܰܫܶܩ ܐܶܢܽܘܢ ܘܥܰܦܶܩ ܐܶܢܽܘܢ.
11 ܘܶܐܡܰܪ ܝܺܣܪܳܐܶܝܠ ܠܝܰܘܣܶܦ: ܠܚܶܙܘܳܐ ܕܰܐܦܰܝ̈ܟ ܠܳܐ ܣܰܒܪܶܬ: ܘܗܳܐ ܚܰܘܝܰܢܝ ܐܰܠܳܗܳܐ ܐܳܦ ܙܰܪܥܳܟ.
12 ܘܰܐܦܪܶܩ ܐܶܢܽܘܢ ܡܶܢ ܩܕܳܡ ܒܽܘܖ̈ܟܰܘܗܝ: ܘܰܣܓܶܕܘ ܩܕܳܡܰܘܗܝ ܥܰܠ ܐܰܦܰܝ̈ܗܽܘܢ ܥܰܠ ܐܰܪܥܳܐ.
13 ܘܰܕܒܰܪ ܝܰܘܣܶܦ ܠܰܬܖ̈ܰܝܗܽܘܢ ܒܢܰܘ̈ܗܝ: ܠܰܐܦܪܶܝܡ ܒܝܰܡܺܝܢܶܗ ܡܶܢ ܣܶܡܳܠܶܗ ܕܺܝܣܪܳܐܶܝܠ: ܘܠܰܡܢܰܫܶܐ ܒܣܶܡܳܠܶܗ ܡܶܢ ܝܰܡܺܝܢܶܗ ܕܺܝܣܪܳܐܶܝܠ: ܘܩܰܪܶܒ ܐܶܢܽܘܢ ܠܘܳܬܶܗ.
14 ܘܰܐܘܫܶܛ ܝܺܣܪܳܐܶܝܠ ܝܰܡܺܝܢܶܗ: ܘܣܳܡܳܗ̇ ܥܰܠ ܪܺܝܫܶܗ ܕܰܐܦܪܶܝܡ ܗܽܘܝܽܘ ܙܥܽܘܪܳܐ: ܘܣܶܡܳܠܶܗ ܥܰܠ ܪܺܝܫܶܗ ܕܰܡܢܰܫܶܐ: ܫܰܚܠܶܦ ܐܶܢܶܝܢ ܐܺܝܕܰܘ̈ܗܝ: ܡܶܛܽܠ ܕܰܡܢܰܫܶܐ ܗܘܳܐ ܒܽܘܟܪܳܐ.
15 ܘܒܰܪܶܟ ܝܰܥܩܽܘܒ ܠܝܰܘܣܶܦ ܒܪܶܗ ܘܶܐܡܰܪ: ܐܰܠܳܗܳܐ ܕܰܫܦܰܪܘ ܩܕܳܡܰܘܗܝ ܐܰܒ̈ܳܗܰܝ ܐܰܒܪܳܗܳܡ ܘܺܐܝܣܚܳܩ: ܐܰܠܳܗܳܐ ܕܬܰܪܣܝܰܢܝ ܡܶܢ ܛܰܠܝܽܘܬܝ ܘܰܥܕܰܡܳܐ ܠܝܰܘܡܳܢܳܐ.
16 ܡܰܠܰܐܟܳܐ ܕܦܰܪܩܰܢܝ ܡܶܢ ܟܽܠ ܒܺܝܫܳܐ: ܢܒܰܪܶܟ ܠܰܛܠܳܝ̈ܶܐ: ܘܢܶܬܩܪܶܐ ܫܶܡܝ ܒܗܽܘܢ: ܘܰܫܡܳܐ ܕܰܐܒ̈ܳܗܰܝ ܐܰܒܪܳܗܳܡ ܘܺܐܝܣܚܳܩ: ܘܢܶܟܒܪܽܘܢ ܘܢܶܣܓܽܘܢ ܒܓܰܘܗ̇ ܕܰܐܪܥܳܐ.
