Revelation 16
The Book of Revelation
܀ ܓܠܝܢܐ ܕܝܘܚܢܢ ܝܘ ܀
1- ܘܫܶܡܥܶܬ ܩܳܠܳܐ ܪܰܒܳܐ ܡܶܢ ܗܰܝܟܠܳܐ ܕܳܐܡܰܪ ܠܗܳܢܽܘܢ ܫܰܒܥܳܐ ܡ̈ܰܠܰܐܟܶܐ܆ ܙܶܠܘ ܘܰܐܫܽܘܕܘ ܠܗܳܠܶܝܢ ܫܒܰܥ ܦܺܝ̈ܠܰܐܣ ܕܚܶܡܬܶܗ ܕܰܐܠܳܗܳܐ ܒܰܐܪܥܳܐ.
2- ܘܶܐܙܰܠ ܗܰܘ ܩܰܕܡܳܝܳܐ ܘܶܐܫܰܕ ܠܦܺܝܳܐܠܺܝܢ ܕܺܝܠܶܗ ܒܰܐܪܥܳܐ. ܘܰܗܘܳܐ ܫܽܘܚܢܳܐ ܒܺܝܫܳܐ ܘܟܺܐܒܳܢܳܐ܇ ܥܰܠ ܒܢܰܝ̈ܢܳܫܳܐ ܗܳܢܽܘܢ ܕܺܐܝܬ ܠܗܽܘܢ ܠܪܽܘܫܡܳܐ ܕܗܰܘ ܚܰܝܘܰܬ ܫܶܢܳܐ܇ ܘܰܕܗܳܢܽܘܢ ܕܣܳܓܕܺܝܢ ܠܨܰܠܡܳܐ ܕܺܝܠܶܗ܀
3- ܘܗܰܘ ܬܪܰܝܳܢܳܐ ܡܰܠܰܐܟܳܐ ܐܶܫܰܕ ܠܦܺܝܳܐܠܺܝܢ ܕܺܝܠܶܗ ܒܝܰܡܳܐ܆ ܘܰܗܘܳܐ ܕܡܳܐ ܐܰܝܟ ܕܡܺܝܬܳܐ. ܘܟܽܠ ܢܰܦܫܳܐ ܕܚܰܝ̈ܶܐ ܡܺܝܬܺܝܢ ܗܳܠܶܝܢ ܕܰܒܝܰܡܳܐ܀
4- ܘܗܰܘ ܬܠܺܝܬܳܝܳܐ ܐܶܫܰܕ ܠܦܺܝܳܐܠܺܝܢ ܕܺܝܠܶܗ ܒܢܰܗܪ̈ܰܘܳܬܳܐ ܘܒܰܡܥܺܝ̈ܢܶܐ ܕܡܰܝ̈ܳܐ܆ ܘܰܗܘܰܘ ܕܡܳܐ
5- ܘܫܶܡܥܶܬ ܠܡܰܠܰܐܟܳܐ ܕܡܰܝ̈ܳܐ ܕܳܐܡܰܪ܆ ܙܰܕܺܝܩܳܐ ܐܺܝܬܰܝܟ ܗܰܘ ܕܺܐܝܬܰܘܗ̱ܝ ܘܗܰܘ ܕܺܐܝܬܰܘܗ̱ܝ ܗ̱ܘܳܐ܇ ܘܚܰܣܝܳܐ ܡܶܛܽܠ ܕܗܳܠܶܝܢ ܕܳܢܬ.
6- ܡܶܛܽܠ ܕܰܕܡܳܐ ܕܩܰܕܺܝ̈ܫܶܐ ܘܕܰܢܒܺܝ̈ܶܐ ܐܶܫܰܕܘ܆ ܘܰܕܡܳܐ ܠܗܽܘܢ ܝܰܗ̱ܒܬ ܠܡܶܫܬܳܐ. ܕܫܳܘܶܝܢ ܐܺܝܬܰܝܗܽܘܢ.
7- ܘܫܶܡܥܶܬ ܠܡܰܕܒܚܳܐ ܕܳܐܡܰܪ܆ ܐܺܝܢ ܡܳܪܝܳܐ ܐܰܠܳܗܳܐ ܗܰܘ ܐܰܚܺܝܕ ܟܽܠ܆ ܫܰܪܺܝܪܰܐ ܗ̱ܘ܆ ܘܙܰܕܺܝܩܳܐ ܕܺܝܢܳܐ ܕܺܝܠܳܟ܀
8- ܘܗܰܘ ܪܒܺܝܥܳܝܳܐ ܐܶܫܰܕ ܠܦܺܝܳܐܠܺܝܢ ܕܺܝܠܶܗ ܥܰܠ ܫܶܡܫܳܐ. ܘܶܐܬܺܝܗܶܒ ܠܶܗ ܠܡܰܚܳܡܽܘ ܠܰܒܢܰܝ̈ܢܳܫܳܐ ܒܢܽܘܪܳܐ.
