Deuteronomy 15
The Book of Deuteronomy
܀ ܬܢܝܢ ܢܡܘܣܐ ܝܗ ܀
1 ܒܳܬܰܪ ܫܒܰܥ ܫܢܺܝ̈ܢ ܥܒܶܕ ܫܽܘܒܩܳܢܳܐ.
2 ܘܗܳܢܰܘ ܙܶܕܩܶܗ ܕܫܽܘܒܩܳܢܳܐ. ܢܶܫܒܽܘܩ ܟܽܠ ܓܰܒܪܳܐ ܡܳܪܶܐ ܚܰܘܒܳܐ ܕܚܰܝܳܒ ܠܶܗ ܚܰܒܪܶܗ. ܠܳܐ ܢܶܬܒܰܥ ܡܶܢ ܚܰܒܪܶܗ ܘܡܶܢ ܐܰܚܽܘܗܝ. ܡܶܛܽܠ ܕܶܐܬܩܪܺܝ ܫܽܘܒܩܳܢܳܐ ܠܡܳܪܝܳܐ.
3 ܘܡܶܢ ܢܽܘܟܪܳܝܳܐ ܬܒܰܥ. ܘܡܶܕܶܡ ܕܺܐܝܬ ܠܳܟ ܠܘܳܬ ܐܰܚܽܘܟ ܫܒܽܘܩ.
4 ܕܠܳܐ ܢܶܗܘܶܐ ܒܰܝܢܳܬܟܽܘܢ ܡܶܣܟܺܢܳܐ. ܡܶܛܽܠ ܕܰܡܒܰܪܳܟܽܘ ܢܒܰܪܟܳܟ ܡܳܪܝܳܐ ܐܰܠܳܗܳܟ. ܒܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ ܠܡܺܐܪܬܳܗ̇
5 ܘܶܐܢ ܬܶܫܡܰܥ ܒܩܳܠܶܗ ܕܡܳܪܝܳܐ ܐܰܠܳܗܳܟ. ܘܬܶܛܰܪ ܘܬܶܥܒܶܕ ܗܳܢܳܐ ܟܽܠܶܗ ܦܽܘܩܕܳܢܳܐ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ.
6 ܢܒܰܪܟܳܟ ܡܳܪܝܳܐ ܐܰܠܳܗܳܟ ܐܰܝܟ ܕܶܐܡܰܪ ܠܳܟ. ܬܰܘܙܶܦ ܠܥܰܡ̈ܡܶܐ ܣܰܓܺܝ̈ܐܶܐ ܘܰܐܢ̱ܬ ܠܳܐ ܬܺܐܙܰܦ. ܘܬܶܫܬܰܠܰܛ ܒܥܰܡ̈ܡܶܐ ܣܰܓܺܝ̈ܐܶܐ. ܘܒܳܟ ܠܳܐ ܢܶܫܬܰܠܛܽܘܢ.
7 ܘܶܐܢ ܢܶܗܘܶܐ ܒܰܝܢܳܬܟܽܘܢ ܡܶܣܟܺܢܳܐ ܚܰܕ ܡܶܢ ܐܰܚܰܝ̈ܟܽܘܢ. ܒܰܚܕܳܐ ܡܶܢ ܩܽܘܖ̈ܝܟܽܘܢ. ܒܰܐܪܥܳܐ ܕܝܳܗܶܒ ܠܳܟ ܡܳܪܝܳܐ ܐܰܠܳܗܳܟ. ܠܳܐ ܬܰܥܫܶܢ ܠܶܒܳܟ. ܘܠܳܐ ܬܶܐܚܽܘܕ ܐܺܝܕܳܟ ܡܶܢ ܐܰܚܽܘܟ ܡܶܣܟܺܢܳܐ.
8 ܐܶܠܳܐ ܦܬܰܚ ܠܶܗ ܐܺܝܕܳܟ. ܘܰܐܘܙܶܦܳܝܗܝ ܡܶܕܶܡ ܕܚܰܣܺܝܪ ܠܶܗ.