17 ܘܰܚܙܳܐ ܝܰܘܣܶܦ ܕܣܳܡ ܐܰܒܽܘܗܝ ܐܺܝܕܶܗ ܕܝܰܡܺܝܢܳܐ ܥܰܠ ܪܺܝܫܶܗ ܕܰܐܦܪܶܝܡ: ܘܶܐܬܒܐܶܫ ܒܥܰܝܢܰܘ̈ܗܝ: ܘܣܳܡܶܟ ܠܳܗ̇ ܠܺܐܝܕܶܗ ܕܰܐܒܽܘܗܝ ܠܡܰܥܒܳܪܽܘܬܳܗ̇ ܡܶܢ ܪܺܝܫܶܗ ܕܰܐܦܪܶܝܡ: ܘܰܢܣܺܝܡܺܝܗ̇ ܥܰܠ ܪܺܝܫܶܗ ܕܰܡܢܰܫܶܐ.
18 ܘܶܐܡܰܪ ܝܰܘܣܶܦ ܠܰܐܒܽܘܗܝ: ܠܳܐ ܗܘܳܐ ܗܳܟܰܢܳܐ ܐܳܒܝ: ܐܶܠܳܐ ܗܳܢܰܘ ܒܽܘܟܪܳܐ: ܣܺܝܡ ܝܰܡܺܝܢܳܟ ܥܰܠ ܪܺܝܫܶܗ.
19 ܘܠܳܐ ܨܒܳܐ ܐܰܒܽܘܗܝ: ܘܶܐܡܰܪ: ܝܳܕܰܥ ܐ̱ܢܳܐ ܒܶܪܝ ܝܳܕܰܥ ܐ̱ܢܳܐ: ܐܳܦ ܗܽܘ ܢܶܗܘܶܐ ܠܥܰܡܳܐ: ܘܳܐܦ ܗܽܘ ܢܺܐܪܰܒ: ܒܪܰܡ ܐܰܚܽܘܗܝ ܙܥܽܘܪܳܐ ܢܺܐܪܰܒ ܡܶܢܶܗ: ܘܙܰܪܥܶܗ ܢܶܗܘܶܐ ܡܠܶܐ ܥܰܡ̈ܡܶܐ.
20 ܘܒܰܪܶܟ ܐܶܢܽܘܢ ܒܝܰܘܡܳܐ ܗܰܘ ܘܶܐܡܰܪ: ܒܳܟ ܢܶܬܒܰܪܰܟ ܝܺܣܪܳܐܶܝܠ: ܘܢܺܐܡܪܽܘܢ: ܢܶܥܒܕܳܟ ܐܰܠܳܗܳܐ ܐܰܝܟ ܐܰܦܪܶܝܡ ܘܰܐܝܟ ܡܢܰܫܶܐ: ܘܰܥܒܰܕ ܠܰܐܦܪܶܝܡ ܩܕܳܡ ܡܢܰܫܶܐ.
21 ܘܶܐܡܰܪ ܝܺܣܪܳܐܶܝܠ ܠܝܰܘܣܶܦ: ܗܳܐ ܐܶܢܳܐ ܡܳܐܶܬ ܐ̱ܢܳܐ: ܘܢܶܗܘܶܐ ܐܰܠܳܗܳܐ ܥܰܡܟܽܘܢ: ܘܢܰܗܦܶܟܟܽܘܢ ܠܰܐܪܥܳܐ ܕܰܐܒܗܰܝ̈ܟܽܘܢ.
22 ܘܶܐܢܳܐ ܗܳܐ ܝܶܗܒܶܬ ܠܳܟ ܡܢܳܬܳܐ ܚܕܳܐ ܝܰܬܺܝܪܬܳܐ ܥܰܠ ܐܰܚܰܝ̈ܟ: ܕܢܶܣܒܶܬ ܡܢ ܐܺܝܕܳܐ ܕܳܐܡܽܘܖ̈ܳܝܶܐ ܒܣܰܝܦܝ ܘܰܒܩܶܫܬܝ.