9- ܘܶܐܬܚܡܶܡܘ ܗܳܢܽܘܢ ܒܢܰܝ̈ܢܳܫܳܐ ܒܚܽܘܡܳܐ ܪܰܒܳܐ. ܘܓܰܕܶܦܘ ܒܢܰܝ̈ܢܳܫܳܐ ܠܰܫܡܳܐ ܕܰܐܠܳܗܳܐ܇ ܗܰܘ ܕܺܐܝܬ ܠܶܗ ܫܽܘܠܛܳܢܳܐ ܥܰܠ ܡܰܚ̈ܘܳܬܳܐ ܗܳܠܶܝܢ. ܘܠܳܐ ܐܶܬܬܘܺܝܘ ܠܡܶܬܰܠ ܠܶܗ ܬܶܫܒܽܘܚܬܳܐ܀
10- ܘܗܰܘ ܚܡܺܝܫܳܝܳܐ ܐܶܫܰܕ ܠܦܺܝܳܐܠܺܝܢ ܕܺܝܠܶܗ ܥܰܠ ܬܪܽܘܢܽܘܣ ܕܗܰܘ ܚܰܝܘܰܬ ܫܶܢܳܐ܆ ܘܰܗܘܳܬ ܡܰܠܟܽܘܬܳܐ ܕܺܝܠܶܗ ܚܶܫܽܘܟܬܳܐ. ܘܰܡܠܰܥܣܺܝܢ ܗ̱ܘܰܘ ܠܶܫܳܢ̈ܶܐ ܕܺܝܠܗܽܘܢ ܡܶܢ ܟܺܐܒܳܐ.
11- ܘܓܰܕܶܦܘ ܠܰܐܠܳܗܳܐ ܕܰܫܡܳܐ ܕܰܫܡܰܝܳܐ܇ ܡܶܢ ܟܺܐܒ̈ܶܐ ܕܺܝܠܗܽܘܢ ܘܡܶܢ ܫܽܘܚ̈ܢܶܐ ܕܺܝܠܗܽܘܢ. ܘܠܳܐ ܐܶܬܬܘܺܝܘ ܡܶܢ ܥ̈ܒܳܕܶܐ ܕܺܝܠܗܽܘܢ܀
12- ܘܗܰܘ ܫܬܺܝܬܳܝܳܐ ܐܶܫܰܕ ܠܦܺܝܳܐܠܺܝܢ ܕܺܝܠܶܗ ܥܰܠ ܢܰܗܪܳܐ ܗܰܘ ܪܰܒܳܐ ܦܪܳܬ܆ ܘܺܝܒܶܫܘ ܡܰܝ̈ܳܐ ܕܺܝܠܶܗ. ܐܰܝܟܰܢܳܐ ܕܬܶܬܛܰܝܰܒ ܐܽܘܪܚܳܐ ܕܡ̈ܰܠܟܶܐ ܗܳܢܽܘܢ ܡܶܢ ܡܰܕܢܚܳܐ ܕܫܶܡܫܳܐ.
13- ܘܰܚܙܺܝܬ ܡܶܢ ܦܽܘܡܶܗ ܕܬܰܢܺܝܢܳܐ ܘܡܶܢ ܦܽܘܡܶܗ ܕܗܰܘ ܚܰܝܘܰܬ ܫܶܢܳܐ܆ ܘܡܶܢ ܦܽܘܡܶܗ ܕܗܰܘ ܢܒܺܝܳܐ ܕܰܓܳܠܳܐ܆ ܪ̈ܽܘܚܶܐ ܬܠܳܬ ܛܰܡ̈ܳܐܬܳܐ ܐܰܝܟ ܐܽܘܪ̈ܕܥܶܐ.
14- ܐܺܝܬܰܝܗܶܝܢ ܓܶܝܪ ܪ̈ܽܘܚܶܐ ܕܕܰܝ̈ܘܶܐ ܕܥܳܒܕܺܝܢ ܐܳܬܘ̈ܳܬܳܐ. ܗܳܠܶܝܢ ܕܳܐܙ̈ܳܠ̱ܢ ܥܰܠ ܡ̈ܰܠܟܶܐ ܕܡܶܬܥܰܡܪܳܢܺܝܬܳܐ ܟܽܠܳܗ̇܆ ܠܰܡܟܰܢܳܫܽܘ ܐܶܢܽܘܢ ܠܰܩܪܳܒܳܐ. ܕܝܰܘܡܳܐ ܗܰܘ ܪܰܒܳܐ ܕܰܐܠܳܗܳܐ ܗܰܘ ܐܰܚܺܝܕ ܟܽܠ.