9 ܐܶܙܕܰܗܪ ܕܰܠܡܳܐ ܢܶܗܘܶܐ ܦܶܬܓܳܡܳܐ ܕܥܰܘܠܳܐ ܒܠܶܒܳܟ. ܘܬܺܐܡܰܪ. ܩܶܪܒܰܬ ܫܰܢ̱ܬܳܐ ܕܫܳܒܽܘܥܳܐ ܫܰܢ̱ܬܳܐ ܕܫܽܘܒܩܳܢܳܐ. ܘܬܶܒܐܰܫ ܥܰܝܢܳܟ ܒܰܐܚܽܘܟ ܡܶܣܟܺܢܳܐ ܘܠܳܐ ܬܶܬܶܠ ܠܶܗ. ܘܢܶܩܪܶܐ ܥܠܰܝܟ ܠܡܳܪܝܳܐ. ܘܢܶܗܘܶܐ ܥܠܰܝܟ ܚܛܳܗܳܐ.
10 ܐܶܠܳܐ ܗܰܒ ܠܶܗ. ܘܠܳܐ ܢܶܒܐܰܫ ܠܶܒܳܟ ܡܳܐ ܕܝܳܗܶܒ ܐܰܢ̱ܬ ܠܶܗ. ܕܡܶܛܽܠ ܦܶܬܓܳܡܳܐ ܗܳܢܳܐ. ܢܒܰܪܟܳܟ ܡܳܪܝܳܐ ܐܰܠܳܗܳܟ ܒܟܽܠܗܽܘܢ ܥܒܳܕܰܝ̈ܟ ܘܰܒܟܽܠ ܡܶܕܶܡ ܕܡܰܘܫܶܛ ܐܰܢ̱ܬ ܐܺܝܕܳܟ.
11 ܠܳܐ ܓܶܝܪ ܓܳܡܰܪ ܡܶܣܟܺܢܳܐ ܡܶܢ ܓܰܘ ܐܰܪܥܳܐ. ܡܶܛܽܠ ܗܳܢܳܐ ܡܦܰܩܶܕ ܐ̱ܢܳܐ ܠܳܟ ܘܳܐܡܰܪ ܐ̱ܢܳܐ ܠܳܟ. ܕܬܶܦܬܰܚ ܐܺܝܕܳܟ ܠܰܐܚܽܘܟ ܡܶܣܟܺܢܳܐ ܘܰܠܒܳܝܫܳܐ ܕܒܰܐܪܥܳܟ.
12 ܘܟܰܕ ܢܶܙܕܰܒܰܢ ܠܳܟ ܐܰܚܽܘܟ ܥܶܒܪܳܝܳܐ ܐܰܘ ܥܶܒܪܳܝܬܳܐ. ܫܶܬ ܫܢܺܝ̈ܢ ܢܶܦܠܚܳܟ. ܘܰܠܫܰܢ̱ܬܳܐ ܕܰܫܒܰܥ ܫܒܽܘܩܳܝܗܝ ܒܰܪ ܚܺܐܖ̈ܶܐ ܡܶܢ ܠܘܳܬܟ.
13 ܘܡܳܐ ܕܫܳܒܶܩ ܐܰܢ̱ܬ ܠܶܗ ܒܰܪ ܚܺܐܖ̈ܶܐ ܡܶܢ ܠܘܳܬܳܟ. ܠܳܐ ܬܶܫܒܩܺܝܘܗܝ ܣܪܺܝܩܳܐܺܝܬ.
14 ܐܶܠܳܐ ܦܪܽܘܫ ܘܗܰܒ ܠܶܗ ܡܶܢ ܥܳܢ̈ܳܟ. ܘܡܶܢ ܬܰܘܖ̈ܰܝܟ. ܘܡܶܢ ܐܶܕܪܳܟ. ܘܡܶܢ ܡܰܥܨܰܪܬܳܟ. ܡܶܢ ܡܶܕܶܡ ܕܝܰܗܒ ܠܳܟ ܡܳܪܝܳܐ ܐܰܠܳܗܳܟ ܗܰܒ ܠܶܗ.
15 ܘܶܐܬܕܰܟܪ ܕܥܰܒܕܳܐ ܗܘܰܝܬ ܒܡܶܨܪܶܝܢ. ܘܦܰܪܩܳܟ ܡܳܪܝܳܐ ܐܰܠܳܗܳܟ. ܡܶܛܽܠ ܗܳܢܳܐ ܡܦܰܩܶܕ ܐ̱ܢܳܐ ܠܳܟ ܦܶܬܓܳܡܳܐ ܗܳܢܳܐ ܝܰܘܡܳܢܳܐ.
16 ܘܶܐܢ ܢܺܐܡܰܪ ܠܳܟ ܠܳܐ ܢܳܦܶܩ ܐ̱ܢܳܐ ܡܶܢ ܠܘܳܬܳܟ. ܡܶܛܽܠ ܕܰܪܚܶܡܬܳܟ ܘܰܠܒܰܝܬܳܟ. ܘܦܰܩܳܚ ܠܺܝ ܥܰܡܳܟ.
17 ܣܰܒ ܡܰܩܒܳܐ ܩܽܘܒ ܐܶܕܢܶܗ ܥܰܠ ܬܰܪܥܳܐ ܘܢܶܗܘܶܐ ܠܳܟ ܥܰܒܕܳܐ ܠܥܳܠܰܡ. ܘܳܐܦ ܠܰܐܡܬܳܟ ܗܳܟܰܢܳܐ ܬܶܥܒܶܕ ܠܳܗ̇.
18 ܘܠܳܐ ܢܶܬܒܐܶܫ ܒܥܰܝܢܰܝ̈ܟ ܡܳܐ ܕܫܳܒܶܩ ܐܰܢ̱ܬ ܠܶܗ ܒܰܪ ܚܺܐܖ̈ܶܐ ܡܶܢ ܠܘܳܬܟ. ܡܶܛܽܠ ܕܚܰܕ ܬܪܶܝܢ ܒܰܐܓܪܳܐ ܕܰܐܓܺܝܪܳܐ ܦܰܠܚܳܟ ܫܶܬ ܫܢܺܝ̈ܢ. ܘܰܢܒܰܪܟܳܟ ܡܳܪܝܳܐ ܐܰܠܳܗܳܟ ܒܟܽܠܡܶܕܶܡ ܕܥܳܒܶܕ ܐܰܢ̱ܬ. ܕܥܰܠ ܒܽܘܟܖ̈ܶܐ
19 ܟܽܠ ܒܽܘܟܪܳܐ ܕܡܶܬܺܝܠܶܕ ܒܬܰܘܖ̈ܰܝܟ. ܘܰܒܥܳܢ̈ܳܟ ܕܶܟܪܳܐ. ܩܰܕܶܫ ܠܡܳܪܝܳܐ ܐܰܠܳܗܳܟ. ܠܳܐ ܬܶܦܠܽܘܚ ܒܒܽܘܟܪܳܐ ܕܬܰܘܖ̈ܰܝܟ. ܘܠܳܐ ܬܶܓܽܘܙ ܒܽܘܟܪܳܐ ܕܥܳܢ̈ܳܟ.
20 ܐܶܠܳܐ ܩܕܳܡ ܡܳܪܝܳܐ ܐܰܠܳܗܳܟ ܐܰܟܽܘܠܳܝܗܝ ܕܰܫܢܳܐ ܒܰܫܢܳܐ. ܒܰܐܬܪܳܐ ܕܓܳܒܶܐ ܡܳܪܝܳܐ ܐܰܠܳܗܳܟ. ܐܰܢ̱ܬ ܘܒܰܝܬܳܟ.
21 ܘܶܐܢ ܢܶܗܘܶܐ ܒܶܗ ܡܽܘܡܳܐ. ܐܰܘ ܢܶܬܚܓܰܪ ܐܰܘ ܢܶܬܥܰܘܰܪ. ܐܰܘ ܟܽܠ ܡܽܘܡ ܕܰܣܢܶܐ. ܠܳܐ ܬܩܰܪܒܺܝܘܗܝ ܠܡܳܪܝܳܐ ܐܰܠܳܗܳܟ.
22 ܐܶܠܳܐ ܒܩܽܘܖ̈ܝܳܟ ܐܰܟܽܘܠܳܝܗܝ. ܕܰܛܡܰܐ ܘܕܰܕܟܶܐ ܐܰܟܚܕܳܐ. ܐܰܝܟ ܛܰܒܝܳܐ ܘܰܐܝܟ ܐܰܝܠܳܐ ܬܶܐܟܠܺܝܘܗܝ.
23 ܒܰܠܚܽܘܕ ܕܡܳܐ ܠܳܐ ܬܶܐܟܠܽܘܢ. ܐܶܠܳܐ ܥܰܠ ܐܰܪܥܳܐ ܐܰܫܽܘܕܳܝܗܝ ܐܰܝܟ ܡܰܝ̈ܳܐ.