15- ܗܳܐ ܐܳܬܶܐ ܐ̱ܢܳܐ ܐܰܝܟ ܓܰܢܳܒܳܐ. ܛܽܘܒܬܳܢܰܐ ܗ̱ܘ ܗܰܘ ܕܥܺܝܪ ܘܢܳܛܰܪ ܠܡܳܐܢ̈ܶܐ ܕܺܝܠܶܗ܇ ܐܰܝܟܰܢܳܐ ܕܠܳܐ ܥܰܪܛܶܠܳܝܳܐ ܢܗܰܠܶܟ. ܘܢܶܚܙܽܘܢ ܦܽܘܪܣܳܝܳܐ ܕܺܝܠܶܗ.
16- ܘܟܳܢܶܫ ܐܶܢܽܘܢ ܠܕܽܘܟܬܳܐ ܗܳܝ ܕܡܶܬܩܰܪܝܳܐ ܥܶܒܪܳܐܺܝܬ ܐܰܪܡܶܐܓܰܐܕܽܘܢ܀
17- ܘܗܰܘ ܫܒܺܝܥܳܝܳܐ ܐܶܫܰܕ ܠܦܺܝܳܐܠܺܝܢ ܕܺܝܠܶܗ ܥܰܠ ܐܳܐܰܪ܆ ܘܰܢܦܰܩ ܩܳܠܳܐ ܪܰܒܳܐ ܡܶܢ ܓܰܘ ܗܰܝܟܠܳܐ ܡܶܢ ܟܽܘܪܣܝܳܐ ܕܳܐܡܰܪ. ܗܘܳܬ.
18- ܘܰܗܘܰܘ ܒܰܪ̈ܩܶܐ ܘܪ̈ܰܥܡܶܐ ܘܩ̈ܳܠܶܐ ܘܙܰܘܥܳܐ ܪܰܒܳܐ ܗܘܳܐ. ܕܕܰܐܝܟ ܐܰܝܢܳܐ ܕܠܳܐ ܗܘܳܐ܇ ܡܶܢ ܕܰܗܘܰܘ ܒܢܰܝ̈ܢܳܫܳܐ ܥܰܠ ܐܰܪܥܳܐ ܕܰܐܝܟ ܗܳܢܳܐ ܙܰܘܥܳܐ. ܗܳܟܰܢܳܐ ܪܰܒܳܐ.
19- ܘܰܗܘܳܬ ܡܕܺܝܢ̱ܬܳܐ ܗܳܝ ܪܰܒܬܳܐ ܠܰܬܠܳܬ ܡܢܰܘ̈ܳܬܳܐ܆ ܘܰܡܕܺܝܢ̱ܬܳܐ ܕܥܰܡ̱̈ܡܶܐ ܢܶܦܠܰܬ. ܘܒܳܒܶܝܠ ܗܳܝ ܪܰܒܬܳܐ ܐܶܬܕܰܟܪܰܬ ܩܕܳܡ ܐܰܠܳܗܳܐ܇ ܠܡܶܬܰܠ ܠܳܗ̇ ܟܳܣܳܐ ܕܚܰܡܪܳܐ ܗܰܘ ܕܚܶܡܬܳܐ ܕܪܽܘܓܙܳܐ ܕܺܝܠܶܗ.
20- ܘܟܽܠ ܓܳܙܰܪܬܳܐ ܥܶܪܩܰܬ܆ ܘܛܽܘܪ̈ܶܐ ܠܳܐ ܐܶܫܬܟܰܚܘ.
21- ܘܒܰܪܕܳܐ ܪܰܘܪܒܳܐ ܐܰܝܟ ܟܰܟܪܳܢܳܝܳܐ. ܘܢܳܚܶܬ ܡܶܢ ܫܡܰܝܳܐ ܥܰܠ ܒܢܰܝ̈ܢܳܫܳܐ܆ ܘܓܰܕܶܦܘ ܗܳܢܽܘܢ ܒܢܰܝ̈ܢܳܫܳܐ ܠܰܐܠܳܗܳܐ ܡܶܢ ܡܚܽܘܬܳܐ ܕܒܰܪܕܳܐ. ܡܶܛܽܠ ܕܪܰܒܬܳܐ ܐܺܝܬܶܝܗ̇ ܡܚܽܘܬܳܐ ܕܺܝܠܶܗ ܣܰܓܺܝ